29.06.2024
日本甲組職業足球聯賽 第 21 週
川崎前鋒 對 廣島三箭
等等力陸上競技場
賽果：1:1 (1:0)
入場人數：22393 （約 2000 名作客球迷）
門票： 6400¥ （指定席）
更多相片
盼望左多年既日本之旅黎到 2024 年終於夠能再次成行～～～ 本來係 2020 年諗住去日本慶生最後因為武肺而被逼延遲計劃，唯有當儲多幾年錢去到今趟旅程就可以狠狠咁洗下錢！ 而我地去得旅行就一定會睇返場波既，今次我地會有三個週末喺日本，每個週末都有波睇～ 而第一場波就係喺我地到埗既第一日就上演！
我地喺星期五中午由法蘭克福出發飛去東京羽田機場，好耐都未試過有呢種興奮感覺！ 空姐黎派野飲既時候我地即刻要返杯啤酒黎慶祝下先～ 唔知係 ANA 定係日本人定係有無咩特別原因，喺佢地派餐既時候係完全無飛機餐嗰陣嘔味，啲野食仲要幾好食，我地兩餐都清哂所有野食 xD 飛左十二個鐘去到星期六朝早我地終於抵達羽田機場！！！ 排隊入境只需大約廿分鐘，出到去兩件行李已經等緊我地啦！事前係 Visit Japan Web 整左個 QR code 無論入境定報關都好方便～
入境之後就先去櫃員機拎 d cash，用 Android 既要去排隊買張 Welcome 西瓜實體卡，呢張卡由啟用嗰日開始三十日內有效，期間只可以由現金喺粉紅色機度增值，係麻煩少少但都好過每次都要去買飛。 用 iOS 就可以喺 Apple Wallet 度直接入卡增值好方便。 上網方面就喺出發前買左兩張 eSIM， 2600yen 有 10GB/30Days，好夠用～～搞好哂啲必需品就去便利店食今次既第一舊吞拿魚飯團！
羽田機場同川崎既距離仲近過去東京市中心，我地第一晚就係羽田附近過夜，所以就先去酒店 check in 放低啲行李先，然後就去川崎度行街同食野。由羽田可以搭京急線十五分鐘直達，超方便～ 下次我地如果可能唔會去東京市中心，留喺川崎或者橫濱好過。第一餐我地去左食 Kura，可以自成一角同埋咩都可以食下，之後喺地下街買左把風扇仔救命。夏天去日本原來係玩命！！！ 歐洲係有熱浪，但係乾熱，去陰少少既地方都仲可以；但日本同香港一樣係濕熱，我又以為室內會開大冷氣仲好驚會容易攝親，點知原來日本人唔係周圍都開大冷氣._. 車站熱既～地下街熱既～商場又半開放式咁走哂啲冷氣。。。搭車又唔知點解次次都排中弱冷…
好在去到四五點太陽開始落山又有返少少涼風，喺我地搭車去球場既時候個感覺好返啲。日職係夏天既比賽時間全部都係夜晚先開波，去到秋冬天先會有下午波。 如果呢個時候要下午去睇波真係會恐人！！由川崎站搭去武蔵小杉站，然後要再行大約三個字先去到球場，如果再行多三個字就已經可以行返入東京都。喺日本可以自帶野食同飲品入場，佢地有枱仔係入口查袋但佢地全部都係係咁 e 望兩眼，真心唔知用途係邊～～ 入場後我地先去買毛巾做紀念品，然後就去買野牛肉飯同唐揚雞做晚餐，當然唔少得啤酒！
今個旅程我地計劃左睇五場波，呢場係最擔心買唔到飛。 我地睇其他人既遊記都有提到川崎既主場波飛唔易買，我地就日日捕住 JLeague 個網希望可以搶到飛～ 日職買飛既好處係佢地有一個統一既售票系統，係日職官網開一個戶口就可以買到所有球隊既門票！ 不過要留意既係佢有日文官網同英文官網，如果用英文官網係要比手續費。 我地計劃行程時見到橫濱既官網（！）有哂步驟教人點樣喺日文官網買飛， 教你要入平假名既話可以 copy 佢地邊隻手，要入地址同電話又可以 copy 佢地提供既資料，令我地最後好成功咁以原價可以買哂五場波既波飛！ 呢場波我地只買到接近作客區既混合區，都好過無啦～
日本既足球文化大部份都係有好重意大利同南美風格。 先講球隊名稱，今日兩隊波一隊叫 Frontale 另一隊 Sanfrecce 都係意大利文。而球迷既好多打氣旗幟、大字報同組織名都係用意大利文黎寫，好多打氣歌都係意大利球迷唱開既歌；而看台上佢地好中意由上到下拉開幾條彩布咁。 但佢地又唔係好似歐洲咁會場外約戰打交，場內就鬥放煙火咁，佢地只會專注自己隊波做好自己既「工作」。另外佢地都有好多唔同既規定，特別係針對想企喺打氣看台既球迷，例如開波前兩個鐘就要入場。極端啲既係要開波前十幾個鐘就要喺球場門口排隊咁，因為佢地咁樣係表現對球隊既熱誠。仲有身穿衣物既顏色同開波前後同比賽時要出盡力打氣係基本～ 川崎既主色係天藍色，而廣島就係紫色。
只睇車程距離既話廣島同川崎相隔 800 公里，揸車既話要大約十個鐘，搭新幹線都要四個幾鐘；今日佢地都帶到大約二千人黎到作客真係好勁！ 我地埋位既時候咁岩佢地開始同啲球員打氣～ 日本球迷係會喺球員熱身既時候逐個球員名唱一次～ 所以去睇日本波可以早一兩個鐘入場都已經好多野睇（球場係開波前幾個鐘就會開放入場） 賽前佢地有市長出黎講野慶祝川崎立市一百週年紀念，跟住又有個唔知係咪前球員走出黎對住吉祥物射十二碼，再去到去球迷看台前影相。 啲球迷個個睇到好開心！！！更唔少得仲有女團唱歌同啦啦隊助興，到底幾時開得波呢？？
川崎原來喺我地上次黎日本到而家之間贏過四次聯賽，另外又贏過天皇盃同超級盃，黎到今季就喺榜下游掙扎緊。 今日佢地喺上半場領先，表現上都對得住班球迷喺三十度高溫全場喺度同你唱跳既。 望住對面天藍色既人海，個個好整齊咁舉手跳住打氣真心癲。 我地望去作客看台既視線有啲受阻，就算睇唔哂都係成場波聽到佢地既打氣聲。 去到完半場前我開始頂唔住 jetlag 而開始恰眼訓，半場休息時我真係要黎個 powernap ，聽講佢地喺我訓緊覺時全場齊跳 YMCA sosad 下半場尾段客隊射入追和，但主隊球迷都無暫停打氣。
完場後見到先醒起雙方球員會集合係中圈先同球迷鞠躬致謝然後再互雙相手，呢樣好似都係日文獨有？賽前熱身，班球員會先去球迷看台前鞠個躬，到準備開波會喺中圈鞠躬，完場又一次。 主隊就會繞場一週鞠幾個躬，客隊就再去到自己看台前鞠躬多謝黎捧場既球迷。 自己喺日本都會不只覺係咁鞠躬，有人讓路會鞠躬唔該，撞到人會鞠躬黎 say sor，同服務員講唔該又會鞠躬～～
我地由喺德國出發到而家已經三十個鐘無訓過，賽後啲花生都放棄唔睇快啲離場想返去酒店休息。 下次再 plan 既話應該唔會再喺到步第一日就去睇波….