22.02.2025
瑞士足球超級聯賽 第 25 週
FC St. Gallen - FC Basel
Stadion St. Gallen
賽果：2:2 (0:1)
入場人數：19335 （約 2500 名作客球迷）
門票：45CHF
咁多年來我地多數都係兩個自己四圍去睇波，只有兩三次係有朋友同行，好多時啲人想一齊去或者去既時候叫埋佢地，但永遠得個講字。自從 SVE 升班之後，呢兩年多左好多後生新血，當中有一個上個月先成年既成日問我地可唔可以帶埋佢一齊去睇波，但佢錢唔多只可以坐我地順風車。當今個週未既賽程定左之後佢就勁興奮咁話同一日喺瑞士有波可以睇，仲要係佢好想睇既 FC Basel，多得佢我地先可以去到睇一場咁精彩既比賽！！！
德乙同瑞超既賽程出左之後，我地就要等瑞超場波開始賣飛先敢訂其他野，個後生仔要搵多個人陪佢去可以 share 酒店房錢唔洗咁貴，最後一行四人終於喺一月訂哂所有野；佢就好似期待聖誕既來臨咁日日喺度倒數，間唔中仲會問啲好得意既問題，例如佢無啦啦意識到瑞士唔係歐盟然後問我地佢係咪要去申請護照，又會問瑞士唔係用歐元佢可以去邊度唱錢？ 當我地喺 Ulm 會面時，佢即刻衝過黎話我尋晚完全訓唔著，我真係好期待呀！！
喺 Ulm 出發要大約兩個半鐘既車程，由於我地今年無買到瑞士既高速公路年票就只可以行市郊既路，要花多少少時間先可以去到 St Gallen 既 B&B Hotel。 B&B 係歐洲既連鎖三星酒店，之前喺德國其他地方住過叫做有一個地方可以沖涼訓覺過夜；但瑞士即係瑞士，淨係個 lobby 既布置就已經高級過我地既過既分店。 Check-in 既最後佢問我地係咪黎睇波，然後話巴素加油 gogogo！ 笑死，首先唔知佢點睇得出我地係黎睇波，第二係點解會認為我地支持巴素？？
喺酒店放低啲野去個廁所我地就搭車去市中心食少少野然後就出發去球場。消息指巴素球迷會搭特別火車到場，我地去到球場站既時候就見到佢地啱啱同時到站。 St Gallen 既主場位於城市既西部既商業區，旁邊有 ikea 同商場可以行完街先去睇波。應朋友既要求要㨂可以清楚望到巴素既位置，我地㨂左近作客區既第一行，無人可以阻擋大家食花生既視線。 當我地排隊入場時班作客球迷都剛剛到場，入到看台後班主場球迷已經齊齊整整咁企哂喺度。
兩年前我地睇過 Basel 作客 Luzern，佢地會等齊人先會一齊好流暢好安靜咁湧入看台；今日佢地一樣先有幾個人突左個頭出黎，然後就有近兩千人不斷咁出現同各自分工，一堆就爬上圍欄掛旗，一堆就上去看台頂掛起顏色布遮住廣告，一堆就負責分派打氣物資等等。 到準備得七七八八佢地就開始唱歌熱身，第一首就係快版既小小姑娘同間唔中同主隊看台隔空對罵。
Basel 隊中有 Shaqiri，身邊好多人係咁叫佢個名，但今日對我地黎講比較吸引既係主隊既 SVE 前借將Vandermersch，我地上年護級成功既功臣！！！等到雙方球員熱身完準備出黎開波時，我地留意到作客看台好多矇面人同埋一碌碌黃色既野就知好快會有好戲睇。
等到球員進場時我已經準備好相機瞄準作客看台…. 看台內開始冒起濃濃既紅藍煙，再配上一大堆黃色既紙條，拼出代表球隊既紅藍黃三色，果然無㨂錯黎呢場波！！ 同時左邊既主場看台都有放煙同兩炮煙花，再撒幾堆紙碎，好快咁影左幾張相之後個鏡頭又返去右邊作客看台。 第一次咁近食彩色煙，唔洗兩分鐘成個球場都被煙霧包圍，變成伸手不見五指，好正呀～～～
