10.11.2024
德國足球乙組聯賽 第 12 週
SV Elversberg - Hannover 96
Waldstadion an der Kaiserlinde
賽果：3:1 (2:0)
入場人數：9337（1437 作客球迷）
門票：季票
更多相片

作客榜尾被對方泊大巴輸一球之後，今個週末就迎來榜首既漢諾威。 德乙今季黎到第十二週都仲未有一兩隊有明顯既優勢跑出，淨係以我地為例，對升班馬輸三球然後可以大炒柏林同漢堡。其他球隊都一樣，無話邊隊係輸硬或者贏硬。 漢諾威既作客成績仲衰過我地，今日我地有濃霧加乘應該可以挑戰一下。

天氣預報話今日會陰天大霧，起身望出窗只能夠隱約見到對面街。如果我地仲踢緊地區聯賽既話今場波應該尋日就會宣布延期，而家上到黎職業聯賽就只會跟足規矩等球證決定。 令日既天氣即刻令我地諗返起早兩季對弗賴堡二隊同埋夜戰波琴，喺濃中比賽好得意，你淨係聽到對方把聲但見唔到對方。

比賽當日係前漢諾威門將 Robert Enke 安基既死忌，十五年前佢因為抑鬱症自殺而震驚球壇。班作客球迷就準備左一個 choreo 既紀念安基，話比佢知佢永遠都係漢諾威既一份子。

好好彩接近開波時啲霧開始散走，間唔中會有一陣霧飄入球場但無咩點影響能見度。 對方陣上今日有一位舊 SVE 球員正選上陣，佢係我地連續兩季升班既其中一位功臣 Jannik Rochelt。 本來上季先續左約既佢喺今季季初以一百五十萬轉會去漢諾威～ 其實佢上季季尾既表現有啲飄忽，我地反而覺得可以用佢黎賺錢覺得係好事，同時又鄧佢開心可以去大球會爭升班見識一下唔係留喺度以護級為目標。可惜佢轉會後一直未能夠發揮到佢應有既水準，今季暫時無一場踢得足九十分鐘….

去到今日開波十分鐘仲黎一個誤傳將個波送去我地後防腳下，然後我地黎一個反攻，十三秒內由後場去到對方禁區頂， Asllani 傳波去右邊比來自法蘭克福既借將 Baum，佢起腳勁射地波去遠柱死角入網！漢諾威今場既表現完全唔似係榜首球隊應該既水準，反而係我地既表現好得心應手。 去到三十五分鐘左右客隊竟然就已經作出換人調動，換走 Rochelt…. 好慘，但佢真心踢得差，比波唔到位又無身位。 見到佢被換出後我忍唔住拍左兩下手，因為我最驚既係啲劇本通常都係佢一直踢屎波然後對住我地上哂身再收我地皮，換走左就唔洗驚呢一幕 ._.v 完半場前最後一個攻勢由右路長傳轉邊到禁區，Neubauer 由頭二傳比 Asllani 轉身抽入，二比零！

我地既德乙史上第一戰係作客漢諾威以 2：2 完場，下火季佢地黎作客又係 2：2，今日預歷史再重演 2：2 收貨。 上半場領先兩球之後個波膽都仲叫緊糊…. 下半場開波後我地仍然保持優勢，Baum 入完波之後再黎個助攻幫 Damar 搵到機會入波，我地領先榜首三比零，打破 2:2 既魔咒。無諗過喺傷兵滿營既情況下我地都仲可以踢出水準之餘仲入到波，令到我地可以忘記上場失分之痛。

今日喺 Block C 我地有個特別嘉賓～ 半場時我行返入看台時喺看台頂經過一堆人喺度自拍，喺心入面反白眼諗有咩好影呀塞住哂！？ 原來上場喺雷根斯堡傷出既 Schnellbacher 今日黎左睇波。 其他球員喺主看台，而佢就走左入黎企位看台。 佢係我見過最親民最無架子既球員，對小朋友特別好有求必應。佢之後走左落看台底企最前排同我地一齊睇波一齊唱歌～

成功場最唔憤氣係竟然又比呢個 Tresoldi 入波，喺最後一分鐘比佢地追返一球！ 上季兩場佢對我地都有波入，今日賽前佢已經唔知連續幾場無入過波。雖然 Rochelt 劇本我敗，但 Tresoldi 既劇本都係要出現。。。

完場後我地以 19 分排第六！！！ 漢堡同樣都係有 19 分但佢地得失球差多我地一球所以排第五。 如果我地唔係對住啲升班馬失分既話，而家排喺榜首既隨時係我地 xD 漢諾威仍然排喺榜首，但佢地只係得 22 分。 十二週過後竟然可以以 22 分企喺榜首，今週聯賽榜前幾位個個都失分，其實係咪無人想升班？ 講真我其實都唔係好想升班，德乙啲對手正好多！

我地既球員賽後黎到 Block C 前一齊慶祝，唱左一首歌之後 Schnellbacher 就爬左上領唱台送一個驚喜比佢既隊友，啲球員好得意個個笑得勁開心，指住 Schnelly 向前奔走走到黎看台同龍門之間。 最後我地一齊唱 2022 黎完結今日美好既一天。