15.09.2024
德國足球乙組聯賽 第 5 週
SpVgg Fürth - SV Elversberg
Sportpark Ronhof
賽果： 0:0
入場人數：10.877 （250 名作客球迷）
門票：16,50€ 
更多相片

上季黎到作客其實只係大半年前既事，計埋紐倫堡場波我地今年已經係第三次黎到 Franken 地區。上次我地唔只大炒對方既同時仲好享受喺作客看台既好氣氛；黎呢度作客既距離話近唔近話遠唔遠，但就啱岩好可以吸引到球迷去作客同時又篩走啲生面口既花生友。

今日有三架球迷巴士由 Elversberg 出發，比上年多左一架！ 我地認為呢啲中距離既作客波係用黎印證我地 fan base 既增長，見到啲平時啲鐵腳既參與，再加啲一家大細黎當旅行順便支持下自己既鄉下隊。 比賽期間有兩個小學雞投訴話啲啲旗擋住佢地視線，然後無諗過會係佢地比阿媽鬧：咪一早同左你講睇波就係咁架啦，咁多投訴你地自己行落去搵個位睇波！

球迷組織 HF 今日準備左一個小型既 choreo，首先會重用上季用過既門旗黎砌 SV 07 Elversberg，後面就會用白旗仔製造旗海。咁我就當然要搵靚位去影相，本來諗住同上年一樣去主看台影相算，但佢地既看台前面都有條柱會影響視線，要影靚相就要落場邊。 我叫保安開閘比我入去，佢話收到 order 唔可以開閘，要等藍衫阿頭黎先可以，點知藍衫阿頭又話唔可以開閘，我問咁我到底點先入到場邊？ 佢話佢都唔知，叫我出去問門口啲保安。 出到去問個阿伯，佢又話唔知，但叫我去另一首閘一路問過去問到去主看台嗰邊就應該有人答到我。 經過左三度閘之後我見到一個輪椅通道，兜左個大圈終於成功去到場邊～

週中開始突然氣溫大跌，夜晚得返幾度日頭就十二三度咁，今日有啲太陽就可以升到上十四五度，我係入面著件 heattech 底衫再加件羽絨，企係太陽底下係幾舒服既，只係企耐左就開始吸熱出汗；行去個位避太陽又勁大風，成個上半場我就一直係太陽同陰影之間徘徊 ._.

Fürth 既主場看台今日無咩特別，如常既主場打氣，另外多次大字報。 首先恭喜佢地既好朋友海登咸出戰歐洲賽事，然後就鬧下警方同球隊。

上半場我地有多次埋門機會都把握唔到，算係㩒住對方黎攻，去到下半場我地係搵唔到機會。 有一次埋門球證突然吹停場波話要睇 VAR，然後判左個十二碼比我地。 當時 Pinckert 訓左喺底線出面，但完全無人睇到發生咩事，然後無啦啦就有個十二碼。 呢球由科索沃國腳 Asllani 操刀，上場對 Darmstadt 佢比人讚到上天，今場就甩哂碌咁，就連十二碼都射得勁差比對方龍門接實。 不過我地都覺得球十二碼本來就應該唔值得，入唔到都唔算可惜，只係點解可以射得咁差！！！

去到尾段我地都仲多次機會全部都被對方龍門救哂，去到最後一腳連射兩下都比人擋哂。 賽前個個都話覺得有一分都會收課，完場後就覺得今場絕對係失左兩分。 等到班球員黎到看台前，我地就一齊由 Truly Madly Deeply 改編既打氣歌。今場雙方都未能入球，硬係有種空虛感，唯有下場繼續努力～