03.08.2024
德國足球乙組聯賽 第 1 週
1. FC Magdeburg - SV Elversberg
Heinz-Krügel-Stadion
賽果：0:0
入場人數：21496 (130 名作客球迷）
門票：19,5€
更多相片

過去兩個月暑假有歐國盃同奧運既陪伴再加埋日本之旅，眨下眼又黎到新一季。 今季同上季相比有五隊新面孔，首先係由德甲降班落黎既科隆同達斯泰達，然後德乙既尾三全部一齊降班，喺德丙再次有球隊同我地一樣做直升機升上乙組，今次仲有兩隊一齊直升：Ulm 同埋 Münster，另加喺附加賽贏波既 Regensburg。 而我地開咧戰對手係東德既馬德堡。

諗返上季歷史性首次出戰德乙同樣係以作客開始，當時我地以唔錯既表演喺升班熱門漢諾威身上入兩球隊和波得一分。 黎到第二季既德乙比賽，嗰種期待既心情的確無上季咁興奮。但我地既緊張既心情仍然無變，因為我地仍然只係一隊目標係護級既球隊…

喺暑假球隊有簽入新球員，但簽入既都係來自低組別球隊，當中來自法蘭克福同賀芬威二隊既借將。同時我地成功留低兩位重心球員，一個係門神 Kristof，另一個係今年成為正隊長既 Fellhauer。 另外仲第一次成功賣出球員：Jannik Rochelt。呢位陪我地踢左兩季由丙組直升上乙組同埋去季護級成功既功臣喺季前以 150 萬歐元轉會去漢諾威。 大家都以不捨既心情去祝福同恭喜佢，老實講其實佢上季既表現有啲飄忽，但見到佢可以由爭護級變爭升班，呢個機會絕對係要去試下，唔好屈就喺鄉下隊。

今季我地第一場就要遠征「唔吸引」既東德，仲要係上季兩場都和波既對手，的確係無咩吸引力。 同上季一樣 SVE 都只係帶到大約 130 名球迷去作客。 我地自己覺得今年開始先可以證明到球迷班底有無增長到… 上季第一次踢德乙對大家黎講都好新鮮，又可以去下啲新既城市。 今季就連我地都覺得有啲比賽如果有其他原因既話可以 skip 左佢 sosad 今日最係都係得一百人左右有少少少少失望，但都仲算合格既～

星期六我地六點半左右就出發，先去麥記食早餐再上路。 上到公路我地喺度講一早揸車好正呀～無咩車好輕鬆～ 五分鐘後就遇上三線變一線既修路工程造成，塞左差唔多九個字先脫離到法蘭克福附近既地區，五個鐘後終於去到 Magdeburg。 喺市內我地又再塞多三個字，沿路見到好多路牌被貼上 HKS 或者 Heinz-Krügel-Stadion 既貼紙。

FCM 既球迷一直都抗議球場被贊助商冠名，本來一直係叫 MDCC-Arena （以前唔識野試過用呢個名，即係比人極速訓話糾正），今季有新冠名 AVNET （有啲似 AV 網？？），又再挑起球迷既怨氣，所有AVNET 既字眼都被球場正名去蓋過。 對德國球迷黎講，球場既正名係好好好好重要。 縱使球隊有千萬個原因要將球場名字商業化，但球迷心中只有一個名。 喺 Magdeburg 球迷心中，佢地既球場只有一個名字，就係以前領隊 Heinz Krügel 命名既球場，一個對 FCM 歷史同重要既領隊，一個可以帶領球隊贏得歐州錦標既領隊。

喺場內佢地喺 Block U 球迷看台準備左 choreo ，球迷們舉起藍色旗仔，看台前有大字寫住：我地係來自 HEINZ-KRÜGEL-STADION，等到球員進場時喺人海之中拉起寫住 HKS 既球場，簡單有力～ 開波後佢地就開始拍手咆哮，我地都忍唔住要拍手致敬。

另外喺巴黎奧運德國既第一金係由來自馬德堡既泳手 Lukas Märtens 贏得，呢一金係德國 36 年來第一塊游泳項目既金牌。 德國人個個當然十分開心，但馬德堡人就更加開心同自豪。 呢位泳手係賽後訪問多次提及佢既出生地，話自己作為一個 Magdeburger 好自豪。 班球迷今日亦有舉起大字報恭喜佢成為奧運冠軍，同時亦為其他來自同鄉打氣。

上半場雙方互有攻守，一齊搵唔到機會破門。 下半場我地就越踢越差，後防表現合格，加上有 Kristof 超水準守住個龍，但中場同前場係完全食哂屎，球員水準係一回事，有無策略又係另一回事。 下半場個個各有各踢咁，每次都將個波送左比對方，等如將埋門機會送比人。 去到最後淨係想場波快啲完，拎到一分真係執到。 希望領隊睇到隊波中前場既問題，可以搵到合適既球員加盟 T_T