22.02.2025
德國足球乙組聯賽 第 23 週
SSV Ulm - SV Elversberg
Donaustadion
賽果：0:0
入場人數：11735 (300 名作客球迷)
門票：18,70€

今個星期去作客以前喺西南地區聯賽既老對手，以前因為啲奇怪原因只有黎過作客一次。睇返啲舊相，當時我地得一架巴士到場連作客看台都唔開，對方都係得幾十人企埋一齊打氣。幾年後我地都連升兩級上左乙組，入場人數爆升。

Ulm 喺主場既入座人數幾乎每場都爆滿，D-Block 看台亦都變到十分之壯觀；作客都多次有令人眼前一亮既感覺。我地今日黎作客既人數都出乎意料之外既多，以為會得一百人左右；最後竟然有成三百人到場！

比賽當日朝早我地七點出發，預計大約要揸三個半鐘車程南下；去到最尾嗰個半鐘遇上塞車決定避開高速高路轉行山路睇下啲鄉下景色，最後喺十一點半成功到達。 作客球迷可以免費用球場旁邊既停車場，落車後行大約五分鐘就到達入口。 去到門口啲記憶返哂黎，望到兩碌球場射燈同埋計分牌，一個好典型既多用途運動場。

天公造美，今日開始回暖！ 雖然無藍天但起碼唔會落雨。出戰左兩年半德乙丙之後已經習慣左去啲靚球場，今日無啦啦返到黎地區聯賽 level 既露天看台喺心中不禁係咁投訴， 但另一方面 SSV 同啲球迷都想可以翻新同擴建球場，無奈個球場係公家既，即係擁有人係市政府；更無奈既係隊波由開季到而家都喺降班區徘徊，連成績都說服唔到市政府同體育會科水。

講開習慣左去啲靚球場，今日我地雖然有三百人黎作客，但無上蓋幫我地既打氣聲加乘真心聽落差左好多。 我企喺看台前食正啲聲但覺得點都係差少少野… 加上球員們既表現只係一般。 對方喺上半季就係喺我地身上贏得今季第一勝仗，仲要係技術性擊倒； 今日我地已經做好準備又要做羅賓漢幫佢地護下級。。。

上半場睇落都仲可以，有幾下埋門差少少先把握到。 下半場開波幾分鐘對方就靠角球接應頂入，對面即刻爆出佢地今季既成名曲。過左一陣球證示意要聽 VAR 睇有無越位，最後改判為詐糊。 對方今季好多場都係臨尾香， 但佢地對住我地贏多過輸完全無驚過。 我地唔係有幸運之神眷顧完全無可能會執到呢一分。

等到球證吹雞嗰刻個個都即刻鬆一口氣，呢一分得來不易呀！！！仲有求下佢地點都要翻睇球詐糊，點解又双叒叕係失角球波？呢個弱點真係好恐怖，可唔可以唔好花錢買人但搵個專家黎教下班球員點樣防角球！！！！完場後簡單同班球員一場集下氣，然後佢地黎到看台前逐一同球迷擊掌（！！呢樣係得呢啲球場先可以做到），我地就好快離場繼續上路去鄰國睇下一場波～～