23.08.2024
德國足球乙組聯賽 第 3 週
Karlsruher SC - SV Elversberg
Wildparkstadion
賽果：3:2 (1:1)
入場人數： 26838 （1000 名作客球迷）
門票：18,15€ 
更多相片

八個月後我地又再黎到 Wildparkstadion 作客，唔知點解硬係有種不祥既預感。 睇返數據我地睇過咁多次 Karlsruhe 佢地都未輸過波。 淨係講我地上季既對戰都係輸三球，今日又會有咩結果呢？

上季有兩場波大家一齊搭火車由莎蘭出發，原先有諗住會再搞多次去 Karlsruhe，可惜呢場波被安排喺星期五既六點半開波，去程既火車班次都還好，但回程就只有一班車。 如果錯左過班車或者轉唔到車就會被迫要留守荒野，大家只好跟球迷巴士或者自己安排。

我地就準時喺三點鐘就熄電腦然後揸車出發。 德國既下午繁忙時間通常都係四點左右開始，星期五就大約一兩點就開始，我地沿路好暢通咁大約個半鐘後到達球場外既作客停車場。 上季我地將架車泊左喺附近大學既免費停車場，今次因為懶就㨂左泊喺球場門口，要比成十歐泊車費，會唔會太過份！！！！

入場後先去買辣肉腸 Feuerwurst 黎到晚餐，食完再買多杯雪糕黎降下溫。 過去幾日氣溫本來回落到得返廿度左右，今日開始又升返上去三十度。 好在場波係傍晚上演，捱多一兩個鐘等到太陽落山就會舒服好多。 不過首先都係要係看台同大家既肉貼肉咁企埋一齊分享下臭汗～

今日有大約一千位球迷黎到作客，同十二月相比少左幾百人，但唔好唔記得今日係星期五，就算距離唔遠都唔係個個可以提早收工黎到睇波； 有呢一千人黎到絕對收貨，加上大家都全場都好投入打氣。 上半場我企喺作客看台前面時係完全聽唔到主場球迷既打氣聲，後來有 KSC 球迷都認證我地既聲勢出乎佢地意料之外。 入場人數同上次黎作客相比多左三千人，但我地覺得對面既氣氛反而差過上年，真係唔知係因為我地自己聲大左聽唔清對方定係今場只係第三週所以佢地未練好把聲？

賽前呢個星期我地再有多兩個進攻球員加盟，睇黎我地今季會繼續以進攻足球既方向去保住德乙既席位，但後防既隱憂今日又再次浮面。 話就話進攻係最好既防守，但都要前面入波入得夠先得架！ 開波廿分鐘唔夠我地就先失一次波，我地喺禁區清波送左個波落對方腳下比人勁射破網，有啲似科隆第一球波咁。 十分鐘後我地有Schnellbacher 為我地追和～ 下半場一開波由我地開出既角球唔知點樣又送左個波去對方腳下，再因為個人失誤又送左個機會比人再次領先，去到六十分鐘我地有個好靚既組織突破越位成功再次追和，燃點起一個微薄可以反勝既希望。

可惜我地都係敵唔過魔術，完場前對方一個窩利再次入夠三球，以同上年一樣既比數連一分都唔比我地 T_T 講真我地就算唔係踢得比較好嗰隊都值得拎一分走人囉…. 雖然我地有啲唔憤氣，但見到班球員叫做踢得唔錯都收貨既。 作客看台都算喺一片歡樂既氣氛下迎接黎致謝既球員，都係嗰句，下場再黎過～