14.07.2024
日本職業足球甲組聯賽 第 23 週
橫濱水手 對 鹿島鹿角
橫濱國際綜合競技場
賽果：4:1 (1:1)
入場人數：31463 （約 8000 名作客球迷）
門票： 4200 JPY （指定席）
更多相片
今場波真係喺日本最最最最後一場，同埋最後一日啦。 喺東京玩左幾日之後我地去到離東京只需大約半個鐘車程既橫濱，黎一個最後衝刺買野，睇最後一場波，食最後一餐飯！
年頭買完機票之後我地就訂左第一日同最後一日既酒店，因為落機同走都係一大朝早，諗住住近啲機場就唔洗趕。 越近出發就越覺得我地最後一日要 check out 轉酒店又唔知有無得提出 check in 咁覺得好麻煩，為左轉酒店就無左大半日。本來諗左四晚既酒店又滿哂無得加一晚，好好彩喺出發前兩日見到附近另一間酒店突然有房可以訂就臨時改左去住新橋附近。 新橋都算係個大站，有車可以直去橫濱，又有車可以去到機場。
由新橋出發搭 JR 五個站就到達橫濱，我地諗住喺車站附近既商場行街，買到既野會放喺新橫濱站既 locker 先再去睇波。 第一站係去 Pokemon Center 買埋之前未買既野，橫濱間舖採取整理卷措施，我地去到要等大約半個鐘先可以入場，好處係唔似東京同大阪嗰幾間咁全間都係遊客逼滿哂人。 我地可以去行其他舖頭先再返黎，店內九成九都係日本人，仲有兩張枱教人點樣玩卡 game!!! 買到心頭好之後就行左去港末來。
港末來應該算係橫濱新既地區？嗰度有個另一個商場可以行下，又可以喺出面既行人專用區散下步唔洗曝曬。 大約四點我地就由港末來出發搭地鐵去新橫濱站，由新橫濱站仲要行差唔多廿分鐘先可以去到球場。 唔知點解我對呢段路完全無印象，淨係記得上次黎既時候低估左行路既距離搞到好趕好燥底。笒到去球場前既大橋前就開始有啲印象，中間有個橫濱水手既 logo 可以影相，然後就到球場前既大廣場。
呢個球場係德國人既傷心地，2002 年世界盃決賽就係喺呢個球場上演，巴西對德國淨勝兩球贏得世界盃。而我旁邊既德國人今日就以興奮既心情黎睇波～ 日本既足球文化真係好得意，比賽日唔係只係賽前一兩個鐘開始，而係由朝早就已經好多 event 係球場門口比啲球迷黎玩足一日。 場外有好多排哂長龍既美食車，呢啲美食車應該都係啲大型連鎖店，乜都有得食！ 廣場中間有音樂表演，有小朋友或者阿姐喺空地跳舞，好多人坐喺中間食住飯睇 show。
我地好肚餓但又唔想排隊，㨂左入場先再算。 上到四樓有一個小食亭，二話不算先隊左一杯雪糕，再買左兩盒唔熱既熱食。 認真，真心建議去日本睇波既你預三四個鐘去到門口，喺場外食完先入去，因為場內既野食真係麻麻地。 我地明明都計劃預左充足既時間，唔知點解最後都係得返一個鐘左右。
唔知點解今日既感覺係異常都悶焗，坐喺看台人群中間有種就黎焗死既感覺。 我地見到旁邊嗰幾個區都無咩人坐，上網望下今場波既售票情況之後就搬左去附近無人坐既位置，雖然都係熱，但起碼空氣流通少少先，可以放鬆少少睇開場 show. 球員進場前賽會公佈陣容，然後就有樂隊現場演奏橫濱既會歌，而呢首歌既原曲係孤星淚既 Do you hear the people sing? 仲有埋射燈 focus 哂去主場球迷既看台度好似一個好隆重既開幕典禮咁。 同時班作客球場完全無視對方，自己有自己專注叫口號。
橫濱水手既全名係 Yokohama F. Marinos，呢隊波有少少得意啲既歷史。 話說日產既基地就係位於橫濱，咁橫濱水手既前身就當然係日產 FC，後來先開名做橫濱水手。 而原先仲有來自同市，屬於全日航空 ANA 既橫濱飛翼 Yokohama Flügels，同好多日本球隊一樣以外語黎名命（今次係德文）。 當年水手對飛翼既對戰就係市心最重要既打比戰，去到 1999 年兩隊合併成為橫濱 F 水手。 後來有球迷不滿合併而同一班志同道合組成一隊新既 FC 橫濱，創左日本足球界既先河，成立同一隊由球迷擁有既足球隊。
我地今日睇既係近年兩隊日職最成功既球隊對戰，鹿島鹿角今日黎到應該會覺得易踢，因為橫濱已經幾場一勝。 佢地應該都估唔到最後竟然會被大炒四球。 但無論由賽前到失波同賽後，班鹿島球迷完全無停過打氣，而佢地既打氣歌黎黎去去都係得四五首但可以連續 oh oh oh 足半個鐘。 去到完場輸波後，班球員去到作客看台前比班球迷瘋狂開汽水！！！ 今次係我第一次見啲球迷咁樣噓法，佢地係覺得班球迷做足本份黎為你地打氣，對住中下游既球隊都可以失四球你地羞唔羞恥！！？以為咁樣贏左場波可以保到基維蝦既領隊位置，無諗過一星期後就傳出佢被炒魷既消息。 好在比我喺呢兩星期見到佢兩次，離遠見到佢都仍然有陣帥氣～～～～ 只係肥卜卜左少少！
完場後我地睇左一陣 show 就要走人，想趕得及由新橫濱可以返到去東京新橋既直通尾班車。離場時見到大銀幕叫人唔好離開座位，因為咁樣會打擾到其他人！ 真係大開眼戒到底日本人有幾驚打擾到其他人？ 行到去新橫濱站我地位喺閘前等上車，呢個時候又見識到日本人既另一面。 我地本來企正喺車門排第一，等到車黎啲人就個個打尖搶頭位上車，等到車門一開就飛奔入去坐低，真係無諗過我地竟然會爭唔贏日本人只係搶到一個位！ 最後車程大約一個鐘後就返到去東京，然後約朋友喺便利店交收同埋見最後一面。
返到酒店又可以倒數東京鐵塔熄燈，訓左唔夠四個鐘又要起身睇住歐國盃決賽執行李然後去機場。 回程係九點四十分機，我地大約七點去到機場 check-in 完就去食早餐同飲多兩杯梅酒，去到閘口見到幾個日本奧運運動員準備上機去巴黎，可惜唔知佢地係邊位，日本人都手指指咁想知佢地係咩人。 食多一糕白之戀人雪糕就上機，呢程我地向太平洋出發，飛經加拿大、北極、格陵蘭、冰鳥再到德國，總共十五個鐘！！！！
未返到屋企已經好想再返去日本，呢個國家真係有種魔力！我地已經計劃緊下年要再去日本，下次我想去睇讚岐烏冬隊～～～