28.09.2024
德國足球丙組聯賽 第 8 週
FC Energie Cottbus - 1. FC Saarbrücken
Stadion der Freundschaft
賽果：4:1 (2:1)
入場人數：10530 （462 名作客球迷）
門票：28,80€
更多相片
當我地知道對哈化柏林會喺邊個週末上演之後， 首先得知同一個週末會有柏林馬拉松所以酒店會好貴，要住遠少少先搵到價錢合理既酒店。例如位於柏林西南部既 Potsdam，諗住有機會可以去睇地區聯賽既 Babelsberg， 然後佢地場波被定同樣喺星期日。 後來睇中左離柏林個半鐘車桯既 Cottbus 會喺主場迎戰我地既鄰居，第四位對第五位，場波應該會幾好睇之餘又可以睇到兩邊既球迷。
柏林嗰篇提及過星期六出發時既一片混亂，但我點都要再喺呢度再講下場惡夢。 我地既計劃係搭 6:50 分由法蘭克福南站出發既 Flixtrain，十一點鬆啲到柏林，然後有個半鐘時間可以喺柏林火車站度食個 lunch 再轉地區火車去 Cottbus，預計兩點前可以到達。咁就仲有兩個半鐘先開波，可以去到當地散個步欣賞下東德蘇聯式建築（或者一個可以形容：醜）先再去球場睇波。
我地五點鐘出門口，去到南站買完早餐之後收到通知話班火車會遲一個鐘，心諗我地一早起身就係為左喺火車站呆企一個鐘？以前我地都試過搭車中途架車故障而無啦啦預計會遲半個鐘，後來好好彩好快搞得掂最後只係遲左十分鐘。 一開始我地仲滿懷希望咁諗住佢地只係作最壞打算預遲一個鐘，可能廿分鐘後出發呢～？ 班火車由 Mainz 出發，然後會去法蘭克福機場先再到南站，我地就睇住班火車幾時會由 Mainz 出發，一個鐘後班車仍然滯留喺 Mainz，而我地個車站牌已經由 +60 改為 +100。 當時就開始覺得唔對路，會唔會遲遲下最後就取消？ 我地買左 Flixtrain 最麻煩係佢無 DB 咁多班次，如果係 DB 咁樣遲法我地張車票會自動變成通行票，即係我地可以搭任何其他班次去到目的地。 而 Flixtrain 佢可以比你搭下一班但嗰班都要三個鐘之後先有車，或者比你轉 Flixbus ._.
本來我地會同另外三位朋友喺 Cottbus 會合，我地即刻打電話同佢地求救。 當時佢地先啱啱出發，預計個半鐘之後先會到法蘭克福。 如果佢地車埋我地既話就要五個人迫足七個鐘，我就迫開唔怕，但其他都係大大份既德國人，我地都諗住等埋呢 +100 分鐘先，如果架車八點鐘左右黎到既話我地都應該仲可以趕到喺柏林轉車。 點知三年之後又三年，佢變成 +120 分鐘。 我地即刻搭車去機場附近搵個順路啲既地方等朋友黎接我地，最後喺九點鐘我地終於脫離法蘭克福！！！！！上車之後終於可以安心落黎，起碼有其他人一齊 9up 一下 <3
最後我地三點到達，喺作客球迷停車場泊低架車，其中兩個就去去作客看台，我地就一行三人去主場入口出發。呢個球場名叫 Stadion der Freundschaft ，友誼球場。 唔洗多講都應該知呢度既共產味有幾濃厚～
入場後先發現我地要兜去另一邊，期間要穿過球迷組織既 H 看台，然後跟住 J 看路路牌行到尾遇上一道閘，比個保安睇我地係 J 看台既飛佢就開閘比我地通過。 經過 H 看台時見到好多人拎住一兜咖哩腸配薯條，過到黎先發現呢邊既小食亭得普通腸。 我問保安可唔可以比我返過去，佢問我點解，我話我好想食咖哩腸 sosad 佢笑住話明白就開閘比我過。 排隊時 feel 到好多奇異眼光，平時我真係對呢啲無咩感覺，但喺東德地區真係會無意中敏感好多。 今日既感覺只係啲人奇怪點解會無啦啦有外人喺度，無點樣特別唔友善，起碼小食亭個阿姐同啲保安都勁好人～～
拎住兜野食返到去 J 區我地就要行去上層看台，又要再 show 飛比佢地睇通過另一道閘先上到去。搵到自己個位就喺陽光下坐低等開波！ Cottbus 係東德其中一隊傳統勁旅，十五年前佢地係一枝德甲球隊，後來跌左落地區聯賽去到今季先爬返上黎黎職業足球聯賽，無諗過以佢地既規模上返黎德丙都係得返一萬人左右入場。 同其他東德球隊想比有點弱。呢個城市位於德國波蘭邊境，佢地既地區方言係夾位德文同波蘭文，就連路牌都雙語路牌。 正常無咩特別我地都唔會諗住去到咁樣特登睇一場波… 今個星期係好彩我地去柏林先會㨂黎呢度～
球員既出入口位於球迷打氣看台既中間，班作客球員出入通道時都要迎向最核心球迷既噓聲。 開波後雙方都互有攻守，睇落會係唔錯既一場波。 FCS 今日帶左大約五百名球迷到場，佢地喺頭廿分鐘完全靜默咁無人打氣，原因係因為有一小班球迷受到保安阻撓而未能入場，佢地要等到齊人先一齊開始打氣。 呢廿分鐘就可以完全投入去享受下主場球迷既氣勢。
東德既球迷文化總係有佢地自己既一種味道，有啲口號係東德球迷先會唱，仲有班球迷既參與度真係好高。 我地身邊既中老年人就算唔會叫足九十分鐘都會跟住唱第一次或者拍手。 等到 FCS 球迷齊人後佢地就開始帶入德國/法國既文化。 今日佢地唱左好多好有節奏既打氣歌，完全無唱過平時 d schlala 歌。不過喺佢地未開口時，主隊已經靠客隊後防犯錯而先入一球。 去到完半場前同一位球員 Thiele 搵到機會入第二球， 重新開波後 FCS 個個向前衝成功喺補時階段追返一球。
下半場 Thiele 因為對方後防各種甩漏而搵到多次埋門機會， 不得不提呢位球員係今季由 FCS 死敵凱沙羅頓轉會過黎，呢場波最後變成佢既個人入球 show 大四喜入夠四球先肯停手！！！雖然慘敗但變作客球迷完全無停過打氣，我地唔中意佢地都要 respect。完場後班球迷個個叫 Thiele 上球迷看台一齊慶祝，當時佢被電視台捉住個做訪問。 其他球員繞場一週之後喺 H 看台前先同球迷慶祝，等到 Thiele 甩身之後再一齊唱歌。
離場後我地喺停車場同其他人會合再一齊北上去柏林，個半鐘後去到東柏林柏林聯地區去食我地最愛既 gemüse kebap~ 去到機場附近酒店 check in 後一齊飲多杯啤酒就終於可以好好休息一齊準備第二日為 SVE 打氣！