25.01.2025
德國足球乙組聯賽 第 19 週
1. FC Köln - SV Elversberg
Müngersdorfer Stadion
賽果：1:0 (0:0)
入場人數： 49800（3000 名作客球迷）
門票：15,40€

今場波算係今季其中一個最被球迷期待既賽程，史上第一次作客剛降班落黎既科隆！ 之前有講過好多人都支持北威州既球隊，科隆應該係最受歡迎既其中一隊，好多人今日可以完夢去現場睇愛隊同時又支持自己既鄉下隊。事實證明，最後賣出 2900 張作客波飛，真係到場既球迷一定多過上年作客杜塞爾多夫既免費波，某程度上又係另一個紀錄。

今日有份入場既球迷亦都有份參與同創下德乙既一個新紀錄，就係今個週末係最多球迷入場既一個比賽週：總共有超過 310.000 名球迷入場睇波，係德乙成立以黎既新紀錄，同時世界上亦都無任何其他乙組聯賽喺一個比賽週末有咁多人入場。 德甲既沉淪造就德乙既吸引力，今個週末有漢堡帶二萬名球迷去作客哈化柏林，有史浩克紐倫堡同馬德堡布倫瑞克既「友賽」，大球隊既魔力完全唔可以低估，就連我地都帶左半條村既村友一齊出城！！

呢個星期因為有啲事要週中來回 Saarland，所以我地決定今次搭球迷巴士一大班人一齊北上。 上次搭球迷巴士出發已經係武肺之前既事，講緊最少已經有五年無搭過巴士。 由 Elversberg 去科隆要大約三個鐘車程，同以前地區聯賽車程差唔多，因為唔會經法蘭克福又唔會覺得兜路浪費左時間。 我地一行人七點鐘喺球場外既停車場集合，一行九架巴士一齊準時八點鐘出發。

呢種車好多回憶返哂黎，有車尾一箱箱既啤酒阻住哂條路，有一大部藍芽喇叭播住啲 on9 歌，有一大班人喺度講笑左咁多年都仲笑得出既舊事同笑話！ 唔搭巴士都唔知原來我地咁掛住呢種無顧慮既旅程，可以著住球隊衣物，可以天都未光就隊啤酒，可以喺嘈到爆既環境下恰眼瞓。

巴士大約十一點就到科隆，只差幾公里就到球場，但眼前見到既係無盡頭車龍。路牌寫住仲有三百米就係出口，呢三百米我地塞左差唔多一個鐘。 當時球場一直傳來消息話好多人已經排緊隊入場，企位看台已經滿哂。心諗，到底點解我地永遠都係最遲入場嗰個？？？ 去到十二點多啲我地終於去到球場外停車場，落車後仲要行大約十分鐘先到作客看台入口。 一大班防暴已經等住為我地開路，我地要拎住物資喺場外嗰塊大草地斜過，中間穿過喺主場球迷既人群再去到我地既入口。 真心想知啲大球隊係咪都係咁既安排？？？

排隊入場時見到有兩個拎住科隆頸巾同作客區既門票既荷蘭人諗住入場，我地即刻踢佢地走，一係就掉條頸巾走，一係就離開。 主隊都有個阿叔叫佢地走，同我地講好多人喺買黃牛黎睇波但唔知最後原來係買左作客區。我地都試過買啲唔滿既作客區入場睇波但起碼我地知有咩可以做同有咩唔可以做。 入場後得返大約半個鐘，球迷大使急住交個 pass 比我同我解釋有咩區域我可以去，同埋幾時集合帶我入場邊。 呢啲世界盃大球場全部都勁麻煩，又係只可以開波後留一段時間就要入返場內。 賽前佢帶我兜圈仲話我知去邊區可以有好啲既角度影到作客區，算係咁多隊波最友善既球迷大使！！！

其他人就趕頭趕命咁掛旗，最大問題係好多人已經企左喺頭幾行，我地要同佢地解釋佢地要移位等球迷組織可以聚集喺頭幾行。 我地都明好多人可能第一次睇波唔知呢啲不成文規定，好多人聽完解釋都理解而讓位，問題係啲老人家講極都唔明。我地只可以同佢地講，你要留低我地迫唔到你，但你預左要接受我地會又跳又叫。 唉，有時真係寧願得兩三百人去作客。

