28.03.2025
德國足球乙組聯賽 第 27 週
Hamburger SV - SV Elversberg
Volksparkstadion
賽果：0:0
入場人數：56328 （1000 名作客球迷）
門票：19,80€
幾個月前就訂好左作客漢堡既行程，星期五一早出發到星期日夜晚回程，無論賽期最後定左喺邊日我地都唔洗擔心！去到賽前，漢堡今季保持主場不敗再加近期狀態唔錯，我地就兩場不勝，好笑既係對方球迷以呢場波既賽果黎判斷今季升班既命運，個個都話「只要我地贏到 SVE 既話就可以篤定升班！」 突然間覺得自己好重要，竟然有份參與「決定」漢堡既末來。 上季首次對戰對方以不敗身作笿輸波，返到主場以一球僅勝。 今季再次黎到作客被大炒慘敗… 另一邊亦有人表示漢堡要好小心同認真應戰，仲列出好多數據黎證明點解 SVE 唔係弱隊，佢地唔講我地都唔知原來今季作客只失八球波！！數據上睇落係對方有主場之利理應贏硬，但對方最怕既春天啱啱來臨，遇上我地呢隊奇巴反而仲擔心！
星期五我地喺屋企食埋早餐先出發去火車站，搭三個半鐘火車到達漢堡後就先去酒店放低行李。 今次間酒店門口有架巴士可以直到球場，落車後要行大約十分鐘先到球場門口，入場後就即刻同球迷大使會面～ 今次佢準備左工作證比我可以入場邊影相，可以自由出入，只係同其他世界盃球場一樣要由外圍繞個大圈先有出入口。 佢話半個鐘後黎接我，我就去買個魚包醫肚先。
今日食左三餐都係包好唔開心，唔明點解德國人可唔餐餐食包。 個炸魚包仲要無咩味，我要迫自己啃個乾包。 我包都未食完個球迷大使就出現返話帶我入場，我就懵下懵下咁帶住個包入到場邊同時心中驚嘆呢座可容納近六萬人既球場。入到場邊佢同我講解話個個都好 chill ，喺龍門後面我想點都得，然後就叫我自己顧自己。我自己一個企喺場邊周圍望既時候，對面就先黎個賽前舉手咆哮下，同時佢地隻吉祥物咁啱黎到我面前，佢叫停啲小朋友比佢跟北看台打個氣先，笑死～
我先奔返入場隊返杯啤酒先，如果唔係真係會食包啃死。 等到班球員練完波我返入場邊開始搵下角度影相。 我想講上季去鼠左去主看台山頂個角度靚好多，今日企喺場邊隔左幾個網咩都睇唔到，都係要去到主看台底先好少少。 球員入場後有個保安阿頭黎話我唔可以影相，要著龜背先可以影。 我話我無龜背喎，佢話咁我唔可以影，我問佢我有證點解唔可以影，佢話總之有龜背先可以影。我問佢可唔可以搵球迷大使黎溝通下，佢就好驚訝態度180度轉變咁話，哦！！ 你係作客球迷？ 咁你的確唔洗龜背，但你只可以喺龍門後面走動，唔可以企呢邊。 然後就笑住咁送我走～
去到龍門後面過左一陣又有另一個人黎同我講無龜背唔可以影相，我係咁 doch 佢話我啱啱先同你同事傾完佢都話唔洗龜背喺龍門後就可以影，佢又鬼打牆咁話總之無龜背就唔影得。 到佢終於肯認真睇下我張證見到上面寫住我係 SV Elversberg 球迷攝影就恍然大悟變左第二個人咁話我啱，我係可以喺度影相，然後提我留喺呢邊唔好走去對面，我話唔會啦未死過咩，佢話有人會偷偷走過去所以都要講聲。雖然佢地未了解我身份之前用既語氣唔算有廿善，後來佢地都好有禮貌咁解釋返，所以我唔會將佢地寫入我既小氣簿～
不過我只可以講喺場邊真係麻麻地，最差係連看台內既氣氛都唔掂。 漢堡既主場氣勢真係好勁，完全無停止咁用聲量攻擊，導致我地喺作客看台前既聲量完全帶唔到去後面。 另外看台入面有好多花生友完全不受控，唉～又要講嗰句，真係寧願得兩三百人去作客！上半場互無入球後我就走返入看台，親身感受到看台內既無力感。 有段時間後面有人自己開始帶歌，我地都唔想怪佢地，因為後面其實唔太聽到前面唱緊咩，有時甚至連鼓聲都聽唔到，但唔多唔少都有啲失望同失落。
講返場波，場波雖然無入球但勁刺激，主隊當然不斷搵方法去攻去破網，但今日我地後防上哂身守得好好，連幸運之神都企我地嗰邊有門眉擋左兩個必入球。 而我地都唔係得個守字，有幾次極有威脅埋門都比對方擋入。 真心覺得一分係合理結果！北看台喺下半場放左幾次煙，開波時佢地安靜地為一位剛離世既球迷默哀，之後就（又）向警察抗議成日插水球迷事務，最後就有大字布為爭取 Ultras 既自由。
漢堡好多球迷又開始擔心春天係咪真係正式開始～完場後有一種莫名既失落感，最主要都係接受唔到我地喺看台內既表現，一方面要安慰自己同上季比又再多左三四百人山長手遠黎，另一方面又會問點解咁多人都可以無聲。 拿，雖然忍唔住講呢啲悔氣說話，但我地其實真心覺得自己可以黎到作客係一件好威既事！！！！
對啲球員黎講又係一個難忘既體驗；雖然上年已經黎講，但今日主場門票售罄，漢堡出盡哂法寶去贏呢場波迫到我地有氣無得抖。 睇得出主場球員係 chur 到最後一刻，我地班球員去到尾段有啲頂唔順，個個變哂草被人一撥就彈開或者跌低。 比著我係漢堡迷一定勁火滾，但好開心見到啲球員終於學精咗識得拖下時間唔洗下下都窮追～ 最後可以史上第一次作客 Volksparkstadion 取得寶貴既一分！！！
仲有一樣好煩既係場外保安既安排，上季佢地唔比我地揸車到場外，今次終於可以有三架車入去禁區，但只可說將架車泊喺離五分鐘路程既地方。距離唔係問題，但條路係好多主場球迷都會行過。離場時條路係無路燈，完全睇唔清身邊到底係咩人，啲警察亦只係離遠咁跟住我地行。 真心唔明點解佢地會覺得由我地拎住啲物資同其他人一齊行係會安全？ 好憎黎呢度作客！！！求下佢地快啲升班等我地唔洗再黎！！
