26.10.2024
德國足球乙組聯賽 第 10 週
SV Elversberg - Hamburger SV
Waldstadion an der Kaiserlinde
賽果：4:2 (1:1)
入場人數：9502 （1800 名作客球迷）
門票：季票
更多相片

漢堡最近狀態唔錯已經六場不敗，然後又要黎到鄉下地方遠征作客佢地最怕既 SV Elversberg。 上季佢地開季不敗士氣高昂咁黎到作客，點知比我地收皮。今季去到賽前佢地既球迷主要分為兩堆：一堆覺得上季既惡夢會再重演，一堆就覺得鄉下隊容易搞掂啦。

今個星期既天氣開始轉冷，黎到週末又回暖返少少。 星期六一早起身個天都仲係陰陰地，但天氣預報話一點就會開始好天，咁我深信開波之後可以見到下太陽。 由屋企出發去 Elversberg 全程路上都只見濃霧，原本話有 18 度最後都一直只得 11 12 度左右。

球隊今日又出左主客頸巾，佢地今季已經出左科隆同凱沙羅頓既主客頸巾，今日對漢堡又出黎掠水。 喺自己既看台入面見到其他球隊既會徽好眼冤囉，好在越黎越多球迷對球隊呢個舉動好反感，叫人去幫襯球迷組織買球迷自製既商品反而仲好～～

漢堡好多球迷都一早就入左場，有一班人入場準備 choreo，係作客看台前掛起一大塊布。 核心成員就去到開始前三個字先出現，趕頭趕命咁喺塊大布下掛起組織同其他球迷會既旗。 睇住佢地掛旗既時候球員就已經行緊入場。 同時佢地就打開看台前既大海報，Hansestadt Hamburg － 漢莎城市漢堡。 漢莎呢個字大家都知航空公司係用漢莎命名。 Hanse 或者 Hansa 係一個歷史悠久既商業公會，主要成員都係來自德國北部同埋其他歐洲既海港城市。 HSV 球迷就以呢個簡單又有力既 Choreo 展示佢地既城市同球隊既地位。 看台上既球迷同時舉起代表球隊顏色既黑藍門旗。

坐正喺佢地對面既主看台就食正哂作客球迷既打氣聲，佢地過千名球迷一齊唱歌去撼我地 Block C 內既（會參與打氣既）幾百人，我都要好專心先可以聽到 Block C 唱緊咩歌。 開波唔夠六分鐘 HSV 就已經把握到機會入波領先，唔知點解咁早失波我反而唔怕，我覺得反而可以令班球員更集中同埋仲有大把時間可以追。 後來客隊都仲有一兩次有威脅既埋門。。。。 去到完半場前，最近開始比人覺得佢廢廢地既 Asllani 係禁區外面帶住個波自轉都無人埋身，然後起腳一抽就近柱射入追和！！！

對呢啲大隊真係拎一分都已經收課，但仲有下半場我地仲有排捱。 開波後我地都長期㩒住漢堡黎踢，好多時候個波都喺正 Block C 前既禁區飛黎飛去。去到 53 分鐘 Asllani 喺門前執到雞為我地反超前！ 十分鐘後再有真球王 Schnellbacher 入多球，3：1！ 去到呢個時候漢堡都開始急，雙方球員都踢得越黎越唔錫身同越黎越多碰撞。 八十二分鐘客隊有個角球接應頂入追成 3：2，佢地就更加急同更亂。

呢個時候我只有兩個結果，一係佢地乘勝追擊追和 3：3 完場，一係我地唔小心再入多一球等佢地死心。 尾段有幾次受傷時間令到最後補時九分鐘，好在我地班球員終於學識領先緊係唔需要同急，碌下地手指指慢慢行咁浪費下時間好過，上季季初我地學識十分鐘可以由領先變反輸架…. 96 分鐘隊長 Fellhauer 又再喺禁區頂半窩利抽入射成 4:1 ._.vvvvvvv

哈哈哈哈哈哈哈，我地又再一次喺主場擊敗來自世界知名大城市漢堡，如果你唔知 Elversberg 係咩黎既話可以搵個漢堡球迷講解下你知。 好多人都問春天係咪已經來臨所以漢堡又要開始甩碌？ 賽後班球員黎到看台前同我地一齊慶祝， 我地又同來自法蘭克福既借將 Elias Baum 唱生日歌慶祝。 呢個小朋友今日 19 歲生日，無入波但有助攻，祝佢快高長大！

德乙喺呢個星期六暫時踢左六場波，今場我地有六個入球都未能成為本週最多入球既比賽。 星期五晚紐倫堡自己都入夠八球，今日另外兩場總共有七個球場。 德乙真係好刺激，無話邊隊獨大，今日我地比人大炒完下場可以大炒返人。 睇個勢下個週末去作客雷根斯堡可能會成為佢地出氣既對象輪到我地又比人大炒…