07.03.2025
德國足球乙組聯賽 第 25 週
1. FC Kaiserslautern - SV Elversberg
Fritz-Walter-Stadion
賽果：1:1 (1:0)
入場人數： 49068 （4500 名作客球迷）
門票： 33€
德乙所有既對手之中我最憎就係去作客凱莎羅頓，唔係因為隊波，而係因為佢地個球場位於 Betzenberg 山上面，每次行路上山我都會話 Scheiss Betze 呢世都唔會再黎睇波，然後每次都死死地氣爬上山。 本來諗住今日會泊低架車喺市外既 P+R 停車場搭穿梭巴士上山，但因為我地準備左 choreo 所以要早三個鐘就到球場….
上場大炒哈化柏林拎多三分之後，基本上我地可以話係護級成功，但過去數據表示要 40 分先最穩陣，所以我地一直以來都係以拎到 40 分為最重要既目標。 今日既目標亦都係好簡單，希望可以係地區班霸主場拎到最少一分！
凱莎羅頓市其實係我地每次返去 Saarland 既必經之路，今日我地就好似平時返去主場睇波咁，只係路程短左大約三十分鐘。 由 Elversberg 出發既球迷就只需大約半個鐘就可以到場，球隊同德鐵一齊安排左一班特別班次接啲 Saarländer 去 K-town 睇波。 從來都無諗過我地可以有機會享受到呢啲特別安排，但今日講緊係超過四千人去作客，正確黎講作客看台入面既 4422 張門票全部賣哂，係今季第四次破球隊作客紀錄。 第一次係週中 1900 人作客利華古遜；第二次係杜塞爾多夫既足球同樂日，3000 張免費飛全部被換領，但現場睇落唔似有咁多人；第三次係真係有 3000 人買飛去科隆作客，今次就係鄰居打比戰。
二年前仲喺德丙既時候主場入場人數四千人都唔夠，上季喺暑假星期五上山去作客有 1800 人已經覺得好震撼；今日場波又再被安排喺星期五晚上演，本來我地都無抱太大希望會有好多人去隨隊。最後門票開售既第一日下層既看台好快就賣哂，去到賽前幾日主隊確認作客看台門票售罄。 上季其實我地都企滿左企位區，但今次我地號召大家買座位飛等我地可以睇落中間啲，唔係淨係喺邊邊。
星期五晚既德乙賽事六點半開波，我地大約四點鐘到達球場門口，當時已經有幾架球迷巴士到左，有好多人喺門口排緊隊等球場開門入場。 地上有幾堆 choreo 相關既物資，係我地第一次準備一個咁大塊既海報 （仲要係作客！）。 由於我地預先申報左，主隊就安排人手聯同警察黎一齊檢查我地既物資，喺球場旁邊有個假草場，我地其中二十人可以入去打開啲海報比佢地檢查係咪符合申報資料，同時警察就放狗去聞我地有無收埋 pyro 係啲物資入面。 檢查完大家就要一字排開，手上拎住波飛既同時比佢地搜身，好似比人拉左要審犯咁。 搞左十幾分鐘終於可以拎啲野看台，一大碌既膠布橫跨整個作客看台台底，一個二個好忙咁安排好陣間所有既行動，同時又好緊張好擔心會出錯然後出醜。
入場後我同球迷大使溝通好開波前十五分鐘喺場外會面，然後就會帶我入去場邊影相。 諗返起上季，作客凱莎羅頓係我地第一次開始同球隊同對方溝通想安排可以入場邊影相，當時同今日一樣可以免工作證入場，但只可以喺有限範圍內影相，開波後十五分鐘就要離開。 嗰陣佢同我講唔可以影球場，淨係可以對準作客看台影相；今日同一條友就同我講：你知 pyro-regel （pyro 規則）架可？我知佢想講咩，第一次聽係作客科隆個阿叔同我講如果我地放煙就唔可以影。 今次條友就一樣話只要作客看台一放煙就即刻唔可以再影。 我 okok 。
去到場波佢同我講可以去到某一條線影相，個位係大約龍門同六碼線中間，我問可唔可以比我企遠多少少，我地有 choreo 我想可以有個好啲既角度，佢都肯比我行多幾步去到大約十二碼點既距離。 今日佢無同我講唔可以影球場，咁我就光明正大影左幾張又真係無比人話喎。 再望返我地作客區，看台前後已經打開左大字報：Es geht nach vorne nie zurück, die SVE ist unser Glück。 呢兩句係我地新歌之中既其中兩句歌詞，意思係指我地只會向前唔會後退， SVE 係我地既快樂之源！ 球員入場時，看台內由底向上拉開一整塊大布，好簡潔清晰屬於球隊顏色既黑白底配上一大大大大大個球隊會章。
