06.07.2024
日本職業足球甲組聯賽 第 22 週
大阪飛腳 對 橫濱水手
吹田市足球場
賽果：4:0 (2:0)
入場人數： 26,335 （約 1500 名作客球迷）
門票：3400JPY （指定席）
更多相片
做左幾日遊客之後又黎到比賽週末，呢場波我地叫左香港朋友一齊去睇，想佢地可以見識下純打氣既足球文化。咁多場波我地搵呢場係因為我地覺得兩隊波既知名程度同球迷帶黎既氣氛應該會係相對比較吸引，唔通叫人同我地去睇校園足球咩～ 我既朋友對足球完全零興趣，我都要搵場好睇啲既 show 先對得住佢地架～～
日職喺夏天既賽程全部都係傍晚先上演，雖然唔可以一日睇追兩場波睇，但變相我地喺日頭仲有全日可以去玩。 只係當日朝早我有啲唔舒服又遇正熱浪，去四天王寺參觀時真係焗到頂唔順。 佢地喺寺外面準備緊今晚開始既唔知咩祭，望左兩個就因為太熱就走左。 於事就去左梅田啲商場喺冷氣地方休息下，食左個蛋包飯，去 Pokemon Center 買少少野就去萬博。
飛腳既球場位於大阪市以北既吹田市，當區最出名既地標就一定係萬博紀念公園。 大阪喺 1970 年於主辦萬博，有太陽之塔為當年既標記。 原先我地有諗過入公園參觀，近距離望下個太陽之塔。不過三十幾度喺公園曝曬真係會中暑，再加上人朝早喺天王寺都已經無咩心情去慢慢欣賞，更何況去一個大公園呢。。。 好在萬博公園隔離就係一個大型商場，入面有好多我仲未去過去商店所以都可以花啲時間去行下街。
我地由大阪市搭地鐵向北出發，然後再轉搭單軌列車，離遠見到太陽之塔同埋摩天輪就知道到站。 一出站就要迎面向住落緊山既太陽行一段路仔先去到 Lalaport 商場，入到去真係好似天堂咁～ 然後就直街上三樓睇卡通精品，同朋友會合後就經停車場行去球場。由車站或者商場去球場都係行同一條路，要大約十至十五分鐘。入到場內大家分頭去買野食，朋友發現一間叫利久既牛舌專門店話點都要排，我就去左排牛扒三文治，然後再去買毛巾做手信～ 買哂所有野已經得返十分鐘唔夠就開波。我地拿拿聲衝去上層搵自己個位。
好在我地最後一刻先入看台！ 我地又買左會比太陽射住既位，個太陽落山既時候咁啱又係射住我地呢邊看台最高嗰幾行，去到我地埋位時個太陽先啱啱好被球場劏咗。當時仍然係感覺到有熱氣由地下升返上黎，個位仲係暖既坐落去好嘔心！！！ 我地四個一袋二袋咁勁遲先埋位，啲日本人一直覺得我地好麻煩。 坐低之後即刻拎風扇仔出黎吹一陣抖順條氣先，然後啲球員好快就入場，即係我地又好忙咁拎相機出黎影相。
隊左杯啤酒同一枝寶礦力之後就終於平靜返落黎，嗰刻熱到無咩胃口食野。 朋友話香港既天氣仲難頂過而家呢刻，佢地雖然覺得熱但都仲頂得順，好快就拎左新鮮燒好既牛舌出黎食。 我分左一塊黎食之後就開始有少少胃口，可以食埋份三文治～ 終於可以專心咁睇下波。
橫濱既作客球迷位於我地左邊既上層看台，好似西班牙啲球場咁將佢地安排去電視睇唔到既地方～ 但藍白紅三色隊喺呢個藍黑色主場入面反而十分顯眼！ 呢場波既戲碼我喺八年前已經睇過～只係主客調轉，當時我對橫濱球迷既印象深啲，同埋淨係掛住搵飛腳枝納粹旗。 日本人好似對歷史無咩覺悟咁，以前比人影過揮動納粹 SS 旗，後來佢地話唔知有咩特別意義，只係覺得個 logo 靚。 仲有令人聯想起軍國主義既旭日旗，佢地都係話無咩特別意思，只係純粹中意呢枝旗；真係唔知佢地有心定無意。
今日我地就無見到啲咩特別旗，只係見到雙方都好落力打氣。 飛腳既球迷看台由上層到下層都全民參與，看台入面有好多唔同旗仔或者門旗，視覺上真係好震撼！！！ 球隊既前身名為松下足球隊，松下即係 Panasonic 既前稱～ 去到二千年頭佢地想起新球場既時候叫人捐錢幫下手，最後由七百幾間公司同私人捐款籌到超過一億歐元去建成現時由 Panasonic 冠名既球場。
除左球迷之後，場波都好好睇，最主要係入球多～～ 唔識睇波既朋友都睇得好開心，不過係要花啲時間講解下足球規則咁。 最基本既由個波出邊線同底線既分別，入第一球之後既 VAR 點運作，越位等等。 佢地最驚訝係見到啲球員真係會飛剷同龍門飛撲救波，因為佢地一直以為係漫畫入面既動作全部都係啲作者自己虛構出黎 xD 又見到班作客球迷就算落後四球都無停止打氣。
完場後我地留低睇 show，個球場好似櫻花場波咁熄燈慶祝！ 我地仲以為係櫻花特有，點知原來個個都有一樣既慶祝方法。。。。 又係去到現場訪問既時候我地就離場，大家都仲係好守秩序咁慢慢行返去車站，離遠就見到車站外面條長斜路堆滿哂人….. 除左揸車，搭單軌係唯一離開既交通工具。。。以我地經驗呢條龍最少要排一個鐘先可以入到車站。 但聰明如我，見到斜路後面有電梯就行去望下，有幾個聰明人都一直行過黎望下，好成功可以 skip 左條龍然後入站。 入到站去到看台又係另一條龍，由於日本人係唔怕迫地鐵，所以一有車黎我地就即刻迫上車搭向可以轉京急路線既站，然後再轉車返去大阪。
返到大阪我地去左鳥貴族食串燒做宵夜先再返去休息。 之後我地仲有三日半喺大阪～ 兩日留返喺市內玩同 shopping ，一日去左奈良餵鹿，然後就飛返去東京開始倒數今次既旅程。。。