30.11.2024
德國足球乙組聯賽 第 14 週
SV Elversberg - SC Paderborn
Waldstadion an der Kaiserlinde
賽果：1:3 (1:1)
入場人數： 8922 （約 300 名作客球迷）
門票：季票
更多相片

德乙正常有四個開波時間，星期五六點半，星期六一點同八點半，星期日一點半。星期六夜晚場波會有免費直播所以通常被稱為 topspiel (top game)，電視台當然會㨂啲大球隊黎做直播，上季我地一場都未被分到，今季同樣暫時未有份成為 topspiel 份子。 不過，另一種 topspiel 係講上游爭榜首位置，今日我地就係 topspiel 其中一隊。

有數據指出德乙今年既榜首積分係十幾年來最差，即係咁多年來都未試過得 24 分都可以企喺第一。 而我地就以 22 分排第三，星期五間既比賽踢完之後我地即刻跌左落第五位。 但如果今場波我地只要領先就可以喺星期日啲比賽開波前爬升上第一位…. 淨係呢個可出現既情況已經夠全村人充滿幻想！！大佬而家半季都未過就喺度講第一或者升班？？ 唔好唔記得德丙嗰年我地領先差唔多廿分最後都差啲臨尾香，作為一個球迷總係不禁會諗起好多如果， 只係過往失望過太多次，要時刻提醒自己唔好太早幻想太多比自己有假希望！！

賽前幾日球隊話客隊賣唔哂作客看台既飛，所以退左一部份門票比我地可以用黎賣比主場球迷，好快又被搶購一空，個個都想入場睇一場牌面上完全唔吸引既 topspiel。 全德國都勁唔想最後係 Paderborn 或者 Elversberg 升班。 Paderborn 早幾年踢過德甲但由於歷史同地理關係佢地本身都唔算多球隊，亦都唔被視為大球隊。 咁既戲碼除左兩隊波既球隊真係唔會有其他人想睇 xD 只係估唔到對方排第一連三百張飛都賣唔到 ._.

成個十一月好似只係見過太陽兩三次，今日出奇地超級好天完全無雲！ 冬天出現藍天代表又乾又凍，一早周圍都結哂冰，氣溫大約兩度～ 球場塊草皮有部份未被太陽曬到仲有層霜喺面。 另外吸引我地既係草皮對面既新看台睇黎進度唔錯，上蓋嗰幾條鐵已經安裝好，聽球隊講預計下年年初就已經開始開放比球迷入場，淨返既問題只係會點樣安排後備席後面既看台。

作客看台上既球迷雖然人唔多，但佢地企埋一齊集中打氣既效果最後都唔錯。 球員入場時佢地向天射左幾枝煙花，然後放出黑白煙慶祝球迷組織十五週年。好羡慕佢地可以全場都享受陽光，吸哂所有運氣…

德乙今季無話邊隊贏硬邊個，開波後睇落都係五五波，去到廿五分鐘我地成功射入第一球領先升上榜首！！！ Block C 即刻一齊慶祝 SVE 成為德乙榜首，只係去到完半場前比人追返一球，榜首之位我地只能守到二十分鐘，好過無！！！ 下半場我地班球員唔知點解踢得越黎越差，最後比對方連入多兩球反勝重返榜首仲拉開第二位四分。 最後我嗰球仲要係自己門將同後防溝通失誤半送比對方。

當然我地有企榜首之夢，但輸都都唔洗失望，大家都知我地無可能長期贏落去。 輸左仲好等其他人唔好再發夢，專心諗下下一場對住近況唔錯既紐倫堡仲好！ 賽後班球員個個愁眉苦面咁企喺看台前拍手多謝球迷既支持，我地能夠做既就係鼓勵佢地下場加油～ 黎到冬天我地又開始進入謎之狀態，快啲踢埋餘下嗰幾場波等我地可以匿埋喺屋企唔洗捱凍睇波！！