20.10.2024
德國足球丙組聯賽 第 10 週
DSC Arminia Bielefeld - VfL Osnabrück
Stadion Alm
賽果：3:1 (0:0)
入場人數：25752 （約 3500 名作客球迷）
門票：25€
更多相片
唔係為左 SVE 都唔會走去呢個西北大平原，德丙年代去過 Oldenburg, Meppen 呢啲更加荒野既地方。今個比賽週我地要去 Münster 就睇下可唔可以順便睇多場波，因為呢個距離十分雞肋，近得黎又太遠，揸三個幾鐘車淨係為左一場波好唔抵，最後估唔到竟然可以有機會第一次去睇 Bielefeld！
曾經有人喺 on99 咁話 Bielefeld 係一個不存在既城市，自始呢個城市既存在就成為一個都市傳說，唔親身去過都唔知原來真係有一個叫 Bielefeld 既城市 xD 隊波係德甲乙既常客，係北威州其中一隊傳統大隊，有超強大既 fanbase （我估都係同其他荒野城市一樣，附近乜都無就只好睇波娛樂下自己） 佢地最近就喺武肺期間踢左兩季德甲，上季跌左落乙組之後，今日直跌落丙組。
佢地有個為球隊效力左十二個球季既名宿叫 Fabian Klos，上季季尾剛剛退休。本來喺 DSC 升上德甲踢完第一季之後諗住唔續約，去到第二季佢話唔忍心見到隊波要降班時自己就拍拍蘿友就走左去，決定續約踢多一年， 點知落到乙組球隊仍然踢屎波，最後要輪落到要踢附加賽，首圈輸 1：2，去到次圈作客慘吞四蛋確定降班。 去到比賽尾段啲球迷已經發哂癲導致比場暫停，當時個個球員都走哂去更衣室避班球迷，只有隊長 Klos 先坐喺後備席獨自爆喊，然後走到去作客看台前安撫班球迷。 賽後訪問佢話今日係佢個仔一歲生日，而我就喺呢度面對住啲咁既野。 佢又話完全理解球迷既反應，隊波踢得咁差佢又有咩理由去嬲班球迷。 佢陪隊波落到丙組再踢多一季直至上季季尾正式掛靴。由細到大最中意就係見到呢類球員，真男人！！！因為佢我對隊波都有少少好感～～
星期日一早我地先喺酒店食個靚早餐，checkout 之後去城堡兜個圈，喺 Münster 逗留多一個鐘左右就北上出發去 Bielefeld～ 喺西北平原揸車我地中意避開高速公路，沿住郊區農田既路遊車河。 呢區既屋好多都係由紅磚做外牆，全部都好靚～ 個半鐘之後就到達 Bielefeld 火車站附近既停車場泊低架車，步行多廿分鐘左右就到達球場 Stadion Alm。 球場位於住宅區，行去球場既路上會離遠就見到一堆屋頂後面就係球場頂同球隊 logo，呢個視覺有一種英國既味道～ 我地預早左好多時間到門口，仲早過主隊球迷組織 Lokal Crew 到場，睇住佢地一行兩三百人喺我地面前經過，可以近距離評頭品足一下，但佢地個個都正常樣完全無奇怪人！！
今日呢場波係一場鄰州打比，客隊帶左三千幾名球迷一齊搭火車去踩場。 我地入場後除左主場球迷看台已經企滿哂之外，左邊作客看台企位區都已經滿哂。客隊既球迷組織今日全部聚集哂喺座位區，因為企位看台既位置實在差得過份！！每次喺電視見到呢個作客看台都不禁會問到底點解會設計成咁？ 如果你企喺最左邊直望既話會係望到主看台既牆邊，企係看台底既話真係唔會見唔見到塊草皮？？
等到球員熱身完畢，作客球迷喺人海中拉開幾塊旗蓋頭，代表黎緊會有好野睇！！！同時雙方球迷開始各自唱歌打氣，未開波就已經感受到打比戰既氣氛！ 等到球證吹雞開波後，班球客球迷就拉著煙火，成個看台都燃點起紅色既火光，同時變得煙霧瀰漫！啲煙沿住風勢吹向主看台上層去到主場球迷看台，我地喺下層乜煙都唔洗吸._.v
DSC 既球迷組織以南看台上層為據點，下層有兩大區都長期會加入一齊打氣。 雙方球迷既參與度都十分之高！ 無諗過我地坐得比較近作客看台都仲可以聽得清南看台既打氣聲。 我地附近仲坐左唔少作客球迷，當作客看台唱歌：為 VfL 企起身～ 既時候… 身邊一個個震震地咁慢慢企起身。 坐係邊線兩邊看台既球迷通常都係正常人，只要唔係有特別過激行為既話就唔會有事。 我地呢個看台都有唔少主隊球迷組織既人喺度睇水，有咩事佢地可以即刻衝去作客看台… 上半場因為互無紀錄所以都大致平靜。
下半場開波幾分鐘終於都有入球，幾驚會悶和完場呀！！ DSC 上季差啲要直降落地區聯賽，最後僅僅保住第 14 位護級成功，而 VfL 就係德乙包尾降班落黎。 今日係聯賽榜上游對聯賽榜包尾。入完一球之後場波就開始膠著，當我地以為會就咁完場既時候，VfL 竟然追返一球，推一推高返場內氣氛。
呢個時候終於有 on9 仔出現，有個戴住 VfL 頸巾既男人喺我地面前有挑釁意圖咁慶祝，有幾人即刻向佢掟野飲搞到佢全身濕哂，然後佢又開始嬲嬲豬。 坐喺第一行有個後生仔即刻扯佢埋黎問佢想點，後幾行有人準備衝落去扑濕佢，啲保安即刻衝哂過黎推走個男人，大家手指指多一陣就平靜返。 條友入去買野飲未出返黎主隊入多一球領先返～ 佢勁無引咁拎住幾杯啤酒出黎頭 dupdup 行返埋自己個位 😀 完場前再入多粒連追和既希望都抹殺埋！
完場後雙方球員各自行去自己既球迷面前，一邊開心咁慶祝，一邊就比球迷鬧下。賽後 DSC 升上第三名，而 VfL 就穩守榜尾，唔知佢地會唔會學人地連降兩班呢？