06.04.2025
德國足球乙組聯賽 第 28 週
SV Elversberg - SSV Jahn Regensburg
Waldstadion an der Kaiserlinde
賽果：6:0 (3:0)
入場人數：10786 （300 名作客球迷）
門票：季票
今日黎作客係我地最怕既想搶分護級既球隊，雖然對方幾乎篤定降班，但呢啲球隊最中意迴光反照突然醒覺，上場佢地就喺主場反勝紐倫堡，點知佢地會唔會乘勝追擊贏埋我地架？
對方今季踢左十八場波只贏過五場波，作客從來贏過只有一分，淨係睇呢堆數據我地理應輕鬆贏波。上年去作客時我地都以為 SSV 啱啱先硬食八球理應我地可以容易拎分，點知比佢地入到一球然後死守完場，總之我地就好中意送分比人…. 總之…. 我地唔敢太樂觀！
客隊今日只帶三百人左右到場，佢地有幸成為第一班搬去新既臨時作客看台，喺正我地對面！ 下星期開始，後備席後面既臨時看台將會清拆，然後最後一部份既擴建工程就會展開。 即係黎緊一年喺電視上會見到十分開揚既風景… 作客球迷入場後喺看台前掛起佢地既紅旗橫旗，雖然人少聲細，但驟眼睇落都唔錯。
喺場外，球迷組織最近搞籌款活動，希望可以將善款捐比一個幫助弱小家庭既組織。 喺網上搞左個投標活動，由 Schnellbacher 捐出簽名球衣；另外球隊都捐出左一頂有各球員簽名既帽，仲有好多球迷喺場內捐款，大家都希望可以為地區出少少力。
球隊將今場波列為 Kids Day，喺臨時看台清拆前最後一場波用黎做家庭看台，等啲小朋友可以入場睇下 SVE 同吸納下新血。 賽前已經有好多活動，當中包括去學校叫啲小朋友畫出佢地最中意既球員，有部份會被印喺場刊，畫得最好既仲會取代比賽當日喺大電視播出既球員照片！ 我想講啲小朋友畫畫仲好睇過我 T_T 貼堂嗰啲真係畫到球員既神態出黎，好勁！！ 比賽當中仲有一位叫 Raphael 既小朋友負責拎起技咪黎宣讀出場陣容同比數，做得好 pro，完全無怯場!!!!
賽前幾日突然傳出消息，一位球隊職員突然離世… Janine 本來係同大家一齊喺看台睇波既球迷，喺 2015 年開始成為球隊傳媒部既一份子，喺平日佢任職老師，週末就會去幫球隊手。 佢離世時只有 35 歲… 開波前大約廿五分鐘，球隊先同大家一齊默哀記念 Janine。 呢個時候我地熱緊身既球員喺看台前一字排開，客隊球員都暫停熱身，場內小朋友都一齊安靜。 Block C 看台前掛起 Ruhe in Frieden, Janine 既大字報，後來開波後喺看台內舉起另一句大字報： 即使生命中既太陽要落下，你仍然會喺大家既記憶中發光。 作客看台一開始無留意到就如常打氣，當佢地理解到發生緊咩事就即刻暫停打氣。等到 Block C 既煙火完左，兩邊就專注返場波。
Block C 今日大聲左好多，應該係因為作客看台搬左去龍門後面，喺主看台終於唔係食正作客球迷既打氣聲唔會咁容易蓋過 Block C 聲量。 喺主看台只係間唔中聽到 SSV 既聲音，但係聽唔到佢地唱緊咩歌。 不過雖然佢地聲細，但都睇得看台內既參與度好高，差唔多個個都會舉手同舉頸巾！ 試諗下自己隊波降硬班都仲會跟黎作客，呢啲先係真球迷！
估唔到我地今日完全唔留手，上半場先入三球～ 第一球勁流暢咁由龍門開波幾腳組織上去，個波傳到去右路禁區邊就已經諗：呢幾腳波一定要用入球黎完結，果然由 Zimmerschied 先射入！第二球手球十二碼由 Sickinger 射入，完半場前 Asllani 終於破入球荒開齋射入今場波第三球～～
呢個時候 SSV 球迷絕望到選擇無視場波自娛，下半場開波後佢地喺看台內分左兩邊。唔知喺邊球搵到個波佢地就喺度打排球，打完排球就成班除鞋將對鞋套上手再集中打氣打左一陣。 呢個時候 Sahin 同 Fellhauer 已經各自入多一球波，但班作客球迷繼續自娛。 後來仲無啦啦排隊搭膊頭喺看台入面玩貪食蛇。 我地喺看台內都睇得好開心，啲人開始喺度唱一首同 Bolognese 有關既歌，心諗同肉醬有咩關係？ 原來係 Polonaise sosad 咁就喺球場學左個新字～ 啲球迷最後仲 let’s pretend we scored a goal 無啦啦慶祝自己隊波入左波。。。 我地唯有幫下佢，Asllani 射入今場第六球埋齋～
完場後班作客球迷仍然喺度自娛，班球員好無奈咁行去佢地面前企左一陣見自己被無視就走左。 我地既球員就如常繞場一週黎到 Block C 前一齊唱下歌拍下手就完結呢一日。 咁又破左自己喺德乙最高入球紀錄，拎左呢三分我地無啦啦又有份爭升班 ._.
