08.06.2024
國際友誼賽
比利時 對 盧森堡
Stade Roi Baudouin
賽果：3:0 (1:0)
入場人數：35287 （約 500 名作客球迷）
門票：30€
更多相片
接近完季之前我地想可以係暑假去個短程旅行，有諗過去東歐，又有諗過去北歐，計下計下又唔想洗太多錢曾經一度諗住邊度都唔去。最後見到有高鐵可以由法蘭克福搭三個鐘直達比利時首都布魯塞爾，可以去睇比利時係國家隊專用既球場出戰。
兩年前我地去左布魯塞爾安德烈治睇波，嗰陣係諗住只逗留喺球場附近行下飲幾杯果酒，去到先發現原來 Anderlecht 係窮人區，然後行下行下見到尿尿小童，再行多幾步就到大廣場。當時好 dum 心點解會諗住花時間留係 Anderlecht 唔早啲入市中心行。 今次我地終於可以花多啲時間係城市觀光～
我地星期六下午由法蘭克福出發，搭得火車又點會可以準時到呢～ 出發前我地收到通知法蘭克福同科隆中間既軌道有壞車所以會 delay。 我地班車都仲可以出發，但當日朝早有好幾班車都取消左，即係好多人會迫入我地呢班車！！ 由法蘭克福站出發都還去，第二個站係機場勁多人塞上車，最後車長要出動 30€ 禮卷勸啲人搭另一班慢車搞左半個鐘先成功出發。 去到科隆又停多半個鐘話去 Aachen 中間有路軌技術問題，我地可以要兜路變相會再遲多個半鐘。 後來出發時佢話問題成功修正我地可以跟原本路線出發～ 最後比佢趕到只係遲 45 分鐘到達布魯塞爾，連錢都唔洗賠！！！ （遲一個鐘以上先可以叫佢地退錢）
去到北站附近既酒店 check -in 完休息一陣我地就出去搵野食。 我地個站係咁岩位於布魯塞爾市中心既邊邊，啲人個個勁無禮貌左攝右攝迫黎迫去搞到心情勁差。第一站我地先去 1958 年世博座地，去親眼見下個原子球塔。 真心，我一直以為呢度既地標係得尿尿小童同個大廣場，原來個原子球塔對歐洲人黎講係其中一個「朝聖」之地。 係塔底坐左一陣欣賞下呢座咁宏偉既建築物之後就向球場出發。
沿路已經見到好多著紅衫或者搭上黑黃紅既比利時國旗，買左塊比利時窩夫一路行一路食～ 好快就去到球場門口。 Stade Roi Baudouin，我搵唔到香港點譯呢個國王個名，見到中文譯名係博杜安或者包杜爾，呢兩個名我地唔係好熟亦都未必有人識。 但如果講出呢個球場既原名就應該個個都知：希素球場。 呢個名通常都會連住多兩個字：慘劇。
希素球場慘劇可以話由多方面既失誤而造成，由球場失修唔適合舉辦大型賽事、到警方通訊系統因為無電而失訊未能及時控制場面、同歐洲足協既黑箱作業再加唔安份既球迷搞事。 當然最大問題係來自球迷互擲雜物，最後一大班利物浦球迷嘗試衝向祖雲達斯球迷方向導致原本已經甩皮甩骨既圍欄倒塌，造成 39 死超過 600 人受傷。 我覺得更恐怖既係發生左咁大件事賽會都仍然堅時要完成場比賽，然後見到歐州足協到而家都仲係見錢開眼。。。。
個球場既外觀好似一個農場咁，唔係好睇得出佢地有翻新過個球場。 拎住張飛入場外要由保安簡單咁查袋搜身，然後再有比利時警察再抽樣搜多次身。 個球場可以容納五萬人左右，今日預有大約三萬人入場，見到個個一家大細都一身打扮到比利時既吉祥物咁氣氛好歡樂，都幾羡慕佢地有一個可以令佢地咁自豪既國家！等到啲球員熱身時，啲比利時人個個就越黎越興奮～ 由宣讀陣容嗰陣就聽得出最受歡迎既球員係 Lukaku 同埋 de Bruyne。
球員正式入場後就先播盧森堡既國歌，當時好多人都仲坐係度，有啲後生仔就笑住企起身話要 Respect respect，對面作客看台都坐左幾百個盧森堡球迷黎支持自己國家。 喺看台入面好多人高舉自己國旗為自己國家打氣！ 輪到播比利時國家時都仲有唔少人坐左喺度。 平時都唔會特別留意啲人係播國歌既時候會做啲咩，但咁岩早幾人有三個香港人因為播國歌無企起身定擰轉背所以比中共用國安法拉左。一個正常國家其實唔會理啲人喺球場播國歌既時候做緊啲咩，你可以大聲跟住唱、可以噓、可以9唱其他歌，企唔企起身同 re 唔 respect 都係自由，某啲場合你可以話要睇人有無修養既，但就算無修養都會危及國家安全要比人拉嘛？ 我喺呢個球場入面見到唔少不文明人坐住係度聽國歌做自己野～呢個國家一定勁危險～～
開波後班比利時球員斷斷續續都有一齊唱下簡單既打氣歌，不過我就聽唔出佢地其實點叫自己國家，係英文既 Belgium? 法文 Belgique? 定荷蘭文既 België？ 定係各有各叫？又聽講過法語區比利時人唔支持比利時？咁可能荷蘭文先係大贏家？人地盧森堡都起碼叫做有盧森堡文，佢地喺看台前掛起 Letzebuerg 紅白藍大旗，離遠見到佢地個個都有好出力打氣，感覺有啲似 SVE 作客柏林人少少用蚊聲打氣咁。
我地黎到都係做 event fans 食下花生，比利時入到三球波都好，可以享受下班國民為自己國家隊慶祝。 全場波最得意既時候係近完場時啲細路由四面八方衝哂落去場邊圍欄，應該係想爭取靚位搏下完場後可以同球員近距離接觸。 我地坐係上層就有好多小朋友好慘咁 lur 住爸媽問點解佢地唔落得去。 完場後我地好快就離場，唔知場內啲家長要花幾耐先搵得返自己個小朋友呢？ xD
離場後我地好似三文魚咁逆流而行，絕大部份既人都係向停車場方向，得少數人行去搭地鐵去布魯塞爾市中心。 一開始我地諗： 嘩，呢隊波得啲外來人黎睇，個個都住市外既？ 諗多兩諗先發現自己on9，今場波係國家隊比賽…. 啲球迷當然係來自比利時唔同地方而唔會淨係來自布魯塞爾！！！咁樣反而對我地有著數～ 入左希素車站之後就完全無人潮，個個都可以輕鬆上車。
返到市中心我地仲可以食啲野先返酒店休息～ 星期日我地一早出發去觀下光，行到攰就搵地方坐低飲返杯比利時既酸果酒 (Lambic），呢個國家最正既就係求奇㨂一間餐廳都可以飲到多款正宗比利時啤酒～～ 傍晚去火車站搭火車返德國，又要講嗰句，搭德鐵要有 delay 先係完整既旅程～ 未上車我地就已經要係車站呆企半個鐘，好在上車後沿途都十分順暢，返到屋企個天都仲未黑。
今個旅程完結之後，我地終於可以專心期待月尾既旅行，終於可以去入貨帶比卡超返屋企啦～～～～～～～～～～～