14.12.2024
英格蘭足球冠軍聯賽 第 21 週
Oxford United - Sheffield Wednesday
Kassam Stadium
賽果：1:3 (1:1)
入場人數：11567 (1492 名作客球迷)
門票：31£
更多相片

喺英國最後一日 full day 我地全家一齊北上去牛津吸收一下文化氣息，由屋企出發只需一直向北花大約一個鐘車程就可以到達。 喺市內有座大型商場可以泊車然後再喺市外遊走。

牛津係一個保存得好好既舊城，最出名就當然係頂尖既大學。 哈利波特好多校園場景都係來自牛津大學，上網可以搵到唔同既校園 tour 可以親身去參觀下拍攝場景。絕大部份既大學範圍都唔可以隨意進出，一係你就要識入讀既學生或者舊生可以帶你入，一係就要報團由舊生帶你行。 由於我兩老唔係特別好哈利波特我地就無報團去參觀校園，喺 Tom Tower 門口望左兩眼，然後去 Bodleian 圖書館附近影幾張相就當見過下。 下次有機會兩個自己再黎既話先再報團去參觀！

市外人山人海但唔會好似喺倫敦咁係咁比人亂撞，所以就算人多個感覺都大分良好。 最重要係呢度今日既天氣超好！！！ 黎左英國六日係第一次見到藍天同太陽，今日喺南部出發時仲係天陰陰咁，去到牛津附近個天有條邊界然後再見唔到白雲。 最後我地去左 Gloucester Town Square 度簡單咁食啲野，嗰度有間攤檔叫香港站 Hong Kong Kiosk，店主一腳踢炒野食同整野飲，我地一行四人叫左四個餐，喺靚天氣下坐喺出面食都完全唔覺得凍。

食完野兩老就自己去行街，我地返去 Westgate 商場外搭 3A 巴士去球場。 車程大約半個鐘，後來有幾個後生仔上車坐我地後面，然後講起：you know Barry Bannan? 我心諗：下？？？／點解去到牛津會有人提起佢 @.@ 唔係問我掛？？ 原來佢係問緊佢同行朋友，呢個 Bannan 而家係客隊錫週三既隊長，原來已經喺隊波踢左近十個球季，可以話係佢地既名宿。 對我黎講佢係我童年既一部份，而家已經無再留意佢，無諗過冥冥中會有人提我今日要留意佢！！！

個 Kassam 球場係一個半完成品，睇個名都知係一個中東人以自己去為球場命名。 條友係牛津聯既前班主同球場擁有人… 球場用左廿年左右黎緊佢地會搬去北部既新球場。賽前我地兜左大半個圈都搵唔到 fanshop， 要問人先知原來係 VIP 入口門口好多人圍住嗰幾張枱就係 fanshop。 我地見枱底有一箱頸巾就同其中一個阿嬸講想買條頸巾，佢好不知所措咁話比兩分鐘佢。 旁邊有另一個人話要頸巾，佢就好驚慌咁去搵另一個阿姐救命。 原來佢地以為頸巾賣哂要搵人去第二度搬貨過黎，到我地問佢枱底呢箱係咪非賣品佢先知原來仲有好多貨。。。

入場後我地好快就出左去看台望下藍天開心下，好羨慕對面班作客球迷可以正面曬太陽！牛津聯上季喺附加賽贏波升班，今季黎到而家表現都唔錯，但睇黎我地為佢地帶黎衰運。 早幾日作客 QPR 輸波，今日對住錫週三喺主場都係輸波，睇黎個 hype 就黎要完！ 作客球迷喺領先後多左人唱歌，當中仲包括聖誕歌！

今場波三點開波仲係天光，去到中場休息時已經開始入黑，完場時五點未到已經黑齊哂。 等兩老黎接我地之後就返去南部，食最後一餐飯，第二去中午出發去機場時同時睇德乙既文字直播。 無諗過我地最後作客贏波升上榜首！！！