19.01.2025
德國足球乙組聯賽 第 18 週
SV Elversberg - 1. FC Magdeburg
Waldstadion an der Kaiserlinde
賽果：2:5 (2:0)
入場人數：9351 （約 1100 名作客球迷）
門票：季票

唉，新年新開始？接住年尾既黑氣一開年就轟轟烈烈咁大敗。 又一場完全唔想回味既賽果。

上星期喺溫暖既西班牙返到黎，第一場聯賽賽事回到寒冬下喺主場迎戰 FCM。賽前我地已經係乙組對戰過三戰，一勝兩和，去到年尾我地都有份參與榜首混戰。 今個比賽週末既榜首科隆又中左榜首魔咒輸波，令到我地又有機會可以掂下直接升班既席位。

歇冬期間，西看台既基建正式完工仲趕得及可以今場開啟用部分企位看台。西看台正式啟用之後就會開始最後一個看台既擴建工程，到時作客看台會再次搬去龍門後面，直至成個擴建工程完成先會有自己既一個角落頭。 西看台個 concept 係會成為 VIP 企位，連啲欄杆都高級啲有凹位可以放野食同野飲！！ 不過遲下佢地會放喺作客區旁邊，可以近距離感受下對方既氣勢 ._.

FCM 喺年尾作客出戰最後一場賽事既時候，喺家鄉既聖誕市集出現恐怖襲擊有人揸車衝入人群。當時雙方球迷即刻停止打氣，班球員仲未知咩事以為自己做錯事，去到主隊 Düsseldorf 經場內大電視通知先知原來有慘劇發生。去到中段大部份作客球迷已經無心情繼續睇波直接離場，足球去到呢一刻唔再重要。

HF 喺新一年諗住印刷場刊，簡單同球迷分享下球場內外既新聞，等啲新球迷可以了解多啲平時喺新聞媒體未必睇到既資訊。Lindeblättchen 既「創刊號」先同大家一齊回顧下 2024 年，同介紹下球迷組織既歷史，再加呢兩年新成立既組織等等。

大家對呢場波無咩期望，覺得繼續和波都接受到，反正冬天我地都係唔識踢波，執到一分得一分。 上半場對方有好多有威脅既攻勢，有幾次成功突破越位埋門，唔係 Kristof 上身我地應該一早輸左幾球，出奇地我地有兩個機會都成功送到個波入網，領先兩球。 點知去到完半場前，我地既後防為左唔比對方單刀竟然拉住人地手臂扯佢落地，紅牌直接出場。 原本以為可以拎到三分… 突然變到十分不安。

等到下半場開波，我地換走左前鋒換入中場，想喺中場搶返多啲控球權同可以守到後面。當時我留心準備睇作客球迷如常咆哮球隊名，當時客隊喺對面有角球定唔知咩，總之就攻緊對面，睇住班球迷舉起雙臂拍到最後準備大叫既時候，佢地變成高聲慶祝…. 一開波第一個攻勢就追返一球。 失左呢球之後隊波就開始散，加上領隊好似變錯陣，低估左對方既實力同高估左我地既防守能力。 最後一口氣失夠五球反敗完場。

去到尾段班作客有啲球迷興奮到除哂衫，好多人就反轉件飛行外套 bomber jacket 將橙色嗰面著上身。 喺東歐球迷文化入面，將件褸反轉黎著係想帶出「我地準備好要戰鬥」 、「我地好打過你」之類咁既意思，喺呢個情況下完全係 100% 符合反轉件衫黎著既條件 ._.

唉，到底點解我地每次輸波都要被大炒咁輸。恭喜 FCM 贏左呢場波同榜首同分彈上第二，而我地就以三分之距跌落第七。 下星期作客科隆，希望班球隊反省下今場輸喺邊！！！