29.10.2024
德國足總盃 第2圈
Bayer Leverkusen - SV Elversberg
BayArena
賽果：3:0 (3:0)
入場人數： 29787（1900 名作客球迷）
門票：17,60€
更多相片
我地既奇妙之旅由 2022 年開始數起，成為西南地區聯賽冠軍之後以德丙升班馬姿態喺足總盃首圈主場迎戰當時爭標熱門利華古遜，最後我地以 4：3 踢左佢地出局大挫佢地既信心，後來佢地連輸幾場之後炒左領隊迎來沙比阿朗素，上年全季不敗終於擺脫二奶命成為德甲聯賽冠軍同足總盃冠軍。 而我就已經經左佢地兩年，點解唔早啲搵沙比黎執教等我可以近距離見下佢！！！！？ 唔係 SVE 佢地都唔會搵沙比黎就唔會有今時今日既成就囉！！
點知今季終於比我成日怨到再戰利古華遜比佢地覆桌，唔同既係我地要去作客。 我估如果早兩三季話要去作客利華古遜應該無咩人會覺得好特別，但今時今日我地係去作客應屆既雙冠王，可以同隊人多個國腳較量，又係另一個奇妙之旅既開始，我又可以去見下沙比～～～
由第二圈開始既比賽都係定喺週中，我地場波就係星期二傍晚六點開波，由莎蘭定法蘭克福出發都要預最少兩個半鐘既車程，即係最少都要拎半日假。 我地預會有一千人左右一齊去作客，最後作客區竟然賣出接近二千張飛！！！ 一千九百人去作客係球隊既新紀錄，佔條村人口 14%！！
平時我唔會睇賽前記招，去到賽前一日比新聞標題吸引到，Kicker 引述沙比話 Elversberg 同利物浦都值得一樣既尊重。 淨係見到呢一句我內心即刻有種莫名既激動，利物浦係我細個遙距支持既球隊，沙比係利迷其中一個最愛呢樣唔洗多講，後來 Elversberg 成為我其中一樣最重要既生活一部份，我無諗過呢三樣野會被放埋一齊講，實在太神奇。 沙比提到利物浦係因為佢地下星期會去出戰歐聯，佢仲話佢有留意 SVE 既比數，知道唔可以輕視隊波，又數得出我地過去幾場波既賽果。 最得意係佢唔可以流暢咁講 Elversberg 呢隻字，我聽西語同事講佢地好難發 V 字既音，聽得出沙比次次都 lur 住講 Elversberg xD
星期二準時中午放工，食完飯就向西出發，最後大約三點半喺市中心泊低架車，再行大約廿分鐘去球場。 幾年前我地搭火車黎過睇佢地主場對哈化柏林， 今日就怕可能要加時同十二碼所以揸車就自由啲。 去到球場門口就同主隊既球迷大使同保安溝通陣間點樣比我去場邊影相，今日佢地無安排工作證，只係特別準許我喺保安帶領之下喺開波前同開波後既五分鐘可以落場邊。呢樣係我最憎既安排，因為呢啲安排唔係比我喺作客區最底開閘落場邊，而係要離開看台再經外面既通道入去。每！一！次！夠鐘之後回程時對方都會入波……. 如果唔係有咩特別事或者真係喺看台內搵唔到位影相既話，無工作證比我可以長企都唔會想去場邊。
今日係 Horst Steffen 成為我地既領隊六週年紀念，六年！ 呢六年真係發生左好多事，六年前既今日我地都未搬到去法蘭克福，六年前今日我地仲踢緊地區聯賽，六年前今日無人諗過會有武肺既出現。 我地準備左一小塊海報去致敬： 6 Jahre ein Teil von uns – 已經成為我地一分子六年！聽住足總既主題曲既同時見住我地班球員同聯賽冠軍球員一齊步入球場，心中唯一希望係大家可以好好享受呢場波。 輸波就預左，但最緊要盡力！
點知對方搶到第一個攻勢之後就喺兩分鐘射入第一球，乜 Schick 唔係補時階段先識入波架咩。。。。上場對漢保講過早失波有時反而仲好，起碼仲有成場波可以追得返。 七分鐘左右保安就帶我入返去作客看台，果然當我擰轉頭步入通道既時候背後傳來慶祝既聲音加音樂，Schick 踢入第二球。 返到入作客看台，見到大家仍然好有動力咁打氣。兩球難追但唔係無可能既～ 不過我地場上既表現真係低一級，人地既傳波走位勁流暢，到我地有機會既時候又可以補返啲漏洞，去到三十幾分鐘對方更憑罰球射出世界波死角破網。
失到第三球之後既時間都係希望唔好再失波或者入到一球做目標 ._. 慶幸既係作客區內大部份既球迷唔係只係諗住到此一遊就算，大家都希望可以比啲球員知道落後同輸波我地都會繼續打氣。 下半場既氣氛反而比上半場更加強勁！ 主隊後來都可以收手，令我地反而多左機會，角球最後去到 3:12 ，起碼有一數據好過雙冠王 ._.v
完場後我地等球員黎到看台前一齊為佢地鼓掌，唱左幾首歌之後就呼喚領隊黎到接受球迷為佢而製既小禮物多謝佢呢六年黎帶領我地創造歷史！回程時睇下其他人既留言，個個都為 SVE 感到驕傲，完全無人留下一句負評，下年再黎過囉～～ 其他球迷就好驚訝週中早波竟然可以差唔多企滿作客看台。 喺記者會開場時 Steffen 話班球員喺更衣室仲係處於一個難以置信既心情，覺得好榮幸可以親身見識到主隊既實力，仲多謝利華古遜同我地一齊踢左場好波。 另一場禾夫斯堡嗰場波有小豬同埋另一個出名既主持一齊做賽前報導，佢地都有提及到 SVE 話我地有一個難忘既盃賽經驗～～
今年既盃賽夢又去到第二圈止步，但留喺我地既記憶唔止賽果，仲有喺一個星期二既夜晚同近二千個球迷一齊去作客！下年再戰！