19.10.2024
德國足球乙組聯賽 第 9 週
SC Preußen Münster - SV Elversberg
Preußenstadion
賽果：1:1 (1:0)
入場人數： 11507 （330 名作客球迷）
門票：19,50€ （企位）
更多相片

少部份既資深球迷喺十年前德丙年代已經黎過 Preußenstadion 作客，我就今日先第一次黎，而呢個球場係我今季德乙唯一未去過既球場，算係再次完成一個里程碑～

Münster 係另一隊由地區聯賽直升上黎乙組既球隊，同 Ulm 一樣表演一般，人地已經成功作客同主場都贏到一場波，而 SCP 就仲等緊係主場開齋。 呢個劇本唔知點解好似會由我地去幫手上演咁…. 望下天氣今日天陰陰一齊有毛毛雨，總係有種不詳預感！！！

由法蘭克福出發我地預左要大約三個鐘，再加一個鐘 buffer，最後就算要穿過塞車大鎮 Lüdenscheid 都完全暢通無阻，勁順利咁開波前兩個鐘就已經到達球場門口。 比四歐就可以泊係作客看台入口面前，完全值得～ 賽前既作客球迷資訊係話會有即場售票，去到賽前一日突然改口話唔會有即場售票，同時網上售票亦都已經完左。 我地圍內最少有十幾廿個未買飛。 球隊話有溝通誤會，其實原本就唔會有即場售票。 主隊話驚佢地既球迷可以混入一個唔滿既作客看台去搞事，咁我地既球迷大使就去同佢地傾到最後肯搞現場售票，但入場時要查身份證。 歐洲既身份證通常有會印有現居地址，佢地查身份證係為左睇地址黎確定入作客區既人唔係當地人。

入到作客區見到好多其他球隊既貼紙，對上一隊黎作客既係史浩克，再早少少就係史特加。 看台前有一大個史特加既 graffiti，看台內就有多款史浩克既貼紙，好多都好靚好想撕幾張拎返屋企留念！！ 作客看台既右邊龍門後係一幅廣告場。 呢個球場既翻新工程已經進行左好多年都無進步，唯一大變就係拆左其中一個彎型看台。 醜係醜左啲，但好贏係呢個看台本來係作客看台，即係無上蓋既看台！！ 而家我地可以企係有鐵皮遮頭既看台真係要好感恩，望住左邊龍門後既主場球迷…. 即刻諗返起地區聯賽既時間，以前我地都係要日曬雨淋，反而係作客球迷先有瓦遮頭！！

今日出乎意料有三百人到場，喺電視望落去好似好滿咁～～ 上半場我落左場邊影相，同時又可以企遠啲可以聽下主場球迷既打氣聲。 早兩年我地睇過佢地作客，知道佢地既特色係唱…..得…… 勁………慢，真心想知佢地點樣保持都龜速拍子去唱歌。 今日喺場邊我算係企喺兩邊球迷既中間，得三百人既我地既聲勢完全可以同主場班友相比！！？？ 佢地間唔中有叫下口號係唔錯，但都係因為有其他看台既球迷幫下口，一開始唱歌我係完全唔知佢地唱咩。

SCP 係北威州其中一隊大隊，以前我對佢地既認知都係德乙丙既球隊。 只係早幾年跌左落地區聯賽浮浮沉沉咁，上季上返上丙組之後就成功拉車邊直升上黎乙組～ 終於有機會比我可以黎見識下！！！ 我地陣中有幾個人都同隊波有啲關係，領隊 Steffen 曾經執教過 SCP 最後要降班。 但我聽講啲球迷無憎佢，反而覺得當時佢黎得太遲無時間執返好隊波。。。 而我地既射手 Schnellbacher 都曾經效力過 SCP，當日都有唔少球迷歡迎佢返黎。

開波後大約二十分鐘，佢地有一個埋機門機會就成功破網。 我地班球員其實踢得唔錯，只係唔知點解對方永遠都有隻腳凸左出黎擋走個波！ 都係嗰句，見到天氣咁差就知我地唔會贏到波。 下半場我返入去看台，位於邊線既看台唔好處係視線好易受阻， 我地仲要攻向左邊大部份時間我都唔知場上發生緊咩事，唯有專心唱歌大叫下希望有奇蹟～ 去到尾段個天突然變光，我即刻話機會黎啦！！！果然我地既隊長係禁區頂二十碼勁射破網追和！！ 主隊過去兩場都係先入波後失分，睇黎今日都係同一結果。

最後一比一完場，有三分當然好，但呢一分大家完全收課。 最主要係睇得出隊波有落力去搵機會，對方下半場走黎玩泊大巴，要狂攻先搵到一個空位同埋神來之筆先入到波。 完場後班球員黎到看台前同球迷致謝，大家就喺一個歡愉既氣氛下離開～ 今週過去我地繼續企喺第八位！

賽後我地去到市中心既酒店休息一陣之後就去行街。 Münster 係北威州其中一個無喺戰爭被摧毀既城市，有舊城區同多座教堂，市內既建築物全部都好靚！ 當地仲有大學，令到成個城市都好有活力，好多舖頭仔同 cafe 仔同埋周圍都好乾淨！ 我地喺度留一晚係因為第二人喺附近仲有另一個行程….