30.06.2024
日本足球甲組職業聯賽 第 21 週
大阪櫻花 對 名古屋鯨魚
長居球技場
賽果：2:1 (1:0)
入場人數： 16400 （約 2000 名作客球迷）
門票： 4200¥ （指定席）
更多相片
去到日本既第二日我地由東京飛到去大阪。其實本來我地諗住只係去關西，去到睇機票時先發現原來法蘭克福機場只有去東京既直航機，加埋兩程來回大阪伊丹機場既內陸機都只係加多少少錢。 以我地所知日本既內陸機係有外國人優惠，票貴同搭新幹線唔差太多，而我地如果跟國際航線一齊買既話，咁內陸機同樣會包每人兩件行李。今次我諗住買好多野返去所以行李量好重要！！
我地既內陸機由羽田 T2 出發，做好左網上 check-in 去到機場就用機自己去寄存行李。我地無留意其他航空公司係點做，但 ANA 就只有 Business 以上既乘客先有人手 check-in 服務，除非你 check-in 遇到問題你先可以排 Support 條長龍，會有一兩個人幫手咁，如果唔係既話好似我地呢啲窮人一律自己搞掂自己～ 放低行李然後入閘同過安檢係十分鐘都唔洗，佢既官方通知都係叫你有行李既話就要廿分鐘前抵達機場，即係佢地都係預你只需廿分鐘就可以完成所須步驟去搭飛機！我地地呢啲大鄉里就為左搭酒店穿梭巴就起飛前兩個鐘就到左機場～
飛抵伊丹機場之後我地搭單軌列車再轉地鐵去到本町站附近既酒店。 我地知道日本既地鐵站好多出口都只係得樓梯，當時我地都仲係只得兩件行李所以行樓梯都仲應付到，但一路我地都留意住邊度有電梯搭留返個後著。 有人教喺 Google maps 度較無障礙設施咁佢就會教你行唔洗行樓梯既地方，我覺得唔係次次都準，最好都係睇返每個站既網頁睇佢地個站內地圖最安全。。。
喺酒店 check in 後喺房嘆一陣冷氣就行去心齋橋方向，好簡單一條大直路向南行就到～ 過兩條橫街又已經有一條可以通到去難波既商店街，不過第一日我地未發現到呢條商店街就只係喺大路向南行。 以為日本好易搵到野食，點知行左幾條街都無咩人影，去到心齋橋筋又只係得舖頭…. 最後因為怕太趕就入左第一間見到既餐廳，喺王將食中餐。 中餐定日餐我都無咩所謂，但當我以為喺三十幾度既天氣行左近半個鐘之後可以入間餐廳涼下冷氣既時候，我地竟然㨂左間坐喺廚房前面用餐既餐廳！
食飽逃離個大火爐之後，我地由心齋橋站搭車去到長居站，穿過長居公園去到大阪櫻花既新主場～ 入場前經過作客看台見到來自名古屋既球迷已經喺度為球員逐個打氣，我地仲要先去 fanshop 買完野先入場。 今日天氣預報仲話六點幾七點會落大雨！ 好在最後只係比太陽曬住十分鐘左右比啲烏雲擋左，本身話會落既雨最後都無出現～～
大阪有兩大職業足球隊，一隊係櫻花，另一隊係飛腳。 櫻花既歴史同冠軍無咩緣，一直都活喺飛腳既陰影下。我以為櫻花係 Sakura，但佢地㨂左西班牙文 Cerezo 黎做隊波既英文名 (?!)，仲幫球隊既吉祥物創左個西班牙家族既背景！
而來自名古屋既客隊前身係豐田既廠隊，後來改過幾次名到而家為名古屋鯨魚，以紅黃色做主色，有唔少意大利文既旗幟，有無諗起邊隊波？ 佢地既參考對象就係羅馬。
大阪櫻花叫得做櫻花就當然要用朵花既顏色黎做主色啦，粉紅色波衫係足球界黎講唔常見，通常都係作客甚至係第三作客先會出現既顏色。我地入到場就到喺右邊龍門後面既一片粉紅衫旗海，靚到暗暗地喚起少女心。看台最前嗰排有唔少搶住落力打氣既女球迷，唔知佢地係咪因為粉紅色而追隊波呢？
