29.09.2024
德國足球乙組聯賽 第 7 週
Hertha BSC - SV Elversberg
Olympiastadion Berlin
賽果：1:4 (0:2)
入場人數：43123 （300 名作客球迷）
門票：17,60
更多相片

上季我地喺寒冬作客柏林慘敗而回，今季賽程一出見到係九月尾再黎到作客諗住可以好好做多次遊客，點知同一個週末有柏林馬拉松五十週年，當地既酒店唔係爆滿就要成二百歐一晚。 最後我地決定只留一晚。

場波最後同上年一樣定左喺星期日上演，而星期六下午有另一場好吸引既德丙賽事，來自莎蘭既 Saarbrücken 會到德國波蘭邊境作客 Cottbus，場波只係離柏林一個半鐘車程。 同幾個朋友夾左一齊會去睇呢場波，我地訂左火車出發，佢地就揸車。

為左趕得切去睇呢場德丙，我地㨂左朝早六點半由蘭克福出發到柏林既火車，大約十二點到達就再轉地區火車去 Cottbus。我地天未光五點鐘就出門口，去到市中心食早餐時收到 email 話班火車因為技術故障而會遲一個鐘。 一個鐘右話會再遲多半個鐘。我地最擔心既係趕唔切去 Cottbus， 夾硬迫自己向好既方面諗，起碼今日我地錯過既只係場德丙而唔係 SVE。 同時就打電話比朋友叫佢地黎法蘭克福接我地，最後一行五人一齊向東德出發！

當時我地諗，求神拜佛 SVE 明天生性踢返場好波，等我地可以諗返轉頭覺得今日點樣諸事不順同迫車去柏林都會係值得既。 賽前我都唔敢亂咁講野怕烏鴉口，但我內心一直都覺得我地會贏波，只係無諗過會咁樣贏 ._.v

星期日十一點我地又再迫車由酒店出發去柏林奧林匹克運動場，年頭我地喺柏林過夜去 Rostock，完全無機會踏入柏林市中心，今次我地又係只係喺柏林邊境出沒，但總算安全到達其中一個地標。。。泊低架車之後就行去南入口，喺球場外同其他人集合之後就一齊入場。

上季我地有六百人到場，今日只有大約三百人，唔多唔少都好失望，淨係講球迷組織既核心人物中只有十個左右到場。 有啲後生仔講到明佢地無錢黎呢啲明，而我地都知星期日要橫跨成個德國再花幾百歐都唔係個個可以負擔得起。 鄉下隊就係鄉下隊，無人就係無人。 向好方面諗，上場作客 Fürth 都係二百五十人左右，今日多一倍既距離都有咁既人數我地應該要收貨！

開波前我又走到去主看台準備影相，柏林既東看台一樣係咁有氣勢，個個一齊 hahohe。望去作客看台就即刻好失落… 好在開波唔夠三分鐘我地就靠十二碼開齋，當時好驚會唔會重演上季慘敗既情景？ 一早領先然後倒失五球，點知過多廿分鐘襯對方失誤射成二比零，但我地都未敢放鬆。喺東看台安靜落黎既期間可以聽到作客看台微弱既叫聲，有一兩次咆哮 ELVERSBERG ELVERSBERG 更加成功吸引到主場球迷既注意而獲得噓聲，衷心覺得榮幸！！！

下半場開波唔夠十分鐘我地既借將 Damar 首次入波將比數拉開到三比零，好癲！！！ Damar 係由賀芬咸借過黎，但原來佢係柏林出世，仲曾經效力過哈化柏林既青年軍！ 今日算係倒戈證明比柏林睇佢地走漏眼～ 我地隊中仲有另兩個柏林出世既球員 Schmahl 同 Asllani，全部都係由賀芬咸借或者轉會過黎。 季初作客馬德堡時佢既屋企人有入場支持 Schmahl 有同佢地傾下計先知佢係柏林人，今日黎到柏林出賽，好多來自佢母會同埋親朋戚友黎左作客區支持佢，多謝佢地幫我地填下空位仲會一齊參與打氣！

六十鐘柏林追返一球但都於事無補，因為我地五分鐘後又有一球手球十二碼再拉開比數至四比一。 今日唔知點解個球證好似有啲偏幫我地，聽得出啲主場球迷都好不滿球證既表現。 但我可以話班球員既表現就算無嗰兩球十二碼我地都會贏到波！ 前面多次把握到對方後防犯錯而偷到雞，後面同時多次清走危機，加上有神龍 Kristof 把關，比佢地入到一球只係唔好彩。 對方有德乙其中兩個身價最貴既球員，但班波好似夾唔黎咁，所以先比我地睇通到失誤～

完場後等到啲球員黎到看台前簡單慶祝一下就一齊慢慢離場，呢隊波得意既地方係成日慘敗完反而第二場就可以翻生。賽後訪問班領隊同球員都話佢地喺上場輸左波之後一齊反醒同檢討策略，最後決定要踢得再進取啲，真係好希望可以咁樣保持到落去！離場後我地要去 Spandau 搭五點半既火車回程～ 呢三分完美地補救左我地既週末，仲有抹走上季黎作客既陰影！ 鄉下隊作客首都隊，成功喺一個可以容納條村村民十次既奧林匹克球場取得三分，留名青史！