13.07.2024
日本足球甲組職業聯賽 第 23 週
FC 東京 對 新潟天鵝
國立競技場
賽果： 2:0 (1:0)
入場人數： 57885 （約 15000 名作客球迷）
門票：4100 JPY
更多相片
日本之旅黎到最後一個週末，我地返到去首都東京去重遊舊地，去一啲我地曾經去過去地方睇下七年過去睇下有啲咩轉變，神奇地好多地方都可以憑記得搵得返出黎。有一間沾麵店我地一直好驚佢會捱唔過武肺而執笠，估唔到佢仲屹立喺新宿！！！
去到東京第一日本來諗住大家一齊去睇 Clamp 展，見下小櫻既原畫。 最後去到東京站買地鐵三日票既時候無意中發現到一番街 （之前真係從沒聽說過），入面好多野街，仲有係今日重開既 Pokemon Store! 買左隻比卡超車長返去做紀念～～ 行到無留意時間就放棄左睇展，直接去餐廳等朋友，今餐我地喺新宿食檸檬牛舌。呢間係朋友搵返黎，佢覺得好多網上多人推薦既餐廳都係伏，但呢間係佢有好多身邊既人親身食過係好食佢先㨂黎食，好彩有佢訂位先唔洗大熱天時喺條樓梯度排隊！ 食完我行左去歌舞妓町望下就返去。
第二日就先去左東京鐵塔，由酒店行去只需十五分鐘路程。 睇返七年前喺增上寺前影過張相，今日係同一位置對比下確認下上次黎既時候係唔見有高樓大廈。 然後我地行左去鐵塔既另一邊搭車去淺草，又再憑記憶搵返上次去過既一間烏冬店，點知佢無開門 T_T 係大雨下搵到另一間烏冬店就咩都唔諗入左去食，呢刻我咩烏冬都想食！！ 食飽之後我地就行去上野，行下鐵路之間既商店街，喺荷花池玩下水，再行去秋葉原買二手 gameboy 帶。其實我地真係無諗住要慳錢所以唔搭車，而係喺地面實在好多野睇，不知不覺就由一個地方行左去另一個地方！！btw 買 gameboy 帶要留意既係餅帶入面有粒電，無電的話就 save 唔到。網上有教學點樣換電，睇落簡單但其實好考技術！！！！ 我花左半個鐘先挑到粒電出黎 … 入黑後又去左新宿搵間酒店試下當地既啤酒～
星期五繼續大雨我地就去左東京站買手信，買完返酒店放低哂野就行去麻布台既 Teamlab Borderless，估唔到可以喺入面玩到三個鐘，好多作品都好靚同好好玩！！ 夜晚本身想去既酒吧滿左，臨時臨急搵左另一間樓上酒吧反而有驚喜。間野係小本經營咁，由老闆自己一腳踢，除左 serve 酒仲會自己煮埋野食。 後來有啲棒球球迷睇完波黎飲酒食飯佢直接 join 埋一齊，我地想埋單走人既時候勁唔好意思要叫佢出黎 xD
終於黎到今個旅程既最後一個比賽週末，要再提下日職喺夏天既賽程全部都係黃昏先開波，我地日頭仲有好多時間可以去玩～ 所以我地都爭取時間日頭去掃下貨，先去 Donki 買左好多零食，再去 Muji 買啲垃雜野，買夠就返酒店放低啲野再出發去球場～
FC 東京既主場位於東京市外一個叫調布市既地方，本來我地係諗住可以去吉卜力工作室。 後來日職決定左今季有幾場波會喺國立競技場上演，呢個球場平時係國家隊專用，亦即係正常係唔會買到飛入呢個球場。 點知我地咁好彩今場波就係其中一場會喺國立競技場上演既比賽！ 最重要係個球場可以話喺正市中心，我地先可以有咁多時間日頭去行街！
搭車去球場好簡單，就係去國立競技場站。但個站深到好似西環嗰堆站咁，由站底行上地面好似行左四五層樓。 我地無耐性唔想排扶手電梯（你知日本人無人插隊！）就㨂左行樓梯，超後悔但又無得中途插隊….. 一出站就已經係球場門口，絕對唔會迷路。 由於個天又開始落雨，我地好快就入左場。我地既座位位於上層，入閘之後就要搭電梯直上到最高層，沿途無得喺下層同中層偷望下。 上到去先醒起我地仲未去 fanshop！ 睇下份場刊有一部份係球場場內地圖，只有下層先有商店仲要七點就關門（即係開波時間），但我地已經入左場仲點樣可以落去？？
我地搵 fan support 問下點樣可以去fan shop，個後生仔一面怕醜同無奈咁一個英文字都講唔出，最後我都唔敢再迫佢…. 佢手指指咁指我地去另一邊，咁我地就跟佢既方向行睇下點。 原來球場兩邊係有樓梯可以來往上下層！！ 但我已經由地鐵站行左四層上地面，搭左四層電梯上到黎，而家要落返地面然後又要行返四層上去….. anyway 落到去搵到 fan shop 又要排長龍排左接近十五分鐘先比到錢，無得睇賽前表演。。。
買完野我地狂奔上去希望趕得切埋位睇煙花，真係喺我地準備埋位既時候就開始放煙花！！ 日本足球真係當 show 咁做，佢地既煙花同煙火係以紅藍色為主，即係 FC 東京既主色～ 今次有近六萬人入場，當中有萬五名作客球迷，一萬五千！！！！ 開波前班主場球迷萬人齊唱 YNWA，後尾到球迷清唱既時候完全錯哂拍子有啲難聽 sosad 佢地都係唱返啲普通打氣歌好啲。
作客企喺我地左邊龍後後既看台，橙色做主色既球隊好少見，亦都十分之亮眼。 佢地用聲浪將主場球迷比落去，佢地唱既歌款唔多，但同一首歌可以唱足十幾分鐘仲要一直都 keep 住好有氣勢咁打氣。新潟上年先由 J2 升返返黎 J1，今季既成績都係麻麻地。 黎到今場波對住表現同樣無咩特別既東京都唔係特別好，最後上下半場都失一球繼續失望而回。
完場後我地行去銀座線搭車去銀座，趕得切食最後一輪 Kura，叫朋友過黎食甜品一齊食最後一餐飯，食到佢地播放學鐘聲就行返去酒店～ 準備最後一日既行程…