個球場位於大阪南部既住宅區，由我地個看台方向望出去見到既都係一座座既住宅。更特別既係好似旺角區咁後面有條路軌，長期都有火車來往。 成場波見唔少既係好多遊客到達關西機場之後會搭出城既 HARUKA HELLO KITTY 列車～ 坐得好舒服咁睇左一陣波同火車之後，去到上半場尾段我既 Jetlag 又開始黎料。 我有種感覺係我開住眼咁恰著左，因為明明我眼前係睇到野既但仍然會無意識咁個頭向前跌….. 有幾下忍唔住合埋左眼，但開返眼既時候見到佢地仲喺同一個位等緊開罰球或者角球，一定係因為個節奏慢到令我開始頂唔順… 捱到半場休息時我又即刻把握時間恰一恰，成功喺下半場回復精神～櫻花有香川真司回流青訓母會，早兩年喺比利時見完佢黎到日本又要見？ 今場佢連後備都無份，可能要留力去月尾既友誼賽上陣去同佢以前效力過德甲黃色嗰隊重聚下。
尋日我地太攰所以完場即走，今日我地就留低睇下完場有咩特別野睇。 我地附近大部份人都仍然留喺座位無離開，啲人開始拎啲燈棒出黎好似等睇 show 咁。 我以為每隊波會賣自己顏燈既燈棒，今日我地見到旁邊個阿嬸較哂成條彩虹既顏色出黎都未搵到粉紅色先知原來啲燈棒係萬能 key 黎！幾分鐘後球場關左射燈，變到好似睇演唱會咁個個拎住枝燈棒喺度唱歌 oh oh oh oh oh Cerezo djfhakjdhf 慶祝。到啲球員繞場一周之後去到球迷看台大家就喺台場大合照，然後啲球迷就叫兩個入波既球員一齊喺看台前慶祝咁。喺日本完場後會即刻選出最佳球員 （場場都係巴西球員選出），然後做現場訪問，去到呢個時候我地葡文同日文都聽唔明，係時候走人～離場之後就經公園行去地鐵站搭地鐵去心齋橋諗住去道頓堀搵野食，買左一份小丸子就開始落大雨，好掃興咁唯有返酒店休息算。
跟住嗰個星期我地先去左琵琶湖郊外親親大自然，由大阪去雄琴要經京都轉車，我地喺京都站 stopover 搵 coin locker 放低行李出去行下。 受大雨影響我地只可以搵啲有瓦遮頭既地方行，喺四条行左一陣就去左錦市場同附近既商店街觀下光。 下午就搭火車去雄琴溫泉站，本來擔心夏天浸溫泉會熱死，老實講我地覺得比冬天仲舒服，上水落水都唔怕會凍親，上水之後仲可以好舒服咁係溫泉邊睇下風景咁～ 自星期六朝早到步後都要趕行程，呢兩日既近江一泊兩食終於可以比我地好好咁休息下！！
雄琴原來有一個大型紅燈區 ._. 我地見到湖邊啲建築夜晚勁多燈飾咁，好奇地發現啲建築全部都係粉紅色….. 再上網睇下相關資料先知點解無咩人會提雄琴溫泉，國內亦唔會特別宣傳呢個地方。另一日我地搭火車沿琵琶湖北上去搵白鬚神社既水上鳥居，啲人話可以喺車站租單車踩廿分鐘就可以到達，但去神社條路係要沿住公路邊去，踩單車會唔會有啲太危險？？ 我地經沿山邊行去都覺得有少少驚！！ 喺三十幾度高溫下我地由車站花左大約一個鐘先行去到神社，然後就去左神社旁邊一間蕎麥麵店度食個冷麵休息下，再去七仔買雪條食先再回程。
今次旅程有由香港黎既朋友同我喺京都會合，第一日去左嵐山搭小火車～ 我地絕對推薦先搭 JR 入馬堀然後由總站搭小火車出返去嵐山，仲要記得訂雙數號既座位先睇到最多風景！！ 之後可以穿過竹林行去商店街呢啲一般遊客行程，只係見到個竹林覺得有啲失落，人潮完全唔係問題，係個竹林只係一條路仔咁無咩特別。
第二日我地再由大阪去多次京都，雖然感覺上有啲浪費時間咁，不過喺日本搭火車都係體驗既其中一部份～～ 我地都係見京阪電車既路線會經兩大寺，而佢又有出日票我地就買左黎去清水寺同伏見稻荷大社。
呢一日就係熱浪開始既第一日，藍天無雲咁全日喺京都戶外遊走，熱到第一次喺太陽下開遮…… 喺計劃行程時見到好多短片講京都周圍都係人，仲有啲地方唔比遊客進入。 去唔到既地方我地就無預到，而京都係多人都無預期中既咁恐怖，我以為係會好似去花市咁會被人潮推住行，但全日我地都可以以自己既速度做自己想做既野～ 去得景點就預左多人，真心寧願多人好過一個人都無！