27.04.2025
克羅地亞足球甲組聯賽 第 32 週
Dinamo Zagreb - HNK Rijeka
Stadion Maksimir
賽果：1:0 (1:0)
入場人數：15711 （400 名作客球迷）
門票：20€ 

喺克羅地亞咁多日，每日搭電車出城時都必經 Dinamo 既主場 Stadion Maksimir；等到佢地宣布開始賣飛時我地特登去球場門口排隊買飛，希望可以獲得一張實體門票做個紀念～ 買飛時要比身份證佢地入資料，買兩張飛就要提供兩張身份證；但入場時係唔會有人睇你係咪門票擁有人。

比賽日係星期日，市內既商店全部都休息；我地安排咗今日去啲名勝行下，由國家大劇院行到去火車站，見到有私家車撞電車食左一陣花生，再喺火車站前既大廣場坐左一陣吸收太陽既溫暖。食埋午餐就喺市內搵間酒吧坐喺太陽底下飲返兩杯先搭車去球場。 呢間酒店有塊寫住 GNK Dinamo 喺呢度成立，唔知 google 翻譯準唔準啦，總之就係一個同球隊有關既地方～ 搭電車時我地搭多一個站先落車，然後再向球場方向行，可以見到球場背後既另一個看台同較小型既球場。

五年前克羅地亞首都發生地震造成嚴重損壞，市中心既教堂去到今日都仍然在維修中，門前有好多舊教堂原先既碎石仲等緊被放回完位。 Maksimir 球場既東看台亦都因為地震受損而要關閉，所以入場既球迷就好似去睇 SVE 咁要對住一個吉既看台睇波。喺場外有條街變咗做 fanzone，可以玩夠食飽先入場。

我地喺開波前大約一個鐘就入咗場，保安阿嬸好隨意咁檢查我個袋就放我入場，然後就要行幾層樓梯先上到頂層。 估唔到看台入面有小食亭仲有油浸香腸可以買，呢盤油位於一道鐵閘入面好安全。 入到看台要再行多十幾行先搵到自己個位，買飛時無得㨂位佢比左唔同行既位我地，喺度睇左幾場波了解咗啲位其實係先到先得就早啲入去霸位同睇太陽落山。果然我地可以好安樂咁一齊坐到完場。 離遠見到嗰塊兩三層樓高既超巨型 Bad Blue Boys 橫額攤咗喺地上，然後見到佢地幾十人慢慢將佢拉起同掛起，好似睇緊一場表演咁！！！！ 喺現場親睇見到真係好震撼，想像唔到落雨既話呢塊布會有幾濕幾重？ 等開波時見到北看台入面有啲球迷喺度打交，唔知發生咩事自己人打自己人？

呢個球場喺 1990 上演咗南斯拉夫內戰其中一個重要既導火線… 當時 Dinamo 喺度迎戰來自塞爾維亞既 Red Star Belgrad， 「火藥味」唔係唔只係用黎形容氣氛既比喻，克羅地亞同塞爾維亞一直都視對方係殺父仇人咁，雙方球迷喺開波前場外場內發生衝突，先出口然後再動手。自八十年代尾開始，Bad Blue Boys 成為 Dinamo 第一球迷組織，喺呢場球迷衝突當然有佢地份參與，後來內戰正式發生後佢地同樣有份去為克羅地亞去戰鬥。 喺市內有唔少 graffiti 去歌頌佢地對國家同球隊既付出，啲人真係當佢地神咁拜。 比較得意既係佢地有間專門店，普通人都可以入去買 BBB 相關既物品所以會見到唔少普通人都會著住 BBB 既週邊去支持佢地。 我地去左兩次都無開門，後來有人同我地講佢自己一個入過去見到幾個大隻佬勁兇神惡殺咁啤住佢，十秒唔夠就怕怕敗走左。