喺場邊既我望住又一次幾乎全滿既作客看台暫時忘記左看台內既煩惱，又一次近三千人黎作客，成功拉高我地平均作客人數至二百人，爬過唔少比較出名既球隊！ 同時我又望下其他看台，見到主場球迷參與度極高，諗起 2018 年黎睇德甲既時候都有被震撼到，當時我地企喺看台最頂嗰行食哂屋頂既回音。今日仍然如舊，完全無令人失望！

呢兩個星期有傳由賀芬咸借過黎既 Asllani 可以會中斷借用條款而轉會去科隆，因為科隆急需一個前鋒而佢地睇中左我地既神射手。 傳完科隆之後又轉柏林聯又同樣急要前鋒而想向佢地既青訓產品埋手，去到賽前一日既訓練 Asllani 竟然無出現，我地已經以為佢選擇左重回母會既懷抱。 向好方面諗，我地係會失去有實力既前鋒，反正佢本來去到季尾都係會走，咁樣無啦啦比人搶走個球員起碼有補償，可以用錢買其他人。估唔到球隊今日賽前出 post 勁多 Asllani 大頭，相信係想證實佢會留隊到完約，最後佢亦都正選上陣！！！

五分鐘後我就返到作客看台，看台底仍然一片混亂。 成個看台得一個出入口，入到看台區域有一大塊平地，然後有條樓梯向上，好多人就咁企喺唯一既樓梯出入口，再加上勁多人出出入入煩到爆。 因為視線受阻睇完場波都好次無睇過咁，完全唔可以評論我地今日踢成點。 我只知我地有多次攻勢但把握唔到。 下半場我走左去上層看台，終於可以見到成塊草皮可以睇下波。我地有依然有幾次有威脅既埋門，有一次仲成功送個波入網但被吹越位詐糊。

然後科隆就入波…. 場內爆出慶祝既聲音，然後作客看台入有幾個人企喺身 fing 紅色頸巾勁開心咁慶祝！！？ hello???/ 佢地後面有幾個 SVE 球迷勁不滿咁係咪鬧佢地，本來我以為佢地係半主半客既球迷，但見到佢地勁真心興奮咁慶祝大叫我都忍唔住衝上去想叫佢地收皮。我行到半路已經見到有保安走去佢地度叫佢地行出去，佢地知衰想收埋條頸巾就算，但保安依然叫佢地離位。 我行埋去諗住比佢地兩個選擇，一係離場一係交出唔係黑白色既打氣物品。 喺我未出聲個保安就同我講佢會處理唔洗擔心，我企埋一邊見到個保安好決絕咁指佢地向出口方向都安心啲。 有時見作客球迷喺主看台出現我都理解，唔係入核心打氣區都仲可以接受；但我唔明主場球迷入作客區仲要光明正大慶祝係想點？？？

呢球波最後 VAR 吹返轉頭，抵死慶祝左球詐糊而家連波都無得睇。去到近完場前科隆喺禁區頂遠射破網射入全場唯一入球，拎到三分升上榜首。 賽後好多人都話科隆踢得好似只有業餘水準完全唔值呢三分，相反我地就踢得好好只係差埋門嗰腳。 科隆球迷表示唔理贏得好唔好睇最重要三分已袋。 呢場波過得好快，快到我都唔知自己到底有無睇到波？？？

賽後我地等到球員黎到看台前，所有球迷都舉起頸巾迎接佢地，然後大力為佢地鼓掌致敬佢地出盡力。啲球員當然就笑唔出，球迷們就更加落力拍手想話比佢地知我地完全無因為失分輸波而不滿！大佬，對方係德甲陣容黎架，我地呢啲鄉下隊可以迫到佢地僅贏一球真係已經超過預期。 下場主場大炒下人拉高返個得失球差好過～

離場後又再由警察帶路原路行返去停車場，好彩輸波._. 如果唔係要穿插一班離場既主場球迷一定會出事… 一如以往，回程一開始都會好安靜，過左一段時間第一個人開始帶起話題先會熱鬧返。 三個鐘後返到去起點，然後我地要揸多兩個鐘車返去法蘭克福。 下星期五返到主場對我地從來未贏過既球隊，都係打定輸數先唔好期望咁多。冬天幾時先完！