18.08.2024
德國足總盃 第 1 圈
VfV Borussia Hildesheim - SV Elversberg
Friedrich-Ebert-Stadion
賽果： 0:7 (0:3)
入場人數： 5186 （約 200 名作客球迷）
門票：16€ 
更多相片

足總盃首圈對好多低組別球隊係一場過既夢，以地區盃賽冠軍參戰首圈賽事就可以有主場之利有機會喺自己既大農場迎戰德甲乙既球隊；佢地既目標通常都唔係晉級，而係可以喺自己條村見下球星同搵下錢咁。

上季 SVE 以德丙冠軍自動獲得首圈參賽資格，今季作為德乙球隊當然同樣直接有得踢足總盃；唔同既係我地係以「職業組」資格去抽籤，只有德甲加德乙頭十四名球隊先可以成為職業組，德乙十五名以下連同地區盃賽冠軍都被視為「業餘組」，通通都會由主場出戰。 亦即係我地今季要去作客「業餘」球隊，我地講笑好彩就抽中同州既 Saarbrücken、一係就抽中啲去過幾十次既西南地區細隊、一係就去德國同丹麥邊境山旯旮地方既第五級球隊最後得廿個人去作客。

最後我地抽中中北部第五級聯賽既 Hildesheim。 人地係幾十年來第一次有份踢足總盃，個個期望就算抽唔中拜仁抽中到其他傳統勁旅都好，點知抽中呢隊 SV Elversberg 呢隊垃圾波勁失望。 我地反而好開心抽中唔算太遠又未戰過既球隊， 可以重捨以前出戰西南地區既時光。過左幾日啲球迷開始接受現實就覺得對垃圾隊起碼可以喺自己既主場出賽，唔洗因為門票需求太高而要借用其他球場。 另外就係對細球隊可以有爆冷機㑹突圍出線。

好多傳媒係抽籤結果出左之後係咁講今次將會係 SVE 歷史上首次喺首圈作客，但其實可以去足總個網度 fact check 下先球隊喺 1981 年已經喺首圈作客過 TSV Röttenbach。 無諗過就連球隊自己都唔清楚自己既歷史。

Hildesheim 位於漢諾威以南，離 Elversberg 大約五百公里；大家喺星期日朝早六點出發，諗住早啲去到喺門口 bbq 當迷你慶典咁玩夠先入場。 我地見天氣差就九點先出門口，大約一點左右到達。 泊低左架車就喺雨中行去市中心望下，兩點就入場。 VfV Hildesheim 只係一隊業餘球隊，本來就唔多球迷，佢地都無特別打理個球場。 我地入場時先經過一道閘，然後要繞過一個細球場再行過草地先到正式既作客看台入口。

SVE 既球迷組織號喺賽前號召隨隊作客既球迷一齊以沙灘裝到場，一齊著夏威夷恤衫，著謝拉特拖鞋同泳褲，喺夏天大太陽底下一齊享受呢場波！ 天公造美落左一日雨，天陰陰咁等我地唔洗喺呢個露天既看台曝曬！！ 老實講我真係寧願落兩濕身好過一身臭汗。入場後見到個個都著到五顏六色，又有幾個沙灘波同水泡，喺歡樂既氣氛準備開波！今日我地都準備左一個簡單既大字報黎襯托返今日既主題：Sommer Sonne Kacklos. 個 O 係 SVE 既 logo. 夏天、太陽、垃圾籤（SVE） 自娛下，對方認為我地係垃圾籤，我地只好為佢地帶黎下娛樂 xD

球員進場之後我地喺作客看台噴紙條，然後大家就一齊為球隊打氣。我地完全無諗過會有近二百名球迷到場，以為只係好似作客 Magdeburg 咁得一百人左右。 今日黎得既球迷絕對唔會係花生友，作客門票只會喺村內 fanshop 出售，即係要親身或者識人先可以買到飛。 首先見到大部份人都著上沙灘裝已經好開心，更開心既係個個都有參與一齊打氣。

頭十五分鐘主隊出盡力搶功有幾次有威脅既埋門，睇到我地好緊張。 到我地入左第一球之後就停唔到，上半場先入三球，最後嗰球仲要係對方擺烏龍頂入自己龍。 下半場入多四球，輕鬆晉級。 有少少少少鄧對方慘，抽中垃圾籤然後踢左十五分鐘幻想就幻滅。 我地唔同啲大球隊對盃賽無咩感覺，班球員要靠啲魚腩隊搶下表現架！ 希望呢場波可以幫班球員增強下信心，下場返到聯賽可以當對方係 Hildesheim 咁踢！！

去到第二圈就論到我地做期待抽籤嗰個，淨係希望唔好抽中其他德乙球隊就已經好心滿意足。贏多五場我地就可以出現歐洲賽！！