我揸住相機係咁影相，突然間就有兩個大隻佬衝埋黎夾住我推我走，我唔記得 exactly 佢同我講乜但佢大約係咁有人張煙唔准再影，心諗，下？？？？我完全唔知已經開始左。 然後佢話要睇我相機要我 del 相，但我相機乜都無影到；然後佢話要睇電話，啲相全部都係影緊全個看台，我問佢邊忽有煙？ 佢指住最後一張相既右下角有一枝啱啱點著既火，雖然嬲嬲地但都要讚下佢好金睛火眼，del 左之後佢要我去埋垃圾桶 del ，然後就踢左我走返去看台。
好在提左大家比幾分鐘我起碼影到個 choreo 先，但突然咁樣比兩條友夾我走真心好錯愕。 同時我都唔明用意喺邊，話就話係特別安排我入場邊，但我都有比錢買飛入場架，球場內仲有 49000 人個個都可以任影，唯獨我唔影得仲要咁樣比佢地夾走。我 del 左嗰兩張相仲要係電話用左 0.5 zoom 黎影，唔放大都唔會知係火黎。 後來先知原來個 pyro 好細，白色背景配白火係一個好差既配搭，十幾條煙又痴埋一齊一啲都唔好睇，我影唔到都覺錯過左啲咩 xD
最後波都未開我就已經返入看台，唔洗驚狂奔途中 miss 左入波 ._. 雖然呢兩張無咩特別唔太重要，但之後都比人話我唔應該比佢地睇電話，因為佢地無權咁做；就連警察想查電話內容都要有搜查令先可以。 唉，諗返轉頭我都希望自己企硬啲，但當下我相又無得影，波又無得睇，淨係想快啲返入看台，反正只係兩張連影左幾下既相，後來睇返我仲有張都有火，算係小勝利 ._.v 另外我地有個網上識打過幾次招呼既凱莎羅頓同鄉攝影師，佢用佢既專業相機幫我地影左好多靚相仲比我地拎黎用，超感激佢！！！！！
凱莎羅頓早兩場對漢堡輸左，但表演算穩定能夠一爭升班之位，賽前喺聯賽榜排第二。但你知德乙好似個個都唔想升班咁玩海鮮波，上場贏完榜首可以下場比榜尾大炒，今日無人敢拍心口話邊隊可以贏波。 上半場主隊壓住我地黎攻，多攻勢又守得好，我地無咩埋門機會，去到近完場前對方既球王 Ache 喺左邊禁區瞄準死角入波； 今日最唔想聽到既就係主隊既慶祝聲….
上半場既表現令大家叫自己慢慢接受輸波既事實； 當時我企喺下層看台最頂，坐喺度面既人大部份都係老人家或者一家大細，佢地最多只係跟住拍手無咩聲音。 看台底既聲量又只係一般般，對面西看台既聲浪實在太強，佢地一用力唱就蓋過哂我地，人多蝦人少！ 但我地都有一個好值得驕傲既時刻，就係當我地上下看台互叫 SVE 既時候， 西看台用 Hurensohn 黎回應，代表佢地聽到我地既聲音！！！？ 哈哈～～ 賽後有啲主場球迷話我地人多但聲量好細，完全比唔上其他得兩千幾人黎作客既中型球隊。 呢樣我地都知，我地之前未有機會學下點樣控制幾千人…
下半場唔知點解氣氛好左好多，我地提醒其他人落後就要更落力打氣。 我地改用啲簡單啲既歌，等多啲人可以一齊跟住唱，估唔到真係有效，仲成功比我地追返一球！！！！又係一氣呵成由龍門 Kristof 傳波比企喺左後既 Le Joncour，然後佢大腳放個波上前，Damar 接到個波入禁區就射入追和，簡單直接。 尾段我地多左好多攻勢完全係兩隊波咁，可惜差少少運氣先可以反勝。
不過，我地最終如願喺 Betze 拎到今季第四十分，護級成功！！！！！！！ 賽後等到球員黎到看台，佢地雖然無得忘我慶祝，但佢地都黎到接受我地對佢地致敬，啲球迷個個都當自己贏左波咁瘋狂鼓掌。 睇得出班球員企喺看台前無表情唔係因為唔開心，而家喺度享受企喺四千幾人既看台前既時刻。 今季仲有九場波，我地唔洗擔驚受怕要降班，一於平常心咁 nach vorne gehen~
