22.09.2024
德國足球乙組聯賽 第 6 週
SV Elversberg - SSV Ulm
Waldstadion an der Kaiserlinde
賽果：1:3 (0:1)
入場人數： 8451 (546 名作客球迷）
門票：季票
更多相片

今個週末黎到作客係我地以前喺地區聯賽既老對手，佢地同我地一樣贏得地區聯賽冠軍上到德丙然後再次稱王直升上德乙。

數返去 2022 年，Ulm 就係同我地爭升班既主要對手，本來佢地贏到開巷我地都已經唔敢有太多幻想，無諗過去到季尾佢地利物浦上身開始自爆比我地有機可乘。 最後我地爬頭搶先成為地區聯賽冠軍，再喺佢地之前搭直升機上乙組。佢地以不敗之身完季，今季黎到德乙一開始條路都唔易行黎到賽前仍然未能贏得三分。

今日我地以平常心去迎戰，但睇下過去兩日既賽果就唔知點解硬係有種不詳既預感，特別係史浩克場波，佢地領先三球都可以倒失五粒，對手係早兩星期比我地大炒既 Darmstadt！！？ 連屎波都喊既 Darmstadt 都可以咁樣反勝開齋，睇下今個比賽週係榜尾球隊既反 cup 之日。

唔知呢啲算唔算吸引力法則…….. 其實我真係唔係好想諗返呢場波 ._. 就好似上季喺主場輸比 Wiesbaden 咁當無發生過就算。 Anyway， 你話對方踢得好過我地我又唔覺， 我就無睇返賽事精華所以都係講返我喺看台見到既事。

客隊帶左超過五百名球迷到場， 佢地喺主場既氣勢睇落係唔錯，球迷看台既參與度都好高，不過佢地同我地一樣無咩作客球迷。地區聯賽年代講緊得十幾個人黎作客，今日可以有五百人真係算唔錯。 我都唔知到我地作客既時候會唔會有五百人跟去睇波。 另外佢地既打氣歌好似 d fan song starter pack 普普通通，係多人一齊唱搭救。

同上場作客 Fürth 一樣， 我地有多次埋門機會但硬係把握唔到。 嚴重懷疑個 Asllani 早兩場入到波只係神來之筆 （當然我希望佢可以成材），唔知係佢廢定對方好彩每次都有隻腳擋到我地既射門。 加上有黑哨加持，最後對方靠一個十二碼射入今季第一個作客入球；再加兩個自由球入夠三球收我地皮。 我地防守死球真係堅廢，數返幾年前作客 Offenbach 又係比人喺門前頂入三個角球。 有無人可以解釋下點解過左咁多年，換過咁多球員同領隊都仲係有同一個問題 ._.

Block C 今日唔知係咪一樣預視到唔會有好結果所以個個都漏哂氣咁，帶唱新歌都要好長時間先帶得起。完場後成個球場都好安靜，唔似以前輸波都可以一齊唱下歌為下場預先打氣咁。 班球員黎到 Block C 看台前，大家都只係為佢地拍手，然後夾硬一齊叫兩句口號。 後來佢地喺看台前呆企左成分鐘，唔知係想企喺度懺悔定係以為我地起歌？？

今個比賽週之後，德乙所有球隊都終於成功開齋贏到今季第一場波。 呢個都係德乙既奇妙之處，比人睇死贏唔到波既球隊可以失三球再反勝，上場踢到水銀瀉地今場可以得返街場水準。 所以輸左今場雖然唔憤氣但都唔洗絕望，下場繼續！