23.04.2025
克羅地亞足球聯賽 第 31 週
HNK Gorica - GNK Dinamo Zagreb
Gradski Stadion Velika Gorica
賽果: 1:0 (0:0)
入場人數: 4.993 (4.500 名作客球迷)
門票: 13€

第一晚訓飽到第二朝食飽之後，新一日又準備去睇第二場波，今次係去位於首都市郊既 Velika Gorica，為左睇 Dinamo Zagreb。 賽前一直有吹奏話今場波會售罄，要大家一齊去幫手打氣搶分贏冠軍，我地就一直捕住幾時開始賣飛。

出發前兩星期佢終於有賣飛消息就即刻去官網買飛，喺歐洲好多足球賽事唔只行實名制，有時仲要你輸入身份證號碼，或者一個球迷識別號碼。 呢場波就要入一個類似要喺當地申請既稅務號碼，上網搵極都搵唔到相關資料，就去 IG 搵下邊個有傾開計又去過克羅地亞既網友問下佢之前點買飛，個個都話： 9 入個號碼就得架啦，入場時無人會驗。 好順利咁買左兩張 print@home 飛，上面印哂個人資料包括名同地址，真係要小心保管 ._.

最後場波係賣哂既，真係好彩我地決定上網買定飛先。 我想講今日係星期三，唔係紅日，但場波係下午三點鐘開波？！ 啲人唔洗返工？？？ Velika Gorica 位於 Zagreb 市郊以南，喺機場附近， 我地先去附近既商場入面既大型超市買啲零食返去比自己做手信，然後搵間 cafe 坐低食件蛋糕做午餐。

天氣預告今日會落雨，但我地用開既德國天氣 App 好似都唔係好準唔知信唔信好。 開波前一個鐘到達球場前既停車場見到個天好似一直想落雨咁搞到唔敢落車， 最後真係落左一陣雨後我地就衝入球場。 入場時果然係就咁嘟飛入場，比人查下袋就完。

提早入場既好處係可以對號入座，今場波我地發現啲人其實唔跟飛坐，入場後見到有位就會坐低。 大部份人都係臨開波甚至係開左波先入場，個個都要自己望下邊度仲有位可以一齊坐。 我旁邊黎左一個帶左小朋友既大隻佬 （唔係肥，真係大隻），大份到佔左我 1／3 個位 ._. 另一邊又係一個小朋友，係咁 chur 佢老豆拎電話影對面既 BBB。

BBB – Bad Blue Boys， 今日黎到唔係為左 Gorica，全場 5000 人得幾百人係支持主場，其他人都係為 Dinamo Zagreb。 佢地既球迷組織係擁有全歐洲最最最巨型既大橫額海報， 今日我地只可以見到迷你版 BBB 大旗。 佢地都係好他調咁慢慢掛旗，反正佢地都係得三大塊旗要搞，喺 BBB 旗上同尋日一樣掛咗塊梵蒂岡旗；開波前亦都有為教宗去世默哀。

HNK Gorica，成立於 2009 年；佢地既前身係成立於 1945 年既 NK Radnik，唯一既成就就係有份參與甲組聯賽～ 佢地有大約一百名作客坐喺我地遙遠既右邊，啲人著住印有 Good Boys 既紅衫 xD 多得主隊今日射入全場唯一入球，見到有堆紅衫彈起慶祝我地先知原來主場有球迷既。。。

見到班 BBB 個個住黑衫企喺我地正對面，一心諗住正呀～ 可以食正佢地既打氣聲一定超正。佢地係唱足全場，但我一直等緊幾時先黎料？ 有一兩次有威脅既埋門成功短暫推高佢地把聲，但大部份時間都覺得硬係差咁啲。 到佢地同呢邊既球迷互相和應 Dinamo！ Zagreb！ 就聽得出佢地既低沉聲音應該真係佢地正常發揮。。。 只好懶落 Dinamo 既廢表現上，成場波踢到好似早兩年德國國家隊咁，係咁無目的地傳波，去到前面傳返去面好似控球時間會計分咁，我都睇到好燥，完全唔似一隊想搶分爭冠軍既球隊！

作客看台有唔少同政治相關既旗，當中比較搶眼既係一塊禁止左轉既旗，好明確咁表示佢地既政向。 成場波佢地間唔中會放下藍煙，影相睇落係唔錯，但可唔可以大聲啲打氣！！！？ 最後好無奈咁得一個入場同幾次藍煙就完左，尋日場波仲好睇。

離場後喺停車場等左超過半個鐘先走到，返到酒店放低架車就搭電車出去市中心搵地方食飯～ 有條街叫 Ulica Ivana Tkalčića 有好多餐廳同酒吧，叫咗碟二人份既燒肉飽到想死。 之後兩日都無波睇，一日留喺 Zagreb 做下遊客周圍搵下 BBB graffiti，去左市中心以北搭䌫車上山，來回只需 10€ 超抵！！！！ 另一日就去左海旁小城 Senj 遊車河吹下海風，成功完美避過左暴雨。