15.03.2025 
德國足球乙組聯賽 第 26 週
SV Elversberg - SC Preußen Münster 
Waldstadion an der Kaiserlinde 
賽果： 0:1 (0:0) 
入場人數： 10157 （800 名作客球迷） 
門票：季票

又對最怕既升班馬，真係唔知點解會遇弱愈弱完全企唔穩陣腳。 最嬲係又！係！輸！角！球！

上場波對凱莎羅頓拎到一分基本上可以宣布護級成功，剩返九場波贏輸都唔太重要。 咁當然可以贏波我地都想贏波，但起碼唔洗有壓力場場都分勝不可要搶分。 有得升班我地都上升班，但德乙真係好正，開波時間靚；無週中比賽；對手絕大部份都係傳統大球隊…

望下今日既對手又係連升兩級黎到乙組，賽前得 23 分喺榜尾掙扎。 如果我地升左上德甲又會唔會好似佢地或者基爾咁場場輸波令到士氣大減？ 不過諗咁多都無用，反正都唔到我地決定升唔升班，只不過係可以想像既空間～～

SVE 之前同球迷組織溝通過話今年想同贊助商再整頸巾免費派比球迷；上季佢地整左條印左勁多廣告又唔以球隊主色為主既頸巾，我地花左一段時間先令到啲球迷拋棄嗰條垃圾頸巾； 所以今次我地同球會講：你要整可以，但要記住球隊係黑白色，贊助商既標誌唔可以蓋過球隊名或者 logo，如果好似上季嗰條咁既樣我地會燒左佢。 今日我地見到好多球迷戴上未見過既頸巾，好簡單頭尾係 logo，中間係黑色相間寫住球隊名，我地唔見有人喺 Block C 門口派，以為只係出左新頸巾。

到我去主看台既時候就見到有幾個工作人員向入場球迷喺度派頸巾，我問佢拎左條～ 有 freebies 無理由唔拎～～ 球隊果然有接納球迷意見，條免費頸巾有兩面，一面就好似普通球迷頸巾咁，另一面係黑底配白字中間細細地印左電力公司個名。 呢間電力公司 logo 係橙底白字，佢地無加橙色落去，睇黎真係肯專重球迷既意願，條頸巾亦都出奇地好睇～ 賽前播會歌既時候多左好多人一齊舉頸巾！

Block C 對面題新看台𠿬過去幾場波逐步開放，今場波終於下層全部開放。 下場就會將作客看台搬到最右邊既部份，之後就再拆去後備席後既臨時看台，慢慢開始工程既最後一步！客隊今日只帶大約 800 人黎作客，以佢地既球迷組織規模黎講有少少失望，仲要車程唔算太遠都只係得 800？ 下場波我地星期五晚作客漢堡可以有近千人喎！ 不過佢地雖然人少，但聲勢唔錯，有部份時間仲好過我地。

作客球迷仲準備左一個好靚既 choreo， 喺看台前拉起大字布大意係指會為球迷追隨至全國～ 看台內就有好多塊綠銀色旗仔，等到球員進場時分別向天噴綠白碎紙好浪漫！！！ 之後仲有綠白煙～ 可惜今日好qqqqq 大風，啲煙好似就吹散哂。

唔知點解 Block C 內個個都無咩興致咁，起歌既時候頭兩 round 都係最大聲，今日我唔係聽唔到佢地唱，而係聽到個個勁 hea 咁唱。 好可惜大家既表現好多時候都受場上表現影響，今日久久未有入球個個就集中唔到，又或者大家真係唔 care? 下半場反而好少少，去到某個角球我地話準備又失波…. 真係可以必中。 又失角球。

點解每次對弱隊既時候都係對方有運行，明明有幾次見到個波就快入網但次次都好似怪風出現令個波偏離軌道。 最後嗰十分鐘有兩三個必入機會都把握唔到。 對方好開心咁同球員慶祝，我地就只可以鼓勵下自己既球員。呢兩日突然又凍返，可能因為咁樣班球員又跌watt，只係想快啲完場好啲離開返去溫暖既屋企。

輸左呢場個感覺就好似被叫醒唔好再幻想升班上甲組，安安心心留喺乙組真係仲好！ 反正我地個球場都未擴建完成～兩星期後我地作客今季主場不敗既漢堡，佢地暫時穩企榜首，唔知我地會慘敗而回定係宣布春天正式來臨？