19.04.2025
德國足球乙組聯賽 第 30 週
SV Elversberg - Fortuna Düsseldorf
Waldstadion an der Kaiserlinde
賽果：1:1 (0:0)
入場人數： 9105 （1500 名作客球迷）
門票：季票

黎到季尾倒數第五場波，呢場突然變左第三對第四爭升班之戰。我地暫時企喺附加賽席位喺主場迎戰上季大炒我地既杜塞爾多夫，以近況黎講我地應該著數啲；但德乙實在太海鮮無人敢估賽果最後會如何。

今日亦都係倒數第二場主場賽事，來自 Bad Nauheim 帶黎近二十人黎助陣。 我地都早少少去村中心同其他人會合，感受多少少比賽日賽前既氣氛。大家十點鐘就喺教堂後既停車場集合，每人手持啤酒聽歌吹水。 呢個星期話就話係復活節連假，但今日星期六唔係紅日所以仍然可以製造下嘈音。 半個鐘後一行大約五十人一齊行上去球場，喺場外既小食亭再飲多杯啤酒先再去拎物資入場。喺場外佢地即場噴大字報，通知大家最後一場主場波會再次有 Fanmarsch 一齊由市集行去球場，朝早九點半集合，十點半起行！希望今年會有更多人一齊參與～～

後備席後面既 Block B 喺上場波之前已經開始左清拆工程，喺電視機場睇波既人只會見到一個清空左既看台，好快亦只會見到一個地盤，觀感上絕對唔靚。 希望擴建工程可以準時完成，就如球隊掛起嗰快大海報咁講：呢度將會成日數千名球迷既新家～

今日既客隊同上場一樣都係以紅白為主色，唔同既係今日門票售罄，第一次見到滿座既作客看台。 紅白同藍白喺陽光下睇落真係好靚！ 核心球迷入場後佢地就好快速咁掛起哂所有大旗，然後大家一齊等開波。 Block C 既參與度唔知點解奇高，終於洗出到主場既威力，多次多重聲波壓過 100% 參與度既 Fortuna。

兩隊波雖然都有份爭升班，但睇落都唔會以升班做目標。 Fortuna 上季喺附加賽領先三隊再倒輸三球最後升班失敗既惡夢仍然纏繞住班球迷，今季如果又再拎第三會有機會再對一方波琴，如果真心要再經歷一次同一個惡夢我估真係會有球迷心臟病發。 我地呢面就更加無壓力，大家只想踢好餘下幾場波，想隊波踢得好就會想贏波，如果贏到呢幾場升班就會係必然；我地又已經達成左原本既首要目標：護級，而家只希望大家開開心心健健康康咁完場～

呢個星期有一單令人有少少意外既新聞，作客贏漢諾威後 SVE 宣布效力左五年同我地一齊由地區聯賽升班上黎既其中一個功臣喺季尾約滿會以自由身加盟漢諾威。 乜又係你呀漢諾威？ 今季季初用一百萬簽走咗 Rochelt，而家又再免費簽走我地後防重心 T_T 但我地唔明點解會喺呢個時候走黎宣布，想恥笑佢加盟唔夠踢同排名低過我地既球隊？ 睇左咁多年波已經接受左球員來來去去既現實，所以佢要走我都無咩感覺，只係有少少不滿佢話「當漢諾威打電話黎既時候我就知道我一定要把握呢個機會…」， 呢句都無咩野，「…去終於可以加盟一隊真正既傳統球隊，以呢個球場作為主場同埋有呢班球迷作為我既後盾。」 我明球員去新球隊要講好多好說話，但我聽落覺得佢喺心底好睇唔起我地無傳統無歷史既一隊鄉下隊囉， 所以我祝福佢喺漢諾威既前程似 Rochelt 咁～ 遇到我地記得送下大禮～

上半場雙方互無記錄，但我地係完完全全壓住客隊黎踢。 今日最開心既係見到另一位升班功臣 Feil 終於有正選踢，呢兩季佢做後備多無咩機會表現自己，希望季尾呢幾場呢啲衛生波可以比佢有多啲機會，就選佢要離隊都可以幫佢搵到好人家落班！！！ 今場佢喺前場東奔西跑造左唔少攻勢，但春天有漢堡開始失分，我地都開始有永遠有隻腳擋波既時刻。 今日真係 1000000% 無運行，中柱都算，每次射門都有隻紅色腳出面….

下半場我返入 Block C，見到看台底有個著到身光頸靚既球迷（其實只係著得四正同好乾淨），我問其他人：喂 Schnellbacher 又咁得閒走左入黎玩呀？ 其他人好驚訝咁問下，唔知喎，佢幾時走左入黎？ 企喺佢身邊啲人話佢上半場已經喺度！！！？ 早幾個月佢喺 Block C 看台頂安安靜靜咁睇波，比我地發現左之後就被夾落黎。 睇黎佢試過想翻尋味，今日又再次低調咁出現喺球迷之中，我有定時望下佢確定佢唔係入黎淨係食花生，而係真係有一齊舉手拍手同唱歌。 嗚我真係好中意呢種肯融入球迷既球員！！！！

Block C 喺下半場既氣氛好到自己嚇親自己， 大家都喺 Kaiserlinde 睇波咁耐都未試過咁大聲，真係好癲！！！ 就算對方唔知點無靠住全場唯一一個機會就先入波，我地都無停過打氣，完全喺度享受自己。聽人講電視講波佬話呢個係佢職業生涯中見過最唔值得既入球 xD 幾分鐘後我地靠十二碼追和，將場內氣氛再一次推高，就連主看台既球迷都自己企起身跟住一齊拍手。 今場波既表現絕對係失兩分，但有一分我地都收貨～

賽後我地一齊唱 2022 既時候再次將最尾嗰句由 und machen einen drauf （好好享受）改為 und steigen wieder auf （再次升班），今日呢一分幫我地暫時保住第三位，要睇埋星期日賽程其他球隊踢成點。 黎緊連續兩個週末都係作客，下星期我地去旅客所以會缺席，兩星期喺紐倫堡再見～