11.12.2024
英國足球冠軍聯賽 第 20 週
Queens Park Rangers - Oxford United
Loftus Road Stadium
賽果：2:0 (0:0)
入場人數：14440 （1749 名作客球迷）
門票： 36£ 
更多相片

黎左英國咁多次都未試過一家去倫敦，今次黎到探親諗住可以一齊出城睇下聖誕燈飾同順路睇場波。英超波飛又貴又難買，㨂左一隊無咩吸引力既昆士柏流浪英冠波去打卡。

我地一家五口出發計落點都係揸車抵啲，但揸車入倫敦市中心要比入城費仲未計泊車同埋市內交通，最後我地㨂左泊低架車去 Zone 4 Richmond 既 Park and Ride 停車場，由南部出發只需一個鐘左右既車程，泊足一日收費 25£。對於德國人黎講呢個價錢貴到唔合理，因為喺德國既 P+R 絕大部份都係免費，要收費既話都只係幾歐。 黎到英國去到邊都要比錢～～

泊低架車就可以行五分鐘去到 Richmond 站，搭去 Hammersmith 轉 Piccadilly Line 入城去我地第一個目的地 Covent Garden。 呢個轉另一個目的係比兩老搵下佢地年輕喺唐人街打滾既回憶，我地食完午食就等由佢地自己搵路帶我地行去 Leicester Square。 當時天都開始黑可以慢慢搵去燈飾睇，每次去倫敦之前都有種入城見下世面既期待感，每次去到唔夠半個鐘就唔明點解會想黎倫敦，因為真係好！多！人！ 就連喺街出面都有種行年宵比人推住行既感覺，根本就無得慢慢行或者停低喺店外望下野。

六點左右我地分兩批行，我地兩個搭 Central Line 去 White City 睇波，兩老就去睇歌劇。昆士柏流浪既主場 Loftus Road 位於倫敦既靚區，附近喺呢幾年起左好多新樓，喺啲靚屋中間有座四方盒球場。 隊波叫流浪唔知係因為真係一早諗住流浪定個名註定佢地要周圍流浪，由創會去到六十年代佢地搬過主場無數次，過去幾十年先叫平靜啲可以以 Loftus Road 為家。 近年佢地一直都想起一個新球場，但要喺倫敦起一個新球場就要考慮埋社區基建，要有埋住宅同公共設施之類唔可以齋起一個球場，講到而家都仲未能成事。

睇完場波就只係覺得佢地疊埋心中留返喺度就算啦。 個球場都叫做有啲特色：啲座位出奇地迫！！！ 身為一個香港人已經夠腳短，坐低之後我既雙膝係會撞到前面既椅背！？ 前面個人都已經盡量唔挨到最後都仲會比我既膝頭篤到佢 ._. 而我地既座位視線亦都十分一流： 比一碌柱完美地擋左左邊龍門。無論挨前定挨後我都只係見到半個龍門，而剛到今日兩球波都係喺左邊龍門出現….

客隊牛津聯今日帶左超過千七名作客球迷到場，全部位於我地右邊既上層看台。 全場波只有佢地間唔中叫下口號 blue yellow army； 完全聽唔到主場球迷既任何聲音。 直到主隊喺下半場入波先知道原來左邊遠柱角球旗嗰邊係球迷集中地。 球場氣氛黎講呢場波真係好失望，亦都無諗過一場聯賽波可以圖書館到咁。諗住上年睇史雲斯既氣氛已經夠差，無諗過黎到首都睇叫做出名既球隊可以更加差。