23.11.2024
德國足球乙組聯賽 第 13 週
Fortuna Düsseldorf - SV Elversberg
Düsseldorf Arena
賽果：0:2 (0:0)
入場人數：52000 （3000 名作客球迷）
門票：1€ 
更多相片

今朝電話彈左個五年前既回顧，五年前喺地區聯賽作客贏 Gießen 2:3，當年我地有四十個球迷到場。黎到 2024 年，我地喺德乙去北威州首都杜塞爾多夫出戰，作客球迷人數：3000，繼上個月 1700 人去利華古遜之後，今日又再一次打破 SVE 既作客球迷人數紀錄。

能夠再一次破紀錄要感謝主隊㨂左我地為佢地今季開放日既其中一場。 Düsseldorf 上季推出左 Fortuna für Alle 活動，每季會㨂三場波做「開放日」比主客球迷免費入場，令任何人都有機會參與一個足球同樂日。 佢地個世界盃球場可以容納 52000 人，喺聯賽長期坐唔滿，但去到開放日既門票就一秒被清空。 好在佢地有為球迷組織同客隊先作出特別安排，我地被分派約三千張免費門票。呢個球場既作客區分下面企位區同上層座位區，正常可以容納到五千人。 我地就被分到企位區同旁邊兩個座位區。主隊話上層會分比小學雞唔會預有人可以搞事。

一張波飛其實只係十幾廿歐，本來有啲諗唔明點解波飛免費就咁多人肯山長水遠黎睇波。由莎蘭出發要花大約三個鐘車程先係最貴喎，最後有十二架球迷巴士由莎蘭出發，真係好癲！ 去到比賽日我地喺開波前兩個鐘就到左球場門口，見到好多其他球迷一家大細幾代人一齊到場，我先突然理解到今日真係一個足球同樂日：免費波飛比左個機會（或者係藉口）好多本來唔睇波又或者興趣未大到想比錢入場既人黎參與一下，成家人一齊黎睇既話隨時可以慳近百歐！佢地其他比賽日有無出現過都唔關係，大家今日都係黎支持 Elversberg 先係最重要！

唔知點解去到球場之前都無咩特別期待既感覺，我地七點鐘出發，大約十點鐘到酒店附近泊低架車再轉搭地鐵去球場。由市中心火車站去球場既地鐵車程只需廿分鐘，落車後要圍住個球場行個大圈先去到作客區入口。 我地等埋其他人就一齊入場，一切都意外地順利。

入場後諗住即刻去個廁所先，點知門口排左條長龍！！ 作客區入面有兩個男廁一個女廁，女廁入面得四格。 我慣左平時最多得幾百人去睇波唔會出現排隊既情況，女廁就算要排隊都只要排三四個人，今日三千人入面勁多人同我爭廁所！！？ 最後我㨂左入男廁，但男廁好臭-.- 上次喺利華古遜又係得四格女廁，諗住去男廁但入面成地都係尿勁大陣味我頂唔順寧願忍住唔去。 今日已經係開波前去男廁都係咁臭cryyyy 去完廁所之後唔敢再飲野，唔想要再聞啤酒味既尿 ._.

主隊上季季尾排名第三，進入升班附加賽對德甲既波琴。 佢地先作客淨勝三球諗住升硬班，點知返到主場倒輸返三球要互射十二碼，最後仲輸埋留班德乙。 新一季佢地輸下又贏下一直都保持喺上游位置，黎到十一月仲未贏過一場波狀態低迷既時候遇上我地呢隊奇葩。

今日我要影靚相就要由主隊既球迷大使帶路，今次佢比我㨂想入場邊定去記者席，喺有限度既自由下我㨂左去記者席，起碼我知一定影到所有作客球迷。 影左大約十分鐘後場上同看台都無咩特別，今日好好彩回程時無失波無錯失重要時刻！返到入看台我先知原來個大聲公壞左，到底點解我地永遠去到重要時先會出現呢啲柒事？？？ 入場前話今日淨係帶左一個大聲公，我地話一個夠做啦。偏偏就係今日壞左！ 上半場無人有力帶唱再加上球隊表演只係一般令到看台內既氣氛麻麻地，完全帶唔郁其他球迷一齊加入打氣…

半場休息時時有人整返好個大聲公，終於帶得起氣氛，連同場上球員都開始黎料！ 上半場兩邊都互有攻守，我地差啲運既同時對手既射門就比 Kristof 救哂。 下半場去到 58 分鐘多得對方龍門犯錯比 Asllani 執到雞射入第一球！！ 幾分鐘後對方入波但 VAR 判越位詐糊，再過幾分鐘我地一個反攻由自己半場幾腳傳到去前面，今季加盟既保加利亞國腳 Petkov 終於射入今季第一球！ 2:0！ 之後球證吹手球十二碼比對方，馬後炮下先：我完全預視唔到 Fortuna 會入波，Kristof 一定救到。 最後球證又走去睇 VAR 改判取消個十二碼。 哈哈哈～ 開放日比主場球迷入場見證莎蘭力量！！

班球員終於喺多人作客既比賽下贏到波，賽後黎到看台前一齊唱 2022 慶祝。 好多人好感激杜塞爾多夫送免費波飛比佢地入場親身見證 SVE 贏波。 拎左呢三分我地以 22 分排第三，位於升班附加賽席位！！！ 德國開始驚會唔會最後升班既唔係漢堡科隆等等大球隊，而係柏達邦或者係我地？ 咁樣德甲會變到得垃圾鄉下隊既聯賽，德乙先係大球隊聚集既世界？不過由榜首到第十二位只係相差五分，即係如果我地輸兩場波就隨時可以跌到下游，所以真係唔洗幻想太多，就好似領隊咁講：今季我地無咩大目標，我地只想集中下一場波，最目確既目標係要拎到最少四十分護級。