02.03.2025
德國足球乙組聯賽 第 24 週
SV Elversberg - Hertha BSC
Waldstadion an der Kaiserlinde
賽果：4:0 (4:0)
入場人數： 10607 （約 1700 名作客球迷）
門票：季票
今個週末喺德國西南部大份地區都進入狂歡狀態，最出名既係科隆 Karneval，緬恩斯既Fastnacht，而喺 Saarland 就被稱為 Fasching。呢三隻字其實都係講緊同一樣野，就係倒數進入復活節前既四十日。會慶祝既地方都會有一連幾日既大型巡遊，民眾就會裝扮上街一齊玩。 上季我地要去作客，今日就喺主場迎戰無呢個傳統既首都球會哈化柏林。
又一次既鄉下小村莊對世界大城市，兩隊波既三次對戰既賽果都係十分之慘烈。 首次出戰奧林匹克運動場我地喺嚴寒下慘敗 5:1，之後兩次我地都對佢地入四球贏波，分別喺主場贏 4:2 同第二次作客贏 1:4。哈化柏林呢排狀態麻麻已經連續五場不勝，有啲擔心佢地會借我地黎出氣刷信心。。。你知我地隊波最中意就係鋤強扶弱 ._.
踏入三月，日照開始變長同埋天氣開始穩定，出哂太陽咁睇落好暖但唔係被曬但仲會覺得凍。 最慘個太陽曬住作客看台，Block C 同主看台都仲係凍冰冰。 好在我無比個太陽呃到，有著夠衫先去球場！去球場路上見到大大小小既熊貓同好多彩色人… 比人問我套衫喺邊，我只能答佢地我今日既扮演角色係球迷～
哈化柏林既球迷今日要橫跨成個德國黎到作客，路程係差唔多七百公里，唔計休息都要花最少六個鐘先黎到，喺星期日既比賽日佢地都可以企滿成個作客看台真係好勁。當中有唔少早一日去左睇佢地既朋友 Karlsruhe 喺主場贏三分先再過黎睇第二場波。 班核心球迷喺開波前大約半個鐘到場，佢地喺看台後掛起多塊代表柏林市既紅白柏林熊旗，然後喺中間同前面掛起代表球隊顏色既藍白旗，成個看台就慢慢比佢地染成藍白色。 喺 Fasching 期間其中一個應節食物係沙翁，喺德國各地都有自己既叫法，呢度我地叫做 Berliner。 今日喺場內因為 Fasching 可以以 2.50€ 食到 Berliner~ 咁啱對手又係來自柏林可以食字，我地一於就食硬佢！！！！
開波後，作客看迷就好似喺主場咁大家膊搭膊一齊搖住熱身，然後一齊大聲唱出 Hertha BSC 為呢場波揭開序幕～ 彩色既 Block C 一開始既聲量都被柏林人蓋過，好在去到第十分鐘 Neubauer 係後場黎個靚傳比通哂去到前鋒 Damar 腳下，佢由中線起步去到禁區將個波挑入龍門，又一次對住柏林入波幫我地射入第一球！ 呢個時候大家更加落力打氣… 幾分鐘後隊長唔知點樣又搵到個波喺左邊禁區頂起腳射入第二球。
我仲有少少領先兩球被追和既陰影，總係覺得領先兩球先最危險。 十分鐘後喺右腳有個功勢由 Zimmerschied 笠射破網，打破兩球魔咒，四十分鐘都未到就領先三比零！！！！！作客看台呢個時候已經開始靜止，啲旗全部都跌哂落黎…. 佢地決定停止打氣。 今日係第一次開波半個鐘對方球迷已經放棄唔再浪費自己既精力，另一方面主場球迷當然超開心，個個開始大叫 Fasching 既口號 Alleh hopp! Alleh hopp!
去到近完半場前我地再桶對方多一刀， Sahin 射入十二碼，以四比零完上半場。 國內各地傳媒都急住報導呢場「慘劇」，講下哈化柏林點樣比一隊鄉下隊蹂躪。半場時喺場邊有個訪問，原來拜仁名宿艾爾巴 Giovane Elber 今日黎左觀戰。 一開始聽到佢在場既時候我以為佢係黎睇哈化，但原來佢地受到我地既主贊助邀請黎睇波；佢話好開心可以睇到場好波仲祝我地黎緊升班，笑死。
Kaiserlinde 既看台喺下半場進入狂歡狀態，間唔中就有人帶起大叫 Alleh hopp! 然後就全個球場一齊舉手跟住叫，雙方球員都好似喺度踢熱身賽咁想盡快完場算。 柏林自知無力追和，就算入到一球波都無咩關係； 我地既目標就變成要守住連續四場不失球既紀錄。
估唔到今日既結局會係咁完美，大炒 Big City Club 四粒仲要保到 clean sheet，完場後大家仲可以出街慶祝 Fasching。 我地慶祝既同時，班作客球員喺中場圍圈反省，同時班作客球迷極速執哂啲野離場，連鬧都無氣力鬧班球員。 賽後睇網上既留言，幾乎無人提過我地隊波，全部哈化柏林球迷都只係好嬲自己既球員點解可以踢得咁差，好似完全無勝欲咁。 輸埋呢場佢地同降班附加賽席位只係相差四分，堂堂一隊首都球會而家竟然係要擔心要降班落丙組。 當中有唔少好好笑既留言，例如「 Elversberg 全村人都坐唔滿奧林匹克運動場既東看台，但佢地就搵到十一個識踢波既人。 」 「我地係咪搵左臨時演員今日黎扮球員？」
其他球迷又開始擔心會唔會最後係我地升班？ 話說踏入三月喺榜首既漢堡又甩碌輸波失分，而家我地雖然係排第六位，但講緊同榜首只係相差三分。升唔升班對我黎講唔重要，現時我地拎住 39 分只差一分就達到護級既關鍵 40 分，呢刻我最希望可以下場拎到呢一分！！！！！
