15.02.2025
德國足球乙組聯賽 第 22 週
SV Elversberg - SpVgg Fürth
Waldstadion an der Kaiserlinde
賽果：2:0 (2:0)
入場人數：8623 （250 名作客球迷）
門票：季票

冬天去睇波真係自己攞苦黎辛，明明可以留喺室內被下嘆暖氣，但我地就㨂零度出去企足四個鐘，仲要唔知最後會唔會如願贏波。 過去一星期完全無見過太陽令到心情有啲低落，今日天灰灰咁南下返去睇波只希望可以取得今年第一場主場勝仗。

足總喺上星期公布左三月既賽程，我地作客凱莎羅頓同漢堡都被編排到星期五晚上演。作客漢堡喺星期五真心好無言，到時應該可以得一百人入場。 對凱莎羅頓我地超希望可以星期六下午開波，以利更多人可以去作客挑戰作客人數紀錄，星期五都唔算差但預左好多人都未必趕得切收工去入場。 今日賽前我地喺門口同看台前掛起大字布呼籲大家買座位看台門票，希望可以造到一個更佳既視覺效果。

球隊喺今季開始喺開波前一個鐘會播出客隊既會歌， 今日播歌既時候作客看台內廿個人都唔夠。 佢地本來作客人數都唔多，但去到呢個時候都得咁少人令到我地好擔心班核心球迷係咪喺路上有咩意外。 呢個時候同時有漢諾威同埋德丙癲佬 Rostock 南下作客，會唔會喺途中相遇然後搞事？ 好在佢地最後喺開波前約 40 分鐘終於出現，睇落都有大約二百人到場。

我地過去兩次作客 Fürth 都係帶兩三百人左右，心知大家對對方黎講都唔係吸引既對手，對方近況麻麻加上冬天令到更少球迷會願意去作客。我地既主場球迷入場人數都唔好得去邊，今季暫時最低既入座紀錄就係今日得 8600 人，但拎黎同上季比既話，今日多左六百人入場！對方喺看台前掛起大字報，要求球迷聲音要被聆聽，投訴對球迷既不公平對待。

回想起上半季去作客我地又係啱啱喺 Darmstadt 身上贏得三分，諗住對住 Fürth 可以乘勝追擊，當時 Asllani 竟然喺重要時刻射失十二碼最後搞到悶和，嗰陣我地仲覺得借左水貨。半年後，佢完全 prove us wrong 成為被多隊球隊列入收購目標既德乙神射手。歇冬期間傳出科隆同青訓球隊柏林聯想由賀芬咸買斷我地既租借合約直接簽佢，最後佢竟然全部拒絕話要留低同我地一齊捱。

嗚，最近一次訪問當中佢被問到最後會㨂留喺度，佢話覺得自己同隊波磨合得好好，喺簽約前球隊向佢解釋一套好吸引佢又好明確既踢法。季前佢仲喺賀芬咸既時候踢過友誼賽都覺得 SVE 既風格好啱佢，當時隊內仲會笑稱我地為皇家艾華斯堡 Real Elversberg，笑死～～ 反正完季後租約完我地都唔會望佢會㨂留低，佢點都會離開去更好既球隊，但球迷最愛就係呢啲好波又忠誠既球員！

今日正正又係佢先入波開齋！開波後五分鐘佢喺禁區彈出黎接應左路傳波射入，球場開波講入球既時候話入球球員 Tom! 大家就跟住叫 Zimmerschied！ 當時全場應該得兩個人喺度黑人問號：Asllani 同 Zimmerschied。 因為喺左路傳波既係 Zimmerschied，入波既係 Asllani。 唔知係咪因為 Zimmerschied 開心慶祝到好似自己入波令到完全無人質疑。 幾分鐘後球場先再開波話唔好意思頭先搞錯左，入波既係 Asllani… 賽後睇返重播見到如果 Asllani 接應唔到的話後面仲有個 Petkov 應該可以篤入，但根據非正式統計每次 Petkov 入波我地都會失分，所以超感激入波既係 Asllani!!!!

完半場前副隊長 Sickinger 喺禁區頂起腳一射入波將比數拉開 2：0，同上場 Fellhauer 既重炮傷比，呢個波係完全相反，距離差唔多但個波好似係飄去龍門咁。 過去幾場主場波話我地知，領先兩球先最危險，仲有成個下半場比對方追和甚至反勝。 下半場開波前個波好多時間都喺對面龍門，淨係見到個波喺門前飛黎飛去。每次有最怕既角球大家都會互望用眼神溝通：我地準備失波啦。 最後竟然有驚無險咁比我地捱到完場，終於喺主場 clean sheet 贏波～～～～

賽後我地都係好簡單咁同班球員慶祝一下，個個都想快啲返去溫暖既屋企，唱 2022 然後叫幾下球隊名就極速離場。 今個比賽週踢左五場波，全部都係全場球隊 clean sheet。拎埋呢三分，我地只差五分就達到關鍵 40 分既護級目標；同時望下同降班區既差距已經有 15 分，提早護級成功之路應該不遠了～～