12.01.2025
西班牙足球乙組聯賽 第 22 週
Córdoba CF – UD Almería
Estadio Nuevo Arcángel
賽果：0:3 (0:1)
入場人數：17897 (800 名作客球迷）
門票：32,20€

星期五去完直布羅陀同星期六喺據點西維爾都睇左場波，黎到星期日我地去到離西維爾大約兩個鐘車桯既 Cordoba！本來我地諗住一早出發去哂啲景點先去睇波，一早係講緊七點出發！ 但我地前一晚睇完西甲返到去已經十二點，諗唔通到底我地點解要咁 chur？！ 呢邊太陽六點幾先日落，同德國四點幾相比完全係兩個世界。 呢場波完左仲未天黑可以之後先去觀光喎，最後都係訓飽先出發。

Chok 左兩個鐘車之後，一離開高速公路就見到位於城市入口既半完成球場。 當時已經有好多球迷行緊去球場，我地喺場外距離大約十分鐘路程既爛地免費停車場放低架車先，然後就向球場方向出發。Cordoba 自 2004 本來諗住翻新球場改為多用途建築，而多用途唔係講緊塊草地既用途，而係想喺看台出面起一座八層高既寫字樓比人租黎做辦公室，但佢地一邊起左一半都無就放棄，剩返落黎既地方就好似一個停車場咁樣吉左出黎，場外又一片爛地咁成個感覺好唔專業。

場外睇落甩皮甩骨，但入到場內都唔錯。 當日開波時間係兩點鐘，我地大約一點就入場仲未食晏，諗住入場先買野食。 佢地既小食亭無餐牌同價錢牌，淨係見到有個貨架上面好多唔同既薯片類零食。 眼利既我地見到入少少有部類似燒腸仔既機器同埋一部焗爐，旁邊放左一堆通常用黎裝熱狗既紙盒。 我用我識既西班牙文問： Bocadillo? （西班牙三文治） 佢地就好熱情咁答：siiii, eee jamon o tortilla? （火腿定蛋） 叫左兩份腿治佢就幫我地夾熱件三文治，同時想買可樂同檸檬芬達。 個後生仔想同我地講無檸檬得橙但唔識講，淨係識話 no lemon，心諗點解唔話 no fanta 就算，原來佢得橙味，我照要橙芬達； 然後佢連 16€ 都唔識講，啲同事個個勁大聲幫佢講 SIXTEEN!! 笑死成件事好西班牙。

買完野食就入看台埋位開餐，睇住對面作客看台球迷開始入場。西班牙既芬達真係全世界最好飲，首先檸檬味我淨係飲西班牙版，德國版係有陣假既酸味，而西班牙版就係鮮甜檸檬味。 估唔到橙味都係高幾班！！！我地附近有堆人喺場外買左幾袋麥當勞入場，原來西班牙係容許帶街外野食！？ 去到半場休息時所有人（真心係我地以外既所有人）都拎出自己帶黎既三文治食，個個都係用錫紙包住，淨係聽到撕開錫紙既聲音 xD

講返場波先，呢場波算係同州打比，兩隊波既城市相隔超過 300 公里，客隊球迷要坐大約四個鐘車黎作客。 事後我地先知原來賽前雙方球迷係 Cordoba 市內打交，警察後來放走被打既 Almeria 球迷叫佢地入場睇波然後扣留有份參與既主場球迷，導致主場球迷既打氣區今日空空如也完全無聲勢。當時我地仲誤會 Cordoba 既核心球迷組織只係得小貓幾隻， 好在其餘近萬名主場球迷自己都帶到啲氣氛，同西維爾球迷一樣賽前出盡力萬人齊唱會歌。 我地個位可以望通旁邊看台既屋頂見到市內既 skyline，清楚見到清真寺大教堂（！）地標。 聽住會歌睇景又係另一番風味～

客隊好輕鬆咁以三球贏波，失到第三球好多主場球迷已經提早離場，去到尾段得返一半人都無。留低既個個好有默契咁瘋狂噓爆球證，最得意係每次球證吹比主隊既時候（例如界外球，普通罰球等等）個個都會係咁鼓掌諷刺球證原來識得吹罰對方。

完場後我地就行大約十五分鐘既路程去到河邊，離遠已經見到清真寺大教堂。 西班牙經歷過被穆斯林征服統治過一段時間，所以喺 Analusia 地區會見到唔少伊斯蘭建築。 Cordoba 呢座大教堂就係其中一座出名既世界遺產，由歌德式教堂被改建為清真寺到最後再次被改建回復成大教堂。喺唔同既統治時期期間，當時既人只係一直改建而無造出任何大型破壞，令到座教堂成為獨有既建築。可惜我地完場後去到既時候已經差唔多關門，我地又唔想太趕入去睇，唯有留返下次搵機會花多少少時間慢慢觀賞。

喺舊城區內既細街行左一陣就去到一個仲有太陽曬住既廣場，即刻搵間 cafe 坐低飲返杯芬達。坐坐下開始肚餓就叫當地既土產：Salmorejo 凍蕃茄湯（唔係普通既 Gazpacho!）同燴牛尾 Rabo de Toro。佢地既晚餐時間係八點左右開始，當時五點幾六點個個都淨係喺度飲野，得我地喺度開餐～～ 太陽落山後就再去行其他細街消化一下，大約七點幾八點就回程返去西維爾。

去呢啲內陸城市真心推薦秋冬天黎，日照短少少但起碼可以全日都留喺室外行街睇景，唔洗搵地方避暑，街上長期有人唔會個個都去哂 Siesta 死氣沉沉！