10.08.2024
德國足球乙組聯賽 第 2 週
SV Elversberg - 1. FC Köln
Waldstadion an der Kaiserlinde
賽果：2:2 (0:1)
入場人數： 9502 （2100 名作客球迷）
門票：季票
更多相片

上場作客靠運先執到一分，今日黎到今季第一場主場賽事就要迎戰剛從德甲降班落黎既科隆，唔係好敢想像我地可以有啲咩好表現。

亦即係話又再有一隊大球隊黎到鄉下地方受到現實既衝擊，上星期科隆仲可以感受下大賽既氣氛喺主場對漢堡。今日黎到一個無火車站既地方，一個半地盤工地咁既球場；科隆球迷早兩年仲喺歐洲賽事作客倫敦，黎到今年降班到乙組之餘又被罰轉會窗禁制令唔可以買入新球員，一落到黎乙組之後就要到訪 Elversberg，心中忍唔住鄧佢地慘。

科隆喺莎蘭有好多球迷，而喺 Elversberg 村內就已經有唔少。有一兩間屋係花園有畫上科隆會徽或者掛旗，另一隊村內既小型足球隊更一直都只賣科隆啤酒 Kölsch，所以今場波都係州內其中一件盛事。

比賽當日我地喺開波前大約個半鐘去到球場，喺社交媒體見到其他球迷日日去監督同匯報球場既擴建工程，今日我地終於可以親眼見到對面看台既進展。 五月尾仲係一塊爛地咁，今日已經見到個新看台慢慢成左型，仲有幾碌十字架喺度添加左一陣墳場味。 好似暗暗地歡迎科隆黎到地獄主場咁。另外喺 Block C 後面既通道原本係露天既，而家喺小食亭前面加左一塊鐵皮用黎擋雨，其他硬件都無咩點樣大變。

場上面睇黎今季會喺球員熱身前播出對手既會歌，應該係 SVE 喺作客其他球隊時學返黎，想比人感受再 friendly 啲？ 老實講，雖然有時作客聽到人地會播我地首歌時係會幾開心，但唔覺得自己主場要做同一套野。 球隊仲做左幾樣野令我地覺得好反感，第一係推出粉紅色既頸巾，小朋友或者女人就要用粉紅色？明明球隊主色係黑白，比到盡計埋 Kaiserlinde 既「樹皮」金色，但粉紅色係想點？ 今場波佢地仲特別推出左主客隊頸巾，即係半黑半紅，一半係 SVE 另一半係科隆 logo，仲印有日期同比賽週。 我當今場波真係好特別有今生無來世咁，咁上季對漢堡柏林史浩克又唔整？ 今場呢條頸巾係咪有啲咩特別 VIP 要求而整出黎？

官方資料話科隆將會有超過二千人隨隊作客，同時 SVE 話唔會容許球迷穿上同客隊相關既衣物進入企位看台，完全唔知個球場點樣可以比到二千人入場。 作客看台正式黎講只容納到千五人左右，我喺主場台見到唔少作客球迷，都點數都收唔出五百人喎！ 佢地塞得入作客看台既球迷全部都有一齊參與打氣，由主場台望個過去可以正面見識到佢地既氣勢，佢地拼命咁一齊叫 Auswärtssieg! Auswärtssieg! （作客勝利） 睇好自己隊波可以輕取 SVE 重捨上場波輸波後失去既信心。

上半場睇落雙方既實力真係有啲差距，SVE 完全無力攻擊，只有一兩次有威脅既埋門，其餘時間都好似喺度亂踢咁，唔係有 Kristof 守龍我地應該又一早落後緊幾球。 果然係廿分鐘我地終於頂唔順，比對方係禁區外黎個地波遠射，個波先用腳尖改變方向再碌過幾個人既跨下入網。呢個時候大家打定輸數，如果上場波同今日上半場既表現就係我地可以發揮到既水㔼的話，呢季既護季之路將會好難行。。。。

下半場開波前，Steffen 好果斷咁作出兩個換人調動，換走我地認為最出力既 Schnellbacher 同 Stock，換入兩個新黎既年輕球員 Schmahl 同 Asllani。下半場第一個攻勢係我地前面一片混亂，個波喺底線飛黎飛去，我仲質疑緊呢個調動既時候，Asllani 好冷靜咁射入一球追和！ 突然之間班球員好似開始有啲信心同有返啲信心，比到壓力對方。 十五分鐘後就到 Schmahl 射入為我地反超前！！！！！！ 可惜喺完場前係輸球角比對方追和。

最後大家都十分滿意呢一份，由落後到反超前到比人追返和，但對手係有德甲經驗既科隆！！！ 更重要既係我地見到班球員原來仲可以進步，我地仍然可以踢到進攻足球。 等到班球員黎到看台前就同佢地一齊慶祝呢一分！下星期係足總盃第一圈賽前，我地將會第一次作客低組別球隊…