29.03.2025
德國北部地區聯賽 第 28 週
VfB Lübeck - FC Eintracht Norderstedt
Stadion an der Lohmühle
賽果： 2:3 (1:1)
入場人數： 2931 (約 50 名作客球迷）
門票： 19,50€

上年兩次北上去漢堡都好忙所以無機會去左週邊地方，今次星期五睇完波我地有成個週末可以做其他野，終於可以去捕左好耐既 Lübeck 觀光同睇波～ 由漢堡去 Lübeck 可以搭普通 regional express 火車，每半個鐘有一班，車程大約 45 分鐘。 如果春夏天黎到可以搭多幾個站去到 Travemünde Strand － 沙灘！要留意既係班火車分兩部分，前面嗰架先會去沙灘，後半車卡只會到 Lübeck。

落車之後出站向舊城區出發，行大約五分鐘已經見到第一個地標 Holstentor，護城門！ 離遠見到一大座野企喺度，兩邊向內彎既巨型建築物，好靚！！！ 我又特別中意紅磚建築物，同大家一齊一過左馬路就企喺樓梯係咁影相。 過左城門之後記得調頭望下佢內側，完全唔同樣～

Lübeck 最出名手信係受歐盟地理標示保護既 Lübecker Marzipan，但，我連聞到Marzipan 陣味就想嘔。 Marzipan 係一種由杏仁同糖製成既甜品，聞落似杏仁露。以前唔知咩係 Marzipan，食落口之後吐都吐唔切，黎左德國咁多年我間唔中都有再次挑戰下但真係頂唔順。最討厭係佢地好中意配朱古力，好多所謂既朱古力蛋糕唔知點解會有層 Marzipan 喺入面，要好小心㨂先唔會中伏。

我地喺市內行左一陣去到北門，然後慢慢行去球場。 經過住宅區去到商店街，行左大約廿分鐘就去到球場門口。 好耐無睇過地區聯賽，差啲唔記得左睇波係可以去到門口先買飛入場。 天氣最近開始回暖，今日繼續藍天無雲，氣溫大約 14 度。 我地坐喺主看台對住個大太陽可以唔著褸曬下太陽～

VfB Lübeck 喺武肺期間兩次升班上丙組，可惜兩次都係升降機跌返落地區聯賽。 佢地同 HSV 係盟友，早一日佢地都有入場幫漢堡助陣；佢地既敵人係同州內既所有其他球隊，最主要係而家喺德甲既基爾。 不過喺多年前基爾愈踢愈好脫離低組別之後，兩隊波就只能夠盼望喺盃賽再次相遇。 唔知點解我好留心咁聽佢地宣讀陣容，發現主隊有兩個前 SVE 球員，正選上陣既 Luca Menke，同喺球備席有我地曾經既球王 Moritz Göttel!!! Menke 我淨係記得佢個名，後來睇返佢只係踢左一季，而 Göttel 就喺我啱啱開始睇 SVE 時踢左兩季。 佢係嗰種唔會放棄亂咁訓喺地既熱血球員，所以好受球迷歡迎！

自從近年兩次既升班之後，球隊就開始慢慢改建球場。球迷組織一直以來都係集中喺 Pappelkurve 打氣，而家佢地終於有瓦遮頭令打氣聲更加強勁～ 客隊 Norderstedt 只係於於聯賽榜中下游，本來就唔係啲咩大球隊，今日亦只帶左五十人左右，全部都坐喺主看台既遠處。 本來以為作客看台無開放就無人黎作客，等到客隊射入第一球波見到背後好多人彈起身慶祝先知原來有人黎～ 近完半場時主隊獲得十二碼追和，下半場仲靠一個世界波成功反超前。無諗過最後會再反輸 2:3!!

完場後我地行返去火車站搭車返漢堡，夜晚約左個香港朋友食飯聚舊。 之後去左一間叫 Izakaya by Dokuwa 既立食居酒屋飲多杯，入面好迫但氣氛好好！ 叫第二杯野飲既時候日本人老闆娘問我地邊度人，我地話香港～ 佢就好驚訝咁指去另一班人話佢地都係香港人喎！！ 然後我地兩班香港人就 join 埋變成一班香港人！ 企左成晚最後三點先返到酒店 ._. (今晚轉夏令蝕左一個鐘）

星期日朝早天氣突然狂風暴雨，同朋友飲多餐茶就去搭地鐵遊車河，好好彩後來開始停雨我地可以把握時間去河邊行下！食多件蛋糕同買多件 Franzbrötchen 先搭火車返法蘭克福。今季暫時仲有好多未知之數，漢堡升班下年就無機會再黎，但上年可以跌基爾或者聖保利落黎，又或者要再去漢堡三次？