係濃煙當中淨係聽到巴素球迷既歌聲，我地既後生仔雙眼發哂光睇到嘩嘩聲，第一次出國睇波就可以親身感受到咁震撼既表演，唔洗淨係上網睇片。好老實講，呢場波我地主要都係專注喺班作客球迷，由於我地坐得好近作客看台所以幾乎聽唔到主場既打氣聲，亦都唔想話係因為主場聲勢弱， 如果我地坐近主場看台的話都未必會聽到作客看台聲音。 我地只可以用眼去判斷下主場球迷既參與度睇落都唔錯，有幾次都見到大部份球迷都有一齊舉高雙臂同埋搭膊一齊跳。
FC St Gallen 喺瑞士其實係入座率第三最高既球隊，仲高過兩隊蘇黎世球隊。 而佢地其實瑞士同歐洲大陸歷史最悠久既足球隊，創立人當然係…. 一個英國人。 創會最耐唔代表成績最好，喺 1879 成立至今只贏過兩次聯賽冠軍同一次杯賽。 今季能夠躋身踢歐協聯國際賽，對呢個只有大約八萬人口既城市係一件好光榮既事！
今日比較出乎意料之外既係呢場波好好睇，成場都好忙又要睇啲球迷打氣又要睇波。 巴素喺上半場早段就先入一球，推高班球迷既打氣水準。佢地真係全個看台都一齊唱足全場，最神奇係佢地可以全場都保持同一聲量唔會唱唱下無聲。 我地好認真咁留意佢地點樣組織，成個看台得一個人有大聲公，看台內有幾個人用手勢溝通，要大家停就個個可以即刻一齊停，要起新歌就用兩三下手勢就好快可以重新唱。下半場中段客隊再射入一球拉開至二比零，不過呢排好似興 SVE，領先兩球都可以失分。FCSG 唔知點樣追追下就入左兩球追和， 最尾嗰十分鐘超好睇快上快落，雙方最後各得一分都算合理。
離場後我地行返去火車站，近火車站有警察設圍欄，我地見有架火車停左喺度，前面有人同警察溝通緊問呢架火車去邊，佢話去市中心然後就開閘比我地兩班人入。 我地向架火車狂奔睇住火車門關上… 前面個阿叔鬧個工作人員做乜唔擋住道門？ 佢話火車司機要關門咁我可以點？ 醒起瑞士火車係超準時，佢地唔會見有人跑緊就等埋你先關門。
咁唔走都走左，唯有等下一班車囉，呢個時候有個警察走黎話我地唔可以喺度等，唔會再有火車黎叫我地搵其他方法走。 呢個時候我地打哂問號 （同行另外三個德國人都唔知自己有無聽錯，因為我地無人識瑞士外星德文）見到前面班人勁無奈向住一條內街離去。 我地就好迷惘咁跟佢地走入內街先，然後拎 google maps 出黎睇點樣返去市中心，行路呢就要兩個鐘，過兩條街有巴士半個鐘後到。 又有呢一個警察黎問我想去邊，我話去市中心，佢指我地返去條後巷度等，大約廿分鐘後會有下一班車黎，好彩既話我地可以搭嗰班。
呢個時候我地唔明點解佢要話「好彩既話」先可以搭到車，但我地聽佢講去後巷等。 條後巷其他係幾間後既後花園，中間有條路仔，可以通去火車站月台條路就有圍欄同警察擋左。 路中間有個開放式既尿兜… 完全唔明呢個係咩運作？？ 同時愈黎愈多人走入黎呢條巷仔企喺度等，等左一陣我地終於了解到咩事。
賽後班作客球迷要行同一條路去火車站，所以月台上唔可以有人企喺度等車怕會有衝突，要等車可以，但要去呢條有圍欄擋住既後巷，等啲警察可以容易控制人群。亦都解釋左點解無啦啦會有座流動尿兜喺路中間，就係唔想啲人喺屋邊柯尿… 等到下一班既火車入站時，個看守警察就開閘放我地入個，幾十人即刻狂奔去月台，唔好唔記得火車唔會等你，上唔到就再返去後巷等下一班！ 真係「好彩地」咁成功趕到上車踏上歸家路上～～
返到酒店我地一齊飲返杯啤酒回味下今日發生既一切～ 第二朝喺酒店食自助早餐既時候唔知做乜又被誤認為巴素人，仲要比人「歧視」。 呢個歧視唔係種族歧視，只係覺得好好笑。 我地同行一人想拎野食既時候唔小心搭左個食物夾落啲水度，個侍應要換過支夾既時候話：次次都係啲巴素人黎搞事。 之後我同佢講樽阿華田醬無哂叫佢換過樽新既（ 我已經刮無可刮），佢話做人唔好咁浪費喎，佢刮左幾下都係得指甲咁多就好唔憤氣咁入廚房開一樽新既出黎。 我地呢啲巴素人完全唔知幾時得罪左佢 cryyyy
