02.11.2024
德國足球乙組聯賽 第 11 週
SSV Jahn Regensburg - SV Elversberg
Jahnstadion Regensburg
賽果：1:0 (1:0)
入場人數：9048 (200 名作客球迷）
門票：17€
更多相片

週中喺足總盃作客利華古遜出局之後，幾日後我地又要作客去到巴戈利亞地區既雷根斯堡。兩個月前咁啱見到高鐵特價，兩人搭三個鐘半火車來回總共只需六十歐。出發前兩星期收到通知去程火車會遲廿分鐘出發，令到我地到站同開波之間只得返一個鐘左右。

搭得火車就唔預佢會準時，星期六一早去到法蘭克福火車站等架火車黎就已經又遲左十分鐘，最後我地十二點鐘去到 Regensburg 火車站。 出站後搭直通車去球場又等左十五分鐘先開車，等啲主場球迷落哂車後個司機就車我地去作客看台。個車站離球場都仲有一段路，當時離開波只得二十分鐘。行左一段路之後去到一條隧道前有一道閘，諗住叫保安開閘比我地行去作客看台，點知指我地要行返轉頭喺另一個位入。行左個大圈後喺閘後又見到個保安，巴戈利亞真心好 on9 。過左隧道再行一段路終於入到場，當時我地應該係最後兩個到場作客球迷，總共有大約二百人到場！

Regensburg 前季由乙組降班落丙組，然後今季立即成功上返德乙。不過佢地開季後既成績似乎又要準備降班。佢地上星期之前踢左十場波總共只入左一球波對住另一隊升班馬贏過一場，上星期同州打比作客紐倫堡入到三球波但失八球穩守榜尾位置。 週中佢地同樣要出戰足總盃竟然能夠踢同樣喺德乙出戰既同州對手 Fürth 出局。 今日喺主場迎戰 SVE，喺賽前好多 SVE 球迷已經預見到個結果： 我地會輸波。劇本係劫富濟貧，對住勁旅贏得清脆然後對弱旅就輸波。

開波後廿分鐘唔到對方入左球場之後就全場死守，成場波我地既控球率近八成，長期喺對方既禁區外搓黎搓去就係唔起腳射波。完上半場前我地既前鋒 Schnellbacher 受傷被換出 🙁 呢幾個星期我地越黎越多傷兵，唔知捱唔捱到去歇冬 T_T 最後都係搵唔到機會破網送左三分比榜尾。 去到今週我地已經對哂三隊升班馬，兩負一和。

作客看台內既氣氛算係唔錯，大家都無執著輸贏，唔知點解個個真係預左輸波咁。只係輸波總係會有啲失落，輸比德甲聯賽冠軍就話心服口服啫，對住同聯賽既榜尾咁樣輸波。完場後球員黎到看台前係咁e 拍下手叫幾下就算。賽後我地行返去搭巴士去市中心，食埋飯就返屋企。