31.01.2025
德國足球乙組聯賽 第 20 週
SV Elversberg - Karlsruher SC
Waldstadion an der Kaiserlinde
賽果：2:2 (1:0)
入場人數：10102 （1700 名作客球迷）
門票：季票

返工忙左一星期又黎到比賽日，今個星期我地喺星期五喺主場出賽，早少少收工就趕住避開法蘭克福附近既繁忙時間準時喺開波前大約一個鐘到達球場。 黎到一月尾日照時間愈黎愈長，年尾對史浩克一早入場時都天已經黑齊，今日五點半去到球場都仲見到太陽落山！ 球隊今日可以額外再開放新看台多大約二百個位比球迷入場，再加上作客門票全部售罄，代表今日我地終於又再有超過一萬人入場睇波！

KSC 既主場自從翻新完成令班核心球迷可以以龍門後既看台做據點之後，佢地既氣勢變得愈黎愈勁。 上季季尾佢地黎作客時已經覺得佢地好大聲，今日佢地又再一次企爆作客看台帶黎另一波既衝擊。 上半場我坐喺佢地正對面食哂聲，佢地唔靜落黎我都唔係好聽到 Block C 既聲音。 當中有一首佢地成個唱台一齊跳住慢唱，完全聽得出係看台內每一個人都一齊用力唱出黎。。。 呢刻覺得震撼過早兩星期 FCM 既咆哮。

今場波我地有兩個球員因為紅牌同埋五黃而要停賽，但係上半場睇落我地都踢得唔差，睇落係可以有機會破到對住 KSC 未贏過波既魔咒？ 上半場尾段由 Petkov 開齋為我地領先一球，下半場開波無耐我地搏到十二碼領先兩球。 經歷過上場主場波領先兩球反輸既陰影之後，而家覺得領先兩球一啲都唔安全，錯失左幾次埋門機會之後就更加不安。

果然，我地又因為角球失波！！！！！又係角球，到底點解要有角球呢樣野？？？ 攻既話我地永遠送個波比人，守既話又係送機會比人入波。 睇左咁多年即使球員已經來來去去左咁多轉，領隊又換過幾次，我地既弱點仍然係角球！！！！！如果我地改善到攻守球角既問題應該一早贏左歐聯冠軍。

去到八十幾分鐘時覺得時間好難捱，幾時先可以完場？又果然， 85 分鐘對方追和。 又係領先兩球之下失分。 補時五分鐘既時間過得更加慢長，對方上哂火係咁狂攻，而我地就不知所措，明明呢兩三年我地行進攻係最好既防守，呢兩場更加印證左我地根本唔識踢防守波。 等到球證吹雞完場時我地個個都鬆一口氣，勉強慶祝喺德乙對 KSC 第一次執到一分。

賽後班球員黎到 Block C 前面， 我地同樣唯一可以做既就係送上掌聲，然後一齊舉起隻臂鼓勵佢地下場作客繼續加油為我地帶三分返黎！！！ 拎到呢一分依然將我地護標既目標拉緊，關鍵四十分只差十一分！