12.04.2025
德國足球乙組聯賽 第 29 週
Hannover 96 - SV Elversberg
Niedersachsenstadion
賽果：1:3 (1:0)
入場人數： 35500 （267 名作客球迷）
門票：19,80€
作客漢諾威係我地史上第一次出戰德乙既比賽場地，喺度我地射入球隊史上德乙第一球同拎到德乙第一分。黎到第二季我地去到季尾先再黎作客，同第一場波原來已經過咗差唔多兩年！ 上季我地兩戰都和波，今季喺主場輕鬆贏波。 對方今年暫時仲保持住主場不敗身，呢個不敗身大部份都係黎自和波，睇黎今日我地應該要和波當贏波算。
星期六朝早起身感覺病病地，去程時三個鐘入面應該訓左兩個鐘； 好在尋晚漢堡終於喺主場輸波為德國帶來春天；去到漢諾威時氣溫已經升至大約二十度仲有太陽，按得住體內微微發冷既感覺！ 球隊喺賽前提供作客球迷資訊入面講到明球場附近本來用黎做作客停車場既大空地喺今個週末有春天嘉年華被佔用，所以我地可以將架車泊喺作客看台入口前面嗰條街。
當我地準備駛入條街時，保安話我地唔可以入去，要兜去另一條街唔知邊度搵地方。我地話球隊明明叫我地入呢條街泊車，佢就話有證先可以泊。 我地知同啲保安拗係唔會有結果，而且我地球隊都試過幾次比錯資料，諗住跟佢指示去第二度搵地方泊車。 呢個時候我地既球迷大使咁啱見到我地被趕走，佢即刻衝出黎問我地咩事，然後同個保安講數，最後搵埋警察黎終於放行。 入到條街有個入口係去 P1 停車場，門口個保安就話呢個係 VIP 停車場黎，作客球迷去泊喺條街既巴士後面啦。 駛遠少少就見到我地既球迷巴士就泊低架車喺佢地前面。
泊低架車之後就有兩個警察行過黎問我地係咪諗住泊喺度，我地話係呀～ 你路口啲同事叫我地同啲巴士一齊泊，佢地一臉疑惑樣咁但就話 okok 就走左去。 前面咁啱有另一架車剛剛泊低，呢兩個警察就趕佢地走叫佢地泊去後面，後來聽另一個朋友講，佢地諗住泊喺我地前面但比人趕走左。 總之我地就好好彩可以泊正喺球場門口 ._.v
過去兩星期喺德丙有兩隊大隊黎作客漢諾威二隊，一隊係 Dynamo Dresden 企滿左成個南看台上層，仲用黃黑布布置埋下層，反客為主整左個巨型 choreo。另一隊就係來自德荷邊境既 Aachen。 今日我地黎到看台四週都係黃底黑字既貼紙，仲有好多好有創意既貼紙好想帶返屋企留念。 我地今日就只帶左唔夠三百人黎作客，呢個數字喺德乙黎講的確係有啲失禮… 我地都唔明點解早兩星期去更遠既漢堡可以有五六百人，今日就少左一半。
數字黎講雖然唔靚，但係今日黎到作客既全部都係全參與打氣既球迷，淨係呢樣已經好過漢堡場波好多。 喺漢堡既看台入面，好多人因為嫌啲旗阻住視線所以企埋一邊，今日絕大部份一都自願企埋一齊集中一齊打氣！！！ 亦都解釋左點解我地寧願少啲人去打氣，都唔想有一大班花生友企喺看台內投訴呢樣投訴嗰樣。淨係以人數黎講，上季我地唔夠二百人黎作客，今日多左大約一百人係一大進步！
上半場我去左主看台影相，可以獨自感受下漢諾威既打氣氣勢。 今日咁啱撞正對方創會 129 年週年紀念，球隊亦都以親子同樂日黎吸引家長帶小球迷入場，只係估唔到最後都只得三萬五人入場觀戰，唔入場仲好，唔洗見到隊波點樣反敗～ 賽前對方講左兩隊波互戰歷史，佢地四戰 SVE 都未贏過波，多年前喺足總盃首圈比我地踢出局，上季兩和今季一負，今日既賽果又會如何呢？
開波十二分鐘對方先借球角入波領先，係呀， 又又又又又又又又又又係輸角球 -.- 好煩呀到底點解要有角球呢樣野？？？ 之後雖然有幾次埋門機會但我地都把握唔到，睇黎今日我地係要失分，對方應該可以打破不勝魔咒。下半場領隊喺開波前已經決定換人，換走中堅 Rohr 換入 Le Joncour，估唔到呢個後防調動成為今場贏波其中一個關鍵。
下半場我地唔知對方訓左定我地個個坐直進入 focus mode 開始認真打機，完全變左另一隊波。 後面好穩陣清哂啲波之餘仲係咁派到波去前面，個波多次喺禁區入面好似波子機咁彈黎彈去，入波只係時間問題。 十分鐘後 Baum 比個靚直線加 Asllani 走個靚位成功送個波入網追和！！ 十分鐘後佢再喺禁區頂超腳射破網返超前，呢腳波個波未入網我就已經慶祝左～～ 最後十分鐘我地淨係怕會失角球，捱到尾段補時四分鐘… 點知出現斷腳慘劇。 我地球員 Stock 雙腳飛剷追波雖然清走咗個波，球證亦都只係吹角球比對方，後面先發現呢腳食正 Jessic Ngankam 既死腳….. 夾硬拗斷左。 我地班球員一開始未知咩事個個奔去禁區一心準備開角球，主場球迷就超嬲狂噓佢地先知出事。
後來主場球迷好嬲點解 Stock 連一張黃牌都無，勁多人鬧佢遲早會有報應。 唉～ 如果呢啲事發生喺我地球員身上我都會鬧爆，所以我都唔怪人地。 但始終無人會想突登傷害其他球員，意外呢啲野無人想，只能夠希望對方早日康復！
比賽重新開始後，Asllani 把握到最後一個機會，喺龍門前舞黎舞去入波戴帽！ 我地慶祝完先發現旁證舉左旗，唔入都唔緊要既，反正都領先緊。 個個跑返去中線等龍門開波，球證就吹停左話要等 VAR，最後改判無越位，最後贏 1:3。 Asllani 超開心向住作客看台狂奔慶祝，今次係佢職業生涯中第一次完成帽子戲法，難怪佢咁激動！！！！ （同時有啲主場球迷又好憎佢啱啱先有球員重傷離場佢轉頭就咁開心）
睇完上半場既表現真係無諗過我地可以追和甚至反勝，拎左呢三分我地彈左上第三，突然間又有份爭升班。。。。 回程時我地喺路上去食麥當勞慶祝，返到屋企仲有時間沖埋涼坐喺流化等星期六晚德乙開波，高路斯 25 年來第一次重返母會，帶住紐倫堡喺自己既舊主場贏波，幫我地保住第三位。
拿，我唔會話唔想升班，但如果有得㨂我想一係上埋第二直接升班，一係啃頸四光榮再續德乙之旅，唔想排第三要踢多兩場附加賽。。。。
