10.01.2025
直布羅陀足球聯賽 第 17 週
Lynx FC - Lincoln Red Imps
Europa Point Stadium
賽果：1:5 (1:2)
入場人數：100
門票：免費
自從上年冬天 SVE 首次去西班牙集訓，我地都想可以跟埋一齊去避冬，無奈一直都無消息到底佢地今年會唔會去；去的話又幾時去同去邊？ 最後因為年尾要清假就喺九月尾訂左一星期去西班牙南部，有緣就去跟下集訓，無緣既就自己去玩。 當德國一月又黑又凍得幾度日日喺屋企 emo 既時候，西班牙南部係日日晴天有成接近廿度，就算無得睇 SVE 我地都可以去補充返啲維他命 D。
果然去到十二月尾佢地終於宣布過完年就會飛去馬拉加集訓十日同進行友賽，我地雖然會有幾時同時喺西班牙，但因為佢地只會閉門作賽我地就決定唔會特登去睇佢地，然後就 plan 左一連三日都自己去睇波！ 第一場波去到一個新地方拎多個 Länderpunkt 黎慶祝新年：直布羅陀 Gibraltar！
呢次旅程我地其實主要想去西維爾，馬拉加呢啲沿海地方我地想留返夏天先再黎。西維爾去到夏天可以高達四十度，冬天黎反而仲舒服。 不過法蘭克福唔係每日都有班次來回西維爾機場，租車亦都唔會點解特別貴，最後我地㨂左來回馬拉加。 去程搭早機喺瑞士轉機可以十二點就到，拎左架龜速 Fiat 500 cabrio 碌左兩個半鐘就到達西維爾！
第二日就再揸兩個半鐘南下直落去到直布羅陀。安排行程既時候我地要決定將架車泊喺西班牙嗰邊定連車入境好啲，由西班牙行路過境可以喺機場跑道入境同埋唔洗驚塞車，但怕夜晚睇完波之後等唔到巴士返去會搞到好夜先走到。揸車就驚要排長龍同埋要花多舊錢搵地方泊車，但夜晚就可以即走。 最後因為懶所以決定連人帶車入境。 自從英國脫歐之後，歐盟居民要入境英國就唔可以用身份證一定要用護照，而直布羅陀雖然係英屬地區，但佢地就容許歐盟居民用身份證出入境，睇人地講拎英國護照出入境反而要排隊仲麻煩。
當我地揸車去到邊境時就拎定身份證出黎，首先要喺西班牙邊境比佢地睇張身份證，第一次係海關，第二次先係正式出境，然後就入境英國比佢地睇多次張身份證。 呢個過程用左……十秒，hea 到爆！！！ 真心唔知佢地有鷹眼定點，我地係一手拎住兩張咭疊住一半咁一齊比佢地睇，三個人都係望一望就點頭比我地走。 ok… 我仲以為可以體驗下過境，入左境都仲未意識到成個過程已經完左。
入境後見到第一樣野係油站，1 GBP/Litre!!! 直布羅陀就好似我地以前既盧森堡咁，入油買煙買咖啡既勝地，第一件事就即刻衝去入油打爆個小油缸先。 然後就去到纜車站下面既停車場搵位泊車，呢度既車位有三款線，黃線係居民專用，藍線要比錢，白線就免費，一唔小心泊錯區就會比人鎖車。 白線有四行但全滿，我地等左大約三個字都無人走就諗住泊藍線，點知部機淨係收 coins，今時今日會唔會有人有 12€ 銀仔？？ 最後等多一陣終於有車走。
直布羅陀有種香港／澳門既感覺，當地有直布羅陀鎊（好似澳門錢咁唔值錢，同埋唔可以喺英國用），英鎊同歐元都通用。 有啲地方會將英鎊同歐元 1：1 咁收，所以用歐元會抵少少，有啲會寫明英鎊同歐元既銀碼自己㨂比幾多。除左流通貨幣之外，當地既政治都有少少似香港，呢個小城方喺 1713 年由西班牙割讓比英國，後來西班牙一直都想要返直布羅陀，不過人地有得投票自己㨂想做英國人定西班牙人，公投絕大比數㨂繼續做英國屬地；早幾年脫歐公投又絕大比數投留歐，兩邊茶飯都想食。
喺當地周圍都係英文路牌但當地人好似講西班牙文多過英文，當佢地講英文時會帶有極濃西班牙口音好得意！！ 泊低架車之後去附近一間 pub 食少少野先，然後就去買飛搭纜車上山。我地買左單程車飛上山再加保育公園入場卷，每人 41,50€，未買之前覺得好貴，落山之後覺得超值，一定要行落山！！！ 搭纜車上到山頂之後可以免費上 Top of the Rock 觀景台，一邊係一望無際既海景，另一邊就係直羅羅陀同遠望西班牙，之後行入公園仲可以望到摩洛哥！
今日天氣極完美，廿度左右藍天無雲，大大個太陽曬住幫我地暖身超舒服！！山上出名既除左風景之後仲有馬騮，呢度係歐洲唯一一個有野生馬騮既地方。今日見到既遊客全部都好守規矩，個個都會保持距離咁睇馬騮同影下相，啲馬騮都好 chill 咁好似識搵個靚背景擺 pose 任你影咁。 落山途中有幾個景點，其中一個係St. Micheal’s Cave 鐘乳石洞，有幾個炮台同吊橋。 喺上面行左三四個鐘先落山去到市中心行下街，天黑前去左一間叫 The Clipper 既餐廳食飯。十二月尾去英國淨係食亞洲菜，今次重回英國終於可以食 Fish & Chips 同飲返一 pint 平平無奇既啤酒。
食埋甜品之後我地就行大約十五分鐘返去䌫車站停車場，然後就出發去山後既 Europa Point。 呢段個感覺好似返左香港咁行緊單線既山路，沿路有唔少住宅區既大閘。 十分鐘後我地就去到直布羅陀既最南部！ 當然天已經黑哂，球場射燈已經開左，而球場背後就係望住非洲既海旁。 當時仲有成個鐘先開波我地就去海旁散下步，望下燈塔同遠望西班牙屬地 Ceuta 同 Morocco 海岸。
Europa Point Stadium 係一個多用途運動場，足球聯賽本來喺近場嗰邊既 Victoria Stadium 上演，近年因為維修工程而搬到黎南部進行。 呢度人少同地細過香港都可以有個聯賽仲要有十一隊波，而每場聯賽都喺同一個球場出賽無分主客，有一種熟悉既感覺。要入場睇波就咁直入就可以，我地求奇㨂個位坐低影左幾張相就無啦啦有人黎打招呼仲要叫得出我地個名。 ？？？ 我地明明勁自閉，而家就黎去到非洲都有人識！！？ 好多球隊都會喺冬天去南歐集訓，而我地亦都唔係唯一想跟球隊去旅行同時又去 groundhopping，今場場內有大約 100 入場，當中最少一半都係德國人… 黎打招呼既係用過我張季票入場既朋友既朋友，世界真細小！！
傾左幾句我地就各自睇波，估唔到咁都有六個入球睇，仲有幾個「作客」球迷間唔中會大叫下打氣。 喺小食亭附近就有好多德國人喺度飲住啤酒交流。 完場後我地沿海邊返去邊境，當中經過一條好恐怖既石洞隧道，穿過機場後同樣好 hea 咁 show 張身份證比邊境人員望一下就返到西班牙～有機會將來可能要再返黎步行越過機場跑道，同埋等另一個球場完工後去睇多場波。 如果有機會去西班牙南部，真心推薦要黎一日遊！！
