08.02.2025
德國足球乙組聯賽 第 21 週
SV Darmstadt - SV Elversberg
Stadion am Böllenfalltor
賽果：0:3 (0:2)
入場人數： 16855 （1000 名作客球迷）
門票：16,51€

過去幾個月作客北威州我地有平均接近三千名球迷隨隊，今日黎到法蘭克福以南既 Darmstadt 自己揸車只需個半鐘車程，我地以為波飛會秒速售罄，最後去到開波前都仲有票剩… 暗中有少少失望。 算係證實左距離根本唔係一個問題，只係睇對手吸唔吸引。 對我地黎講去 Darmstadt 作客似主場多啲，由屋企出發搭車到站一個鐘都唔洗，自己揸車車程就只需半個鐘，所以我地期待左呢場可以搭地區火車去既作客主場波好耐～～

作客週末我地可以訓到飽整個 full breakfast 好他調咁過一個正常週末朝早先出門口，去到車站迎來我地既係法蘭克福隧道有意外導致班次會延遲… 好在最後只係遲十分鐘都仲趕到火車南下。 搭火車 (Regional Express) 只會停一個站就到達，搭 S Bahn 都可以去到 Darmstadt 就要多最少半個鐘。 喺火車上面有好多都係出門去作客既球迷，今日有法蘭克福作客慕遜加柏，車內個個客自同朋友一齊講波。法蘭克福球迷就講下德甲近況，同我地目的地一樣既就講下德乙丙咁，完全聽得出大家既世界分別！

十一點去到站外有穿為客球迷而設既唯一一班穿梭巴士，等左大約半個鐘後終於開車。 車內有一班後生話佢地係來自 Saarland 但其實係凱莎羅頓既球迷，今日只係黎陪朋友支持下鄉下波咁。佢地喺度討論不如完場一齊趕去柏林睇凱莎作客，車飛都已經睇好哂，搭高鐵四個鐘可以開波前一個鐘就到柏林，來回百零歐左右。 聽落佢地只係喺度吹水，但好佩服佢地年輕人既精力。

SVD 既主場 Böllenfalltor 我地已經黎過兩次都係坐喺作客看台右邊龍門後既鐵通看台，曾經喺 2013 年跟隨 SVE 黎作客德乙賽事既球迷就已經黎過，當時仲係無上蓋既舊看台，今日終於我地一齊進入呢個剛翻新好一年多啲既新看台！入場時剛好正午開始肚餓，排隊買蘋果酒同買牛肉腸 Rindswurst，聽佢喺度燒腸炸炸聲咁好期待。 拎到入看台開始食既時候。。。。仆街，條腸唔熟既，入面仲係凍既！！即刻無哂胃口，好想掉條腸入球場投訴，心中瘋狂詛咒呢隊唔識燒香腸既球隊輸波。

賽前我地遇得七百人左右到場，最後見到下層企位看台企滿哂人真心意外！ 上層啲座位坐唔滿但都有 2/3 滿，比預期多人好多，特別係下層睇落真係好多人！！更加意外既係看台內既參與打氣度奇高，每個角落都有人舉手拍手一齊唱歌。 大家本身擔心今日又會有好多黎食花生既球迷，點知好似成為另一個作客勝地，氣氛超好！ 另一個能夠推高看台內既參與度既原因當然係球員們既表現～ 季初主場大炒對方四蛋成為今季首場勝仗，今日我地黎作客再次以技術性擊倒對方！！！

第一球由隊長 Fellhauer 喺禁區勁射破網，球速高達 120km/h！我超中意呢種重炮入球～～～ 第二球就由左閘 Neubauer 喺左路比人走漏哂射入，總之佢每次入波都係咁樣喺左邊無啦啦彈出黎拉遠柱入波。 上半場完場前喺我地禁區頂有一輪手球爭議，球證要睇 VAR 去決定判唔判十二碼比對方，的確係有手球但對方越位在先所以手球無效。 btw 開始德甲乙開始試行好似 NFL 咁如果要睇 VAR 的話，球證要開咪向觀眾交代同解釋佢既判決， 上星期已經喺某幾個球場實行。

下半場主場球迷準備左一個簡單既 choreo 抗議警察對付手無串鐵既球迷，之後間唔中唱起同警察有關既歌。 中段 Asllani 突破越位射入第三球，連輸三場波之後終於贏波～～ 尾段對方有個叫 Nürnberger 既球員打橫一腳踢落 Baum 既膝頭，球員們即刻圍埋一堆鬧交，我地既後防 Rohr 喺老遠踢去捉住 Nürnberger 講數，條友一手揸落 Rohr 塊面度推開佢。 後來球證未拎張紅牌出黎條友已經自己向更衣室方向行，痴線架咁樣踢人，就算直紅都難解我地心頭之憤！！！就連主場球迷都睇唔過眼話應該要被罰禁賽至完季。

完場後球員終於可以開開心心咁黎到看台前一齊慶祝！我地要搭唯一既穿梭巴士返去火車站，有啲球迷死都唔願走搞到又等左近半個鐘先開車。 返到法蘭克福我地先係火車站買兩罐啤酒休息回神，然後就去食壽司～ 難得週末出城一早就訂左位諗住食好啲。開 Livestream 睇住 Sportschau 食飯暗地自 high 咁食飯！ 返到屋企仲趕得切睇今個星期既 topspiel，享受呢個久違既贏波週末～～