除左國家層面既衝突，Dinamo 內部都有唔少爭執，其中一個爭議點喺球隊名同埋成立日期。 有人覺得隊波係繼承 1911 年成立到 1945 年解散既 HŠK Građanski （克羅地亞公民體育會）；有人就覺隊波係 1945 年由共產政府改名為 Dinamo，然後球迷主席話想搣甩球隊既共產歷史改返舊名然後又改做 Croatia Zagreb，但佢被發現貪污同被指獨自操控球隊，BBB 帶頭反佢但去到而家球迷都仲有分兩大派支持主席同唔支持主席。 喺東歐，好多球迷組織與其叫佢地做球迷組織，叫佢地做地區組織，或者陀地會更適合。。入場睇波支持自己地區既球迷只係佢地其中一部份，政治同足球係唔可以分開。

作客區喺我地既右邊，可惜射燈柱擋左視線唔可以清楚睇哂全景。 啲射燈係後面要符合歐洲足協要求先加建，佢地喺場內四個角落又高又低咁勁求奇起。臨近開波作客看台都仲係無咩人，企喺看台底既防暴仲多過球迷。 話哂呢場都叫做打比，唔係無人黎下嘛？ 我地唔記得呢度係克羅地亞，開波後先慢慢全場完全係正常事。 啲球迷幾個幾個咁行上看台然後慢慢掛旗，過左一陣總算企滿左一個小區。 佢地聽落唔算大聲，但幾乎個個都有舉手參與打氣，整體睇落係唔錯。

對比起對面既北看台，下層看台企滿哂住黑衫既人，中間有幾堆人半裸上半身間唔中放下煙，睇落係震撼但聲量黎講。。。。就好似早幾日睇佢地作客咁，總係差咁啲。 一直覺得佢地仲有貨下個機會之後可能會爆大聲，點知一直都只係喺普通既水平。 比較突出既係我地個看台同北看台互相接住唱歌，呢個時候就聽得出啲球迷真係普通咁唱歌而唔係叫出黎嗰種，對唱左幾 round 我一直都以為北看台聽唔到會收皮，但佢地又接得住唱左幾分鐘。

之後終於等到主隊入波，有啲歡呼聲聽下！！ 領先後一開始有全場一齊打氣時終於有種我就係要呢啲既感覺，可惜幾分鐘得返北看台繼續唱歌又變返一盤盤。 我地個位可以睇通球場三邊，太陽喺我地背後落山睇住個天由藍變橙到深紅，好靚～～～ 下半場個天入黑後作客看台放左幾個響炮同煙花，仲向場內掉左十幾舊煙。 臨近完場 BBB 都黎料，佢地全場一直都有間唔中放幾枝煙，呢個時候佢地好似出絕殺咁大範圍放煙！ 睇住哂濃煙慢慢蓋過成個球場直到散去，去東歐睇波就真係為左呢啲畫面！！！ 但我想講啲煙聞黎勁毒… 早兩個月喺瑞士吸入大量濃煙既時候聞落覺得無咩野，平時睇波有煙都係正常，呢度啲煙係會覺得有啲攻鼻？？ 我地已經同北看台相隔大半個球場仲要算係喺一個開揚既地方._.

後來喺 ig up 左啲相有人話佢上年睇咗同一場波，個場景係一模一樣…. 有少少淋熄左我地既興奮感。 以為好好彩見到個特別時刻，但原來放煙呢啲只係例常事 /.\ 可能都解釋到點解佢地既聲勢好似好 hea 咁，只係例常事。 又可能佢地既 focus 係力的較量多啲？？？

賽後我地由球場行返去酒店，路程大約要大半個鐘。 入黑之後凍左好多所以想行路暖下身，反正都未必塞到上電車返去。 離開球場後我地要經過北看台，當時好多人出緊黎，主要有兩類人： 一類係後生仔，十五六歲覺得自己出入北看台好型咁； 另一類就係大隻佬，一睇就知佢地真正屬於 BBB， 唱歌絕對唔係佢地拿手事。。。 總之就好驚同佢地對望多半秒；好在佢地贏波心情唔錯。