10.12.2024
英格蘭足球冠軍聯賽 第 20 週
Portsmouth FC - Norwich City FC
Fratton Park
賽果：0:0
入場人數：20151（1368 名作客球迷）
門票：30£ (~36€)
更多相片

十二月去英國一轉好似慢慢開始成為傳統咁，英國波最好係好多週中比賽，可以隨時去都搵到波睇。 今次我地一早就㨂左放棄一場德乙，唔想又去百無地方作客偷下懶，改去英國探親同睇幾場波。

呢個星期撞正細佬生日，兩老知我會去英國但唔知我約埋細佬喺機場等然後一齊南下比個驚喜佢地！我地星期一朝早由法蘭克福出發，因為早左準備好哂啲野就早啲出門口搭早一班車，點知撞正火車 delay，班車已經遲左半個鐘黎到變成我地原本想搭車既時間，最後班車總共遲左一個鐘先到市中心，而我地明明早左出門口最後都遲左半個鐘。 去到機場又遇上風尾要 delay 一個鐘先可以飛機。機長要我地準時上機，話有時可以早啲起行所以想我地班機可以隨時準備出發；最後都係要「準時」地延遲一個鐘先可以起飛，到左倫敦就去拎車落去南部～

驚喜一切順利，只係喺混亂之中拍唔到片留個紀念，第一晚一齊去買餸打邊爐之後再打左陣牌就完結。第二日我地去金漢宮飲茶食個壽包，然後就去 Portsmouth Gunwharf Quays 既 outlet 行下街飲杯咖啡到天黑我地就去球場。 屋企人喺附近既 Tesco 放低我地行大約五分鐘就到達球場門口。

我地先去 fanshop 拎飛，喺英國買飛而家幾乎全部都係電子票，有得㨂我地都會零願加錢買實體票。 如果無得㨂的話我地會事先問佢地可唔可以印飛比我地做紀念，暫時大部份球隊都好好肯做呢個安排。 今日我地就可以去 fanshop 拎飛，佢地就即場印張 duplicate 飛比我地，順便買條頸巾做紀念品。

有個 page 叫 Footy Scran 係專 repost 球場小食，入面見過好多英國球迷 post 既小食。 今次特登睇下老樸有咩好食，有樣野叫 Pigs in blankets，即係煙肉包腸仔好吸引。 喺場外見到買左一杯黎食… err… 好難食 cryyyyy 英國腸真係垃圾黎。 喺場外仲買左個漢堡同芝士薯條，食左一半就再食唔到落口。 暫時黎講球場食物最好食係 chicken balti pie，其他野都唔敢再亂試。

歐洲人中意睇英國波既其中一個原因係看台同球場邊線係零距離同無圍欄，今日我地就坐喺邊線第一行！ 喺晏菲路我都試過坐第一行，我記得嗰陣睇唔到球場另一邊個感覺好差，唯一好處係可以好接近啲球員。 今日我地既第一行係低過草皮線，我要坐到直一直先可以見到條邊線，視線黎講又無我記憶中咁差，以一個已經習慣德國波既球迷黎到個感覺完全唔同，成場波都好刺激！！

樸茨茅夫都算係我既童年回憶，起碼喺我場場英超都有睇既時候佢地都係英超既其中一員，第一屆既英超亞洲盃仲有份黎香港！今日終於可以親耳現場聽下球迷唱佢地既放學鐘聲打氣歌 Play up Pompey, Pompey play up！睇得英國波就唔會預佢有歐洲既氣氛，Pompey 球迷佢地雖然唱得唱得都係嗰兩三首但佢地斷斷續續都打氣足全場。 我身旁既球迷都間唔中會加入打氣！ 可惜場波唔爭氣，黎到英國第一場波係零入球 ._.

離場後我地行過幾條街去搭巴士返去 outlet 嗰邊，拎車之後就返去 Southampton，第二日我地又再出城去首都～