05.10.2024
德國足球乙組聯賽 第 8 週
SV Elversberg - 1. FC Kaiserslautern
Waldstadion an der Kaiserlinde
賽果：1:0 (0:0)
入場人數：9502 （約 2500 名作客球迷）
門票：季票
更多相片

喺柏林返黎六日之後又有波睇，今日我地喺主場迎戰鄰居凱沙羅頓。 對方開季對住升班馬贏過兩場波之後就連續四場不勝，我地雖然啱啱喺首都踢左場好波但過去幾場既戰績證實隊波既水準有啲海鮮，不過當然希望可以再次喺主場可以贏到西南地區最受歡迎既球隊，幫莎蘭人威返一次！

對我黎講今個星期過得十分快，由柏林返到屋企唔夠六個鐘我又要出發去慕尼黑，同同事一齊去啤酒節，星期四係公眾假期，星期五有朋友黎屋企作客一齊焗蛋撻～ 星期六一早就由法蘭克福出發去莎蘭，泊低架車就行上去球場。 去完啤酒節例牌會病，去到今日都仲有少少宿醉既感覺，日日都好想食湯麵或者食一大塊既肉。 德乙喺星期六既開波時間係一點，我地通常十一點幾十二點就已經入左球場，呢個時候都仲未有胃口食野。 今日十一點未到去到球場門口我就喺場外買左塊炭燒豬扒包，完全滿足左我既靈魂。

凱沙羅頓係好多莎蘭人支持既大球隊，因為佢地係離莎蘭最近既傳統勁旅。而佢地其中一個最大既死敵係 Saarbrücken，我地對佢地黎講只係一個毫無殺傷力既鄉下隊，要同我地踢同一個聯賽絕對係一個恥辱。 又唔知點解佢地對我地好似有啲不知所措咁，到底應該視我地為鄰州敵人好，定係保持現有良好關係？老實講兩隊波其實都無咩關係，但普遍黎講 SVE 球隊同球迷都有種仰慕凱沙羅頓既情感，只係希望可以喺大球隊面前踢返場好波幫莎蘭出一口氣。 而佢地暫時算係選擇左無視我地。

球迷組織喺賽前派人企係入口監視入場既球迷，確認無作客球迷可以混入黎球迷看台。通常都係啲上左年紀既人覺得自己只係普通球迷話自己兩隊都支持，但全部都無情講，總之你有任何外隊既球迷物品就唔可以入場。 佢地可以選擇一係唔入場，一係就去場外搵職員交低波衫或者頸巾，賽後先去拎返。 C1 看台算係能夠把關成功，但作客看台旁邊最後都有少數作客球迷成功混入到去。

一如以往上半場我先喺主看台影下相，正面感受下作客球迷既打氣聲。 無論球迷定球員，對方喺上半場既表現都喺 SVE 既上準之上。 我要好集中先聽得出 Block C 唱緊咩歌。 而場上客隊有多次有威脅既埋門都差少少先中龍。 下半場我返到去 Block C，大家覺得自己既表現唔錯，完全聽唔到班作客看台既聲音，甚至覺得兩星期前既 Ulm 更加大聲！

下半場我地既球員脫胎換骨長期㩒住 FCK 黎攻， 有幾次必入球都把握唔到；如果再係咁落去我地應該就會開始失勢最後輸波。 去到 66 分鐘，Damar 接應右邊傳中一腳射個波入龍！！！呢球迷出現既時間剛剛好，成功推返高班球員既動力繼續去做壓迫。 看台上既氣氛亦都越黎越好，見到主看台好多人都有跟住拍下手～ 去到尾段我地同主看台互叫 SVE, 聽到作客看台齊叫 Hurensohn 回應。 拿，係你地帶起先，我地就改口叫 Scheiss FCK 左幾次。 賽後有啲球迷不滿我地做咩要叫對方食屎破壞關係（呢樣都可以證實點解我地既關係有啲膠著），不過我地都只係視為一個普通既回應，憎恨始終係足球既一部份！

球證吹雞完場後，場內既 SVE 既球迷又再一次可以係班紅魔鬼面前大肆慶祝！！！ 對方連續五場不勝既同時我地連勝兩場成功爬升到聯賽榜第八位！ 賽後有數據指出，上半場雙方球員奔跑距離都係差唔多，下半場 SVE 球員比作客球員跑動多八公里，淨係睇數據都可以了解點解佢地下半場失勢毫無反擊力。 anyway, 又一個三分週末vvvv