22.04.2025
克羅地亞足球甲組聯賽 第 31 週
NK Lokomotiva Zagreb - HNK Šibenik
Stadion Kranjčevićeva
賽果: 1:2 (1:1)
入場人數: 885 (100 名作客球迷)
門票: 15€

年初睇雜誌時睇到克羅地亞相關既文章覺得好吸引，即刻就睇下有無機會去睇返幾場波，好快就訂左機票同酒店喺復活節之後起行，可以南下提早感受下春天既來臨。

講起克羅地亞，好多人都會諗起 Split 同 Dubrovnik 呢啲海岸城市， 認真睇下地圖安排行程時先發現由 Zagreb 同 Split 車程有成 400 公里，去 Dubrovnik 再多 200 公里。 呢轉我地決定主攻內陸 Zagreb， 再加一日去離首都大約 200 公里既 Senj 聞下海水就算。 另一樣意外既係由法蘭克福飛去 Zagreb 只需一個鐘機程，如果揸車都只係講緊 700 公里左右，原來一啲都唔遠！

過左個復活節長週末之後我地就出發去克羅地亞，中午時間落機然後拎車，好快就去到離市中心大約二十分鐘車程既 Hotel Residence 落腳。 呢間酒店包停車場同酒店，門口就係電車站；搭電車出城只需 0,53€/30min，揸車出去泊車要 2-3€ 一個鐘勁唔抵。麻煩既係呢度無售票機，可以直接同司機買飛但就收 0,80€/30min，要搵指定便利店買定一堆車票用。 由於酒店附近無便利店，我地第一程先同司機買，出到市中心先再買 10 張 30 分鐘既車飛。

喺酒店放低啲野之後就去左附近既餐廳食午飯，克羅地亞出名既係燒肉同地中海料理～ 第一餐就叫左碟 mix meat plate 配薯條同 pizza，加兩杯啤酒，最後再多兩杯甜酒。 飽到要返酒店攤一下黎渡過 food coma，回氣之後就搭車出城去睇今次旅程既第一場波，目的地係市中心既 Stadion Kranjčevićeva。

呢個球場一直有傳話會清拆翻新，過去幾年一直有大大少少既翻新工程，去到呢幾個月就愈傳愈勁話係時候認真動工； 估唔到最後佢地㨂左我地到埗既呢場波做清拆前做告別戰！球場翻新後國家隊同 Dinamo Zagreb 都會將主場由現時既 Stadion Maksimir 搬過黎。

喺門口買飛比 15€ 就可以入場，安檢時阿姐好認真咁問我食唔食煙同搵我有無打火機；因為呢個球場本來係一個木看台，喺 1990 年因為不明原因出現火災造成嚴重損。 我地坐既西看台啲膠座位下都仲係原本既橫木座位，我估應該係為安全而難得會有一個禁煙既球場。

我地喺開波前大約 45 分鐘前入場，當時得大約兩三十人入左場。 我知東歐通常都係大戰先會多人入場，但唔會少人到咁呀嘛？ 好在臨近開波時人潮終於慢慢出現，連作客球迷都係開波之後先出現 ._. 今場波既主隊 Lokomotiva 喺首都只能活喺 Dinamo 既陰影下所以都唔洗預會有咩球迷。 反正作客球迷既出現帶黎少少驚喜！ 賽前大家一齊站立為剛去世既教宗默哀，作客球迷喺佢地看台前面仲掛起左支梵蒂岡旗，原來信仰喺克羅地亞係咁重要。

今場波係榜尾大戰，相若既水平既比賽又幾好睇，客隊喺上半場先射入一球，完半場前主隊追和。 出發賽睇過克羅地亞球場通常都唔會有賣熟食，怕會有人搞事會有比人搶野既風險。 今日除左有咸爆谷外仲有油浸香腸，好多香腸係一大盤油入面游黎游去，又唔係高溫油炸，只係低溫煮熟？ 買返入看台後就等個大隻佬過黎賣啤酒，睇住佢每次捧住大約廿杯啤酒比人瘋搶，仲要行去作客看台嗰邊幾次去滿足對家需求～ 咁就簡單解求左我地晚餐。

完場前客隊黎個絕殺以 1－2 完場，對面班球迷喺高聲慶呼下等完場同班球員一齊慶祝。 比賽後第二日翻新工程果然即刻開始，有一部份看台即刻被拆，睇黎真係有望幾年後返黎睇多一場波。