06.12.2024
德國足球乙組聯賽 第 15 週
SV Elversberg - 1. FC Nürnberg
Waldstadion an der Kaiserlinde
賽果：2:1 (1:1)
入場人數： 9323 （1400 名作客球迷）
門票：季票
更多相片

今日黎作客既唔止係紐倫堡咁簡單，當中包括佢地既新領隊德國名宿高路斯！！！對方因為季初成績差炒左領隊而搵左高路斯黎接任，佢上任後隊波成績無咩點改進，唯一焦點就係大炒雷根斯堡 8:3，然後到今場開波前都一直不勝，好擔心佢未黎到莎蘭之前就已經又被炒。

我唔可以話佢係我既偶像，但喺我腦海中一直都記得 2002 年世界盃德國大炒沙特阿拉伯嗰場波佢入左三球，細個第一次見到咁高比數既賽果覺得勁震撼，自始佢就成為我心中唔會被提起既英雄。今日有佢黎到牛屎地區作賽絕對係我地既榮幸，就好似之前可以由阿朗素口中被提到 Elversberg 呢隻字咁。 高路斯同 Saarland 都有少少關係，佢細細個就搬左去 Saarland 同 Pfalz 邊境，轉會到凱沙羅頓之前仲短暫喺 FCH 踢過一年。 今日對佢黎講都可以有少少重遊舊地既感覺？

上半季最後兩場主場都被安排星期五晚作賽，唔知點解喺射燈下作賽會比人有完全唔一樣既睇波體驗，唯一麻煩既係我地要提早收工先可以趕及準時去到球場。 我地三點鐘出發，喺繁忙時間下塞車塞左大約廿分鐘車最後喺開波前一個鐘到達球場。 作客看台當時亦都已經幾乎齊人，喺星期五晚都可以有近千四人山長水遠黎到作客，真係只有傳統大球隊可以長期都咁有號召力。

作客球迷今日氣勢超勁，完全無停過打氣。 開波唔夠三個字客隊就已經領先令到班球迷打氣更加落力； Block C 今日想帶起一首新歌，花左一段時間先開始唱得穩定但就被客隊既聲勢蓋過左。 好在喺完半場前我地既 Zimmerschied 喺底線已經被封左近柱既情況下都成功入到波幫我地追和執返少少希望。 下半場我地睇住 Damar 係 Block C 看台前入多到為球隊反超前，呢個時候主場氣氛終於爆炸。 無奈地我地既氣氛同比賽成績有絕對關係…

呢兩星期令我地開心既係，季初骨折既 Le Joncour 上個星期歸隊，而年頭十字韌帶撕裂抖左差唔多一年既 Jäckel 今場都最後可以後備上陣。 佢地既回歸將會令我地既後防更加穩陣

最後終於四戰紐倫堡之後取得第一次勝利！！！！ 我地可以安樂開心咁放假～～ 同埋我又想講下德乙真係好刺激，睇積分數據會話今季係近年最差既德乙，但淨係以今季既成績黎睇真係無人隊有冠軍或者升班相。 拎左呢三分我地又暫時升上第二位，另一隊波係上場炒我地既榜首 Paderborn 對住迷失中既史浩克，榜首竟然喺主場輸 2-4!!!!? 本來佢地有五分距離企喺榜首，輸左呢三分就同我地又得返兩分距離。而中下游既距離又拉近左，睇黎今個比賽週之後啲排名應該又會再大變。