31.08.2024
德國足球乙組聯賽 第 4 週
SV Elversberg - SV Darmstadt
Waldstadion an der Kaiserlinde
賽果：4:0 (2:0)
入場人數：9443 （約 1600 名作客球迷）
門票：季票
更多相片

今季我地踢左三場有兩分，同上季相比係一個進步。 今日返到主場我地迎戰另一隊啱啱由德甲降班落黎既達斯泰達。 對方自上年十月到而家只贏過一場聯賽，上季包尾一早被篤定要降班；今日背住勁大壓力黎到作客鄉下隊，到底邊個可以今季開齋贏波先？

今日既對手對普通球迷黎講可能唔係好吸引，但我地見到既係可以趁對方病攞佢命既贏波機會；我地對對方黎講同樣都唔太吸引，唯一吸引之贏同樣係有贏波既機會同埋係其中一隊相距最近既球隊，車程應該個半鐘就可以黎到，但佢地都係賣唔哂二千張作客門票。 雖然賣唔哂但睇落都應該有千六人黎到，視覺上望落唔錯，但當我坐正喺佢地對面既時候都係聽唔到佢地唱緊咩歌…

可能係因為我地開波五分鐘就已經領先令到佢地已經預見到結果所以無心打氣？ 第一球係好典型既傳中然後 Schnellbacher 接應頂入；十五分鐘後就輪到佢助攻比個靚直線由賀芬咸借過黎既 Asllani 射入第二球拉開比數。 呢個時候開始我淨係聽到 Block C 既打氣聲！！

中場休息時我喺主看台買左兩條雪條返去 Block C 吸引左好多羡慕既眼睛， 佢地個個喺近三十度高溫下唱跳左上半場已經一身臭汗。 下半場客隊一口氣換左三個球員變得進取左好多，開波之後既攻勢全部都喺對面龍門，有幾下又要感激 Kristof 既撲救保住 Clean sheet。十五分鐘後 Asllani 一扭幾再破網射入今場個人第二球，為我地再拉開比數。

呢個時候係大約 60 分鐘，對方失左三球之後都開始無咩士氣，重新開波都係得我地造攻勢。幾分鐘後我地有個角球開出之後見到我地既後防球員 Le Joncour 訓左係地下勁痛苦咁舉起佢右手 fing 下 fing 下。 一開始大家都以為只係普通碰撞然後要做下戲典下地，球證走埋去望下之後就叫隊醫入場。 呢個時候我地終於見到發生咩事： 佢隻左手手踭位係向入彎曲咁變左形！！！ 睇落似係落地時拗親整斷左隻左手。

隊醫入場後隨即向場邊既急救員求救，要擔架同埋急救醫生。喺德國，急救員同我地認識既 St John, 紅十字會救傷隊做既野係差唔多，做急救同即場包紮等等，而急救醫生其實即刻普通醫生，可以即場為傷煮診症、開藥甚至係即場做啲救命既小手術，但佢地喺當值時段內 on call 喺最短時間內去到意外現場。今日既急救醫生喺事發後四分鐘左右極速就到場。

場內既主場球迷叫左一陣 Le Joncour 個名為佢打氣之後就變成寂靜一片。 保安問我地借旗黎幫急救員遮太陽同埋比返啲私隱比 Le Joncour ，後來睇返新聞報導，原來當時醫生要為佢做短暫全身麻醉去幫佢既左手移正返個位先可以幫佢做到固定同包紮，我地身邊都有做急救既球迷話手踭脫位既痛係比起骨折痛好多倍，如果真係只係脫位既話就可以話係不幸中既大幸。 而球證都有向兩隊波既領隊睇下佢地會唔會考慮腰斬賽事定會繼續。

廿五分鐘後，Le Joncour 可以被抬上擔架再送哂入左球場既救護車直接送去醫院。 擔架移動時全場連同作客球迷都以掌聲為佢加油同祝福佢早日康復，作客球員更加列隊護送佢上車。 而 Le Joncour 都有微笑住由右手比個手指公話比我地知佢撐得住 (Y) 。後來比賽繼續然後補時二十五分鐘，班作客球迷應該覺得好無奈，咁樣比我地大炒已經夠慘，而家又要被迫喺大太陽下留低多半個鐘等自己隊波踢屎波。

比賽重新開始之後連續有幾次球員訓地要隊醫入場，個個每次都 PTSD 咁好驚又傷多一個問個球場今日係咪中邪唔適宜比賽？？ 去到第九十分鐘，我地射入第四球，大家慶祝之制球證吹返轉頭話越位詐糊，等 VAR 睇完先改判入球合法。 去到呢個時候，班作客球迷已經放棄左打氣同收執打氣物品去靜默表示不滿球員既表現。

補時十四分鐘我地入左球越位波，仲諗住上年呢個時候我地對 Düsseldorf 慘敗五蛋，今日可以炒人五蛋！！ 不過望下其他同時間進行既乙組賽事全部都有一隊入左四球波，睇黎係個天要我地配合其他球隊只可以入四球波。 最後補左廿七分鐘終於完場， SVD 既球員去到作客看台前受訓，個個頭 dupdup 咁比球迷鬧。 而我地就等球員比到一齊慶祝今季第一場勝仗～～～～ 佢地拎住 Le Joncour 既三號波衫喺看台前大合照，一齊將呢三分送比佢！