20.12.2024
德國足球乙組聯賽 第 17 週
SV Elversberg - FC Schalke 04
Waldstadion an der Kaiserlinde
賽果：1:4 (1:1)
入場人數： 9502 （1800 名作客球迷）
門票：季票
更多相片

呢個星期 SVE 搞到德國體育媒體滿城風雨，原因係上場作客 Braunschweig 贏波之後我地成為本週既榜首！ 無人諗過呢場波只係我地歷史上第五十場德乙賽事就已經可以一嘗領先既滋味，個個都爭住報導一隊鄉下隊無聲無息咁爬過所以傳統勁旅升上第一。

黎到第 16 週 SVE 以 28 分排喺榜首，只係以得失球差壓過另外兩隊同分既科隆同柏達邦，收到落去第十位既積分差距只係得四分！輸一場波隨時可以由第一跌落第六七名，每週既榜首、甚至係升班席位都會被唔同球隊取代！！！ 德乙既海鮮味成為今季最吸引既地方！

上星期我地因為仲喺英國錯過左球隊升上榜首既時刻，不過我地仍然可以享受以榜首身份迎戰史浩克！上季兩戰史浩克一勝一和，今場我地好似有種無形壓力想保持呢個對史浩克不敗既往績同時又想保住榜首位置，班球隊正正就係會因為呢啲壓力踢唔出水準…

星期五出賽即刻又可以喺射燈下睇波，今日球迷組織 HF 準備左一個簡單既 choreo。 大家喺開波前兩個半鐘先入球場準備一切：喺球場上蓋掛勾拉繩，喺看台前面度位掛大海報，喺門口準備陣間要派發既傳戰同物品。 今日每位進入 Block C 既球迷都會收到一枝仙女棒；喺德國足總既球例下呢種小型煙花係可以喺場內合法使用。 我地當然唔係為左合法而㨂仙女棒，而係要用佢黎帶出今日 choreo 既意義。

今季主場賽事其實場場都掛紅旗，但唔知點解今日個感覺特別人多。 史浩克既球迷遍佈全國，今日得千六張作客飛完全唔佢地用，主看台內都有唔少作客球迷走黎走去。佢地既球迷組織都好準時入到場，喺看台前掛起 Nordkurve Gelsenkirchen 同球迷組織既大橫額，另外其他大大小小既球迷會。看台內有近廿枝旗，好靚～～

球隊今日無準備樂團現場表演礦工之歌 Steigerlied，改為就咁播歌。 唔知係因為喇叭播得太大聲定係無咩人唱，聽落無喺史浩克球場嗰場震撼感。 呢首歌都係因為史浩克先喺主場播， 首歌雖然人人識唱，但如果對條村真係咁重要既話就唔會等到人地黎先播喺度做 show？

等到球員入場時，Block C 展開準備既既 choreo：首先喺看台中間拉起球隊會章，前面幾隻大字 Aus Euphorie entstand der Funke des Erfolges ，老實講我唔係好明呢句既用意，亦都提出過覺得好似調轉左黎講。呢句野既意思係指由激情中燃起成功既火花， 好似由成功既火花燃點起大家既激情合理啲？ 火花係一瞬即逝，講到只係燃起火花好似令到我地有啲渺小。 呢個時候看台入面既球迷一齊燃點起手上既煙花仔燃亮 Block C。 好可惜中間個 logo 唔夠突出，最後效果麻麻地。

開波後史浩克有第一個機會就把握到入球， 然後我地負碌地入到一球追和。 下半場對方連入多三球最後大炒我地四比一。 客隊喺季初戰績奇差，比人講到降硬班又可能因為負債太多就算降班都唔可以踢德丙。 換左自稱為哈利波特既新領隊之後好似慢慢上到軌道，慢慢執返啲分返黎起碼唔洗再徘徊喺榜尾。 早兩星期佢地對住當時既榜首踢出巴塞水準入四球，今日對住今週榜首又入四球破左對住鄉下隊不勝既紀錄。 唔通佢地係榜首殺手？

今日輸左我地暫時仍然企喺榜首，有啲球迷話想踢多幾年德乙先唔想咁快升班，又話輸左仲好等啲傳媒唔好再講咁多廢話，同埋唔應該咁認真對待榜首位置。 雖然事實上以我地既海鮮波係唔值得升班，但邊有球迷會想自己隊波輸？每次入場就當然想自己隊波贏三分，講到自己真係有選擇權去贏定輸咁。有邊個知我地以後仲有無機會企喺德乙榜首？ 好有可能呢週係球隊歷史上排名最高既一次，可能輸左呢場就永不翻生，點解唔好好享受呢一刻？事實就係我地輸波都（暫時）排第一，事實就係我地去到呢刻既整體表現好過其他球隊，有啲咩唔值得慶祝！我最大既願望係護級成功，越早越好，越近第一越好，等我唔洗最尾嗰幾場要食救心睇波～～

完場後班球員一如以往喺場上拉起橫額繞場一周多謝球迷呢一年既支持，黎到看台前睇得出佢地因為輸波唔開心。 我地只好喺看台上唱歌鼓勵佢地唔好氣餒，capo 都由大聲公同佢地講佢地做得好好，球迷們都為佢地驕傲，大敗一場好似連輸幾場，下年一齊重新出發！！

另一場 Düsseldorf 竟然喺主場對 Magdeburg 大敗 2-5。 好不幸既係比賽同時喺 Magdeburg 市內既聖誕市集出黎恐怖襲擊，雙方球迷得知慘劇發生後全部都停止打氣，作客球迷亦都無心睇波提早離場。 喺呢個時候足球唔再重要….