11.01.2025
西班牙足球甲組聯賽 第 19 週
西維爾 對 華倫西亞
Estadio Ramón Sánchez-Pizjuán
賽果：1:1 (0:0)
入場人數：34297 （250 名作客球迷）
門票：45€
去完直布羅陀之後，我地先返到據點西維爾黎個一日遊。 喺我地到西班牙之前當地落左幾場大雨，呢幾日就算唔落雨都因為有層濃霧導致天陰陰咁。 我地今日既行程就係先訓飽，然後就去舊城區行街。到埗嗰日我地喺超市買好哂整早餐既材料，訓飽食飽之後大約十一點出門口。
第一站去到市中心既磨菇街市，呢座原名為都市太陽傘既地標被當地人喺第一日就叫做磨菇，叫下叫下已經無人記得佢既原名，而家就連市政府都就叫佢做西維爾磨菇。喺門口貼張貼紙留個標記就喺舊城散步，要趁啲當地人出黎食晏之前早過佢地搵到餐廳。
其中一樣令我好中意西班牙既文化係 Tapas！ Tapas 就好似我地既點心咁份量唔多，兩個人可以叫三四碟唔同既野食一齊分享；喺西班牙去到餐廳仲可以淨係叫杯野飲唔食野都唔會比人白眼。喺南部 Andalusia 呢區正正就係 Tapas 既發源地，呢度大部份餐廳既餐牌上都可以叫大中細份，大份即係普通一碟，細份即係 Tapas 份量。我地最中意叫薯仔配辣醬 Patatas Bravas、橄欖油蒜蝦 Gamba al ajillo、炸魚毛 Boquerones fritos 同黑毛豬火腿 Jamon Iberico。 今日喺第一間餐廳試下新野就發現新既最愛：炆豬臉 carrillada，呢度仲會用 Sherry 黎炆！！！！ 叫左兩碟 Tapas 飲左兩杯 Fanta lemon (西班牙既芬達世一）我地又繼續行街，有啲景點我地想留返之後先去，今日既行程淨返夜晚去睇波。
我地返去 Airbnb 開包火腿黎食休息一陣見出太陽就出去搵個地方坐喺外面食啲野，暫時黎講今日唔係行就係食，但一月可以坐喺街邊飲梳打紅酒 Tinto de verano 同食 Tapas 點都要好好享受！！ 坐到六七點就起行行去球場，時間預大約四十五分鐘。 西維爾主場為於市中心東部出少少，附近好多商舖仲有個大商場。
西維爾主場外面著起紅色既霓虹燈，有啲覺得自己變左一塊牛肉咁。 喺 Fanshop 外面有一塊超巨型馬賽克牆砌左西維爾既會章、球隊名同一堆佢地曾經對戰過既球隊，展示出球隊著住深厚既歷史。 我對佢地近年既印象係歐霸盃之王同埋法蘭克福早幾年就係喺度贏歐霸。黎緊佢地會好似魯營咁進行翻新工程關閉球場兩年，我地成功趕及喺工程進行之前入場睇返場波～
喺外面影夠相去 fanshop 買完手信就入場，除左喺閘口有保安查飛之外，場內完全無任何保安再睇你係咪入啱區。 我地又要爬幾層樓梯上到山頂去自己個位，點解每次去西班牙睇波都好似黎做極限運動咁！？ 原因係西班牙波好貴！！！！！今日一張飛要 45€，如果被定為 A 級賽事呢啲山頂位要差唔多成 100€，完全唔知啲人哪裡來的錢黎睇波？！ 我地一直捕住官網等佢地開始賣飛時即刻入去搶，最後成功搶到兩張唔連位要一前一後坐。
早兩日落完大雨之後而家好多座位滿哂積水…. 好在我有備而來儲左好多餐巾就係呢啲時候出動！！！ 啲本地人就帶膠袋同座墊，有啲人係用手撥走啲水就咁坐低 ＠＠ 西班牙啲球場通常都無上蓋，仲有一樣佢地無既就係欄杆。 要經過啲人入自己個腳既時候好驚叉錯腳會由山頂碌落去草皮！！！ 埋左位之後完全唔敢再郁。
去到臨近開波宣讀出場陣容既時候，球場就上演 light show 係咁眨下眨下。同時喺我地對面龍門後既球迷就慢慢打開準備左既 choreo，大字寫住屋會被燒毀；人會死；但我地既愛唔會變（google 翻譯），中間拉起 Joker 大樣。 我地聽人講西維爾喺西班牙難得有球迷文化既球隊！ 呢個時候我地淨係見識到佢地既 choreo 已經覺得啲人無介紹錯。 然後到球員入場時全場球迷一齊清唱會歌， 我身邊啲個個係出哂力咁大聲唱，歌詞入面淨係聽得明 Sevilla 但都覺得好激動！
當時雖然有 choreo 睇，但我地都仲未仲知所謂既打氣文化係咪真係比其他球隊好。 巴塞同華倫西亞都係一般般，但西維爾既打氣區參與度十分之高，聲勢亦都唔錯。 唔知佢地係遲到定點，開波後先慢慢喺看台前掛起球迷會既旗；當中包括喺西班牙被禁用既字眼： ULTRAS。 果然係名不虛傳！！！因為語言關係我地搵唔到太多相關資料，但據我地既認知西維爾北看台球迷組織係多年來首次重回看台來帶領打氣，同時警方好似慢慢放寬對球迷既限制，所以今日先會有一個類似慶祝回歸既行動！
作客看台上有我地上年見過既華倫西亞，當中包括叫班主收皮既 Lim go home 黃旗。 主客隊兩個城市相距超過 600 公里今日都有 250 人黎作客，真心 respect!!!
場波係兩邊廢鬥廢，華倫呢幾年喺榜尾掙扎，西維爾近況都係麻麻地只係喺下游位置。客隊先入一隊去到近完場好多主場球迷提早離場㨂放棄，點知喺補時階段主隊成功追和！！！！（抵死啦啲人提早離場） 之後個個都乖乖地留低直至完場。 夜晚九點開波，完場時差唔多十一點對西班牙人黎講夜生活而家先開始。 我地沿原路行返返去，路上經過唔少餐廳酒吧都亦然坐滿人。
之後我地仲有兩日遊西維爾，當然唔可以錯過地標！ 我地穿過舊地先去到大教堂參觀，然後去就去西班牙廣場。 喺網上面見過好多相完全比唔到現場親眼見到既震撼感！ 第一眼見到條河上有人撐船覺得有少少似威尼斯，當我地步入廣場後既長廊望返出去心中係咁嘩嘩聲。 行遠少少仲有美洲廣場好多好靚既建築睇，等到太陽準備落山既時候我地返左去西班牙廣場㨂個靚位喺戶外 siesta 享受今日最後既陽光。
最後一日我地去左河既另一邊，嗰度有三十年前舉辦過世博廢墟。 好多國家都會保留世博最核心既建築物，係西班牙先中意起完一堆野就咁由佢荒廢… 我地只可以離遠望下同去旁邊既公園散步。 最後去到金融地區同 Tirana 搵間本土啲既茶餐廳。原來西維爾有自己既特色甜酒：橙酒！ 好飲到我地喺機場買左枝返德國去延續我地既西班牙夢。
回程日我地要揸兩個半鐘車返去馬拉加，還車之前我地去機場附近既沙灘散步，聞下海水味同聽下浪聲去暫別西班牙，收拾心情返去凍冰冰既法蘭克福。。。。 呢個時候我決定：以後無得去日本我就要去西班牙